kiddibloggi

73,000,000 (鼠年即將過去嘅異想)

2009-01-25T20:01:00.002+08:00

異想...冇錯, 今次唔係叫感想
話說1月23號嗰晚6合彩搞珠, jackpot竟然高達7千3百萬! 咁我會諗吓, 假如1個咁唔好彩比我獨中到呢7千幾萬嘅1st prize會點呢?? 其實我一早已經諗好晒: 第1件事就係要同所有屋企人斷絕關係, 因為只有咁樣, 我先可以有真正嘅好日子過. 然之後, 我就會"搞掂晒D嘢"離開香港, 以後唔會再返嚟, 反正去到邊都係無親無故 (死都唔會死喺香港)

春節愉快

09願望

2009-01-01T20:44:00.002+08:00

貪心d, 今年09年好多個願望...唔知最後有幾多個會實現呢?

希望隔籬屋1係快d搬走, 1係唔好再養隻死人鸚鵡害人
希望恒生指數頭3個月之內跌番落1萬點
希望我自己1人獨中六合彩頭獎
希望順利轉工, 搵到份好工
希望搵到自己嘅*真愛*

好想今年盡快過去, 2010年快d嚟到

無覺好瞓 (2008年即將過去嘅感想)

2008-12-31T00:02:00.002+08:00

終於又嚟到last day...呢一年時間真係過得好慢. 回顧番2008年好似週圍都好多事發生咗, 但係其實絕大部份都唔撚關我事. 覺得最可惜嘅都係恒生指數跌到落萬一點就已經冇再繼續跌, 始終未能如我所願! 我相信新嘅一年, 成個香港社會各方面都會繼續衰落去

我嘅2008年如果要用四個字嚟做總結, 都係同往年一樣啦: 無覺好瞓. 本來咁多年嘅樓上樓下d家居噪音已經夠嘈, 今年呢隔籬屋仲整多隻死人鸚鵡由朝到晚喺度叫鳩生晒, 神憎鬼厭, 投訴過都係咁....唉! 真係唔知嚟緊仲有幾多年要受

₩20,000

2008-10-21T09:35:00.002+08:00

好消息...原來韓國銀紙平咗好多呀! 去年10月, 買₩20,000要用港幣170蚊, 而家呢, 只要用110蚊就買到喇!! 哈哈哈

淨番幾多張銀紙 (9月份即將過去嘅感想)

2008-09-25T01:28:00.006+08:00

即將過去嘅9月份可以話係新聞旺季, 每日打開報章簡直係精彩絕倫!! 不過, 當全香港絕大部份人都喺度關注立法會選舉, 殘奧會(果然夠"殘"), 吉野家強姦案, 最熱中秋節, 毒奶粉事件, 金融海嘯(原來改咗名,以前係叫"金融風暴"), 雷曼兄弟, AIA, AIG, 深圳歌舞廳大火, 神舟七號, 銀行擠提..........發覺原來全部嘢都唔關我事喎. 我最關心嘅係, 我個銀包裏面仲淨番幾多張銀紙

幾個焦點人物

2008-05-09T23:00:00.005+08:00

5月9日, 08年. 近期幾個焦點人物, 深深記載咗喺眾人心裏面:

陳巧文
行行吓街, 比人發掘佢做明星, 帶住支雪山獅子旗週街走,
唔怕比人打.

王嘉梅
讀讀吓書, 誤入歧途賣身賺快錢, 結果比人五馬分屍,
掟咗落鹹水海餵魚.

盧志軒
踢踢吓波, 昏迷送入醫院搶救. 逃過鬼門關一劫, 但醒番之後,
醫生就話比佢知, 以後唔可以再踢波.

陶思誦
寫寫吓blog, 响大陸內蒙古一單嚴重車禍中死咗..咁就玩完.
最後一篇 http://www.royto.com/friendsblogmain.php?id=1
　

乜撚嘢都貴晒 (4月份即將過去嘅感想)

2008-04-30T23:09:00.000+08:00

過去嗰幾個月, 唔知點解乜撚嘢都貴晒, 有D仲要係加完冇耐又再加, 到底發生咩事呀??? 而家通街都係奸商...買每樣嘢, 搭每程交通, 為免比人搵笨都係小心D好!

去惠康買包4件裝嘅嘉頓熱狗包...
$6.5 (2007年9月)
$6.9 (2008年2月)

紅磡-美孚紅色小巴..又貴咗! 所以今年開始都少咗去梓楓屋企了x(
$8.5 (2007年7月)
$8.8 (2008年2月)

忠信藥房 - 珍寶牌魔術硅膠防水耳塞 (瞓覺要用佢)
$25 (2007年9月)
$35 (2008年1月)
呢件真係加得離譜, 加幅40%

熊貓麵包店 - 提子包
$1.7 (2007年7-12月)
$2.0 (2008年1月)
本來都會每朝去呢間買番個當早餐, 而家直頭連早餐都慳番, 因為貴到都食唔起了

K&K - 提子包
$1.7 (2007年7月)
$2.0 (2007年8月)
$2.2 (2008年1月)
$2.5 (2008年2月)
呢間直頭黐鳩綫...之前間中都會幫襯吓, 而家? 唔洗旨意

群樂 - 火腿蛋包
$3 (2007年9月)
$3.5 (2008年1月)

亞媽同我去執兩劑中藥
$36 (2007年4月)
$38 (2007年10月)
$40 (2008年2月)

講極限運動嘅 X Life 雜誌都加咗18% (即係每7期就要睇少1期)
$38 (2007年9月)
$45 (2008年1月)
其實買番嚟只係為咗裏面某個講行山行澗嘅column, 其他內容多數揭過就算..咁樣真係好唔抵

天星小輪紅磡-灣仔加幅13%
$5.3 (2008年3月)
$6 (2008年4月)
本來每日返工都會乘搭嘅交通工具, 本身已經係貴, 因為票價唔係計船程長短, 而係計..乘客量! in fact, 我可以選擇搭巴士去尖沙咀再轉船instead, 放工回紅磡亦如是. 而家紅磡船貴咗就更加唔撚洗搭...因為兩程仲貴過一程 (i.e. 8A巴士$3.5 + 尖咀船$2.2 = $5.7) 兼行少好多路! 而家最令我想搭番紅磡船嘅原因係...1.貪佢冇乜人搭,多D位冇咁迫 2.返工趕時間

龍門飯盒 - 乳豬雙拼飯
$30 (2007年5月)
$38 (2008年1月)
我至鍾意食嘅飯盒, 1加就8蚊! (加幅27%) 加咗新價初期, 燒味師傅都見我熟客比足餸我, 仲 "ngut" 到個飯盒爆開閂唔埋, 後來D料就開始減喇...所以而家都少幫襯咗, 要一至兩個禮拜先會買一次咁貴嘅飯盒了~ 將來真係唔排除要五六十蚊先買到呢個飯盒:O

龍門飯盒 - 燒味雙拼飯
$22 (2007年5月)
$23 (2007年11月)
$25 (2008年2月)
講真, 如果比我揀..大家樂大快活D外賣餐定呢間龍門, 我一定會揀龍門..雖然係貴咗, 但一定係好食過&&抵食過嗰D快餐

Artisic Salon - 洗剪吹
$88 (2007年8月)
$98 (2008年3月)
加幅11% - 幫我剪開個stylist同我講係因為加舖租...即係又係轉嫁比消費者! 又少咗幫襯..有時去第度剪, 或者留長D先剪lu

美心西餅 - 朱古力撻
$3.8 (2007年10月)
$4.0 (2008年3月)

家興 - 水仙花牌五香肉丁罐頭
$7.5 (2008年3月16日)
$9.8 (2008年3月31日)
咁短時間內已經加三成, 令到我開始唔再信任呢間 "本來以為賣得算平" 嘅 up-dup 超市

華潤集團職員餐廳 - 午市自助餐
$30 (2007年8月)
$35 (2008年1月)
$40 (2008年4月)
已經唔係成日去, 好似每次去都貴咗咁. 以為加咗價D餸菜選擇會豐富D, 好食D...點知同之前都係差唔多, 冇分別

去恒生醫務所睇醫生, 發覺醫生仲貪錢, 加咗50%
$120 (2007年5月)
$180 (2008年4月)

滙豐信用卡年費
$220 (2007年2月)
$250 (2008年2月)

4月份即將過去...08年3分之1即將過去...真係好唔開心

沈默 (2月份即將過去嘅感想)

2008-02-29T22:26:00.005+08:00

閏日又一次飄走~~(邊個成日話"1年365日"咁不負責任?) 今日又好,今個月又好..你我到底又做過d咩?

近排d報紙,雜誌,電視,真係多嘢睇到暈! 呢個月好似零舍多大新聞,大時事..真係令人目不暇給,多到睇唔切又睇唔晒. 但係隨住呢d嘢出現得越嚟越多,世界變得幾咁亂,個人反而越麻木,唔接受都要被逼接受,已經冇晒感覺. 呢刻,我唔知我可以做到d咩,惟有選擇---沈默

雖然各樣嘅大新聞,大時事,好似鋪天蓋地咁冚晒過嚟...但係
依然掩蓋唔到我對某幾個人嘅思念
on this leap day~ i miss u all

區議員做過d乜

2007-10-10T20:03:00.000+08:00

區議員幾十年嚟做過d乜,真係唔撚知..

我淨係知,早响一兩個月前就已經見d候選區議員朝朝早棟喺條街度,仲要每日同一個位置,拉埋一個二個d亞嬸週圍係咁派傳單,真係見到都覺得煩!你估d紙仔唔撚洗錢ga,如果係街坊嘅睇1次已經夠,洗乜日日攞嚟睇呀?你估嗰份係新聞當免費報紙睇咩!唔通真係派紙仔要派到1118選舉日先至肯收手..咁嗰日就真係皆大歡喜la,候選人收得工,選民市民唔撚洗再比佢哋煩

你睇吓呢區週圍幾十年嚟,街道同居住環境都係咁差,搭車難搭,塞車冇改善,舖頭佔據行人路,夜晚食肆d噪音又冇人管冇人理..d選民都係冇鳩用,咁多年嚟選咗d食嘢唔做嘢嘅垃圾區議員出嚟!所謂區議員真係做出嚟比你睇嘅嘢你咪睇到晒囉,就係每隔幾年選舉嚟臨之前,朝朝早棟喺條街度派紙仔叫你投佢呀嘛!搞到個區咁樣,d有份投票嘅選民都要負上責任先啱

呢排返工跟番之前個亞sir,係因為做開嘢嗰邊仲未傾得掂個schedule,比人release番出嚟,搞到我遊遊蕩蕩..而家幾乎日日office hr都做緊自己私人嘢冇任何output,食飯食兩個鐘都得,雖然頹廢同埋好冇意思,但係我又好似好enjoy咁

今日放工行過港灣道天橋(準備去碼頭搭船返屋企)時,你估發生咗d咩事..真係好日都唔會遇到1次,突然間聽到底下條馬路"蓬"1聲好响!原來1個女人亂過馬路比車撞..睇咗1陣我就走咗.唔好引我睇搞到我又走班船.港灣道嗰個位我有時都會趕時間喺嗰度過馬路,盲中中的確有d危險ga,but我就唔會有事呢,我好小心.我驚比人捉仲多過驚比車撞

10-10好難得同一晚會寫兩個blog,1個中1個英,英文嗰個1年先寫1次ja(幾乎係荒廢咗)

咁啱寫blog呢日撞着特首出PA,不過都唔荒有咩好嘢la,1如意料中,幫唔到弱勢窮人低下階層就預咗,亦都幫唔到"夾心"中產乜滯,佢都係迫住要幫嗰d大財團同埋富商...而家d大型零售集團真係越嚟越乞人憎,靜雞雞猛咁加價又唔想比人知,仲要扮好心扮有承担,表面上同實際係做緊兩樣嘢!d收銀講嗰d"歡迎光臨","有冇會員咭","加唔加多幾蚊買番個XXXX","多謝支持環保"..真係多鳩餘!唉...我都發覺我幫趁少咗嗰d無良奸商,隨住時間過去就越嚟越認清佢哋d真面目

後知後覺嘅政府而家先推出12年免費教育,真係太遲..假如30年前已經行12年同埋6-3-3學制,我呢代就唔洗讀得咁辛苦,屋企負擔都會少咗,唔洗因為經濟問題而成日担心d學費啦.怪都怪自己唔夠人哋幸福幸運

皇帝與皇后 (7月份即將過去嘅感想)

2007-07-27T22:53:00.001+08:00

金色7月,燦爛7月! 成個月幾乎每日都係藍天白雲,走去維港兩岸睇海景,日與夜都係咁清.今年夏天真係好天得交關呀! 回顧呢個7月頻頻出動,山-水-澗-海-岸-街-道-樓-橋-花-樹-鳥-蟲-天-地,係又影唔係又影,忽然間比之前影多咗好多相(為數幾百GB之多..大部份都未得閒"執"),對手臂同條頸都曬到黑咗添~

25號晚睇到段新聞,都幾突然,一時間不禁嘆息.第朝就見到報紙寫晒頭條大字話"九龍皇帝駕崩"! 的確好特別-比佢幽咗一默,因為好似從未見過什麼"皇帝駕崩"咁樣嘅頭條,仲要係發生喺香港喎.

細個時真係唔識得"欣賞",更加唔知咩叫"集體回憶",覺得佢整到周圍d公物污糟晒好冇公德.到後來,先認同曾灶財嘅書法係一種行為藝術(話佢傻又好).呢刻諗起軟硬天師嗰張"廣播道Fans殺人事件"唱片,真係覺得當時嘅軟硬好前衞,好有idea,識得把握時代脈搏,將重要嘅時代標記record down.之所以話佢又係"集體回憶",因為都係陪伴住好多[土生土長]嘅香港人成長,隨住日子過去,將來都會不斷咁勾起淡淡回憶.

以後唔會再有曾灶財先生嘅新作睇到喇.有得睇好快d睇,第日洗咗冇得睇.

即將過去嘅7月,竟然係除咗皇帝之外又有皇后! 今日7.27放假,搭船過海去GPO補番d文件,順便週圍行吓,睇一睇舊碼頭一帶變成點,發現舊天星碼頭真係唔見咗,剷晒碼頭部份得番條海岸綫.7月尾,保衞碼頭運動嘅火炬又再燃點起.真係好佩服,响咁熱天氣底下,嗰班繼續留守喺碼頭露宿,對抗到底嘅戰士.無奈地,我地每一個人又可以做得d乜呢? 連嗰個咁有紀念價值嘅"噹~噹~噹"鐘樓都保唔住,呢個淨番"棚骨"嘅皇后碼頭又點可能逃得過被清拆嘅命運呢?

07年7月尾,皇帝與皇后,我地又失去多兩個"集體回憶"咯

小暑大暑, 好熱好熱呀

2007-07-10T21:57:00.000+08:00

小暑大暑一齊來, 每日都好熱好熱, 終於都感覺到真正嘅Hot Season正式來臨. 呢個農曆五月, 除咗6月尾嗰幾日落過好多雨之外, 幾乎日日都可以見到藍天白雲, 視野廣闊嘅景色...相信呢排已經係一年裏面, 最天朗氣清嘅日子喇. 個幾月前開始跟番隊行山行澗, 重拾番以前嘅感覺, 影低咗D唔錯嘅風景相, 依然好滿足.

同往年有D唔同嘅生日願望

2007-07-06T02:07:00.000+08:00

生日願望, 人人都想實現. 不過係咪一定要自己能夠做到嘅嘢, 先至可以成真呢? 要求太高或者不設實際, 許願有冇意思呢? 話咁快又7.6喇. 今年我嘅生日願望, 同往年有D唔同喎. 我希望恒生指數响今年下半年之內, 盡快跌番落10,000點以下. 不過我都相信, 呢D咁荒謬嘅嘢又有咩可能會發生呢

我睇到呢個世界, 呢個社會, 真係越嚟越變態. 經濟咁差底下, 麵包雜糧同天星小輪都要逆市加價; 醫生, 教師, 社工, 巴士司機, 甚至外地傭工, 齊齊示威要求加人工, 個個都認為自己應該賺得更多; 逢禮拜嘅港島區鬧市, 外傭聚集到幾廿個墟, 香港人請埋晒咁多傭工返嚟破壞市容為乜呢; 少年男女比得起錢, 鍾意就索吓K吸大麻, 咁都可以當係正常事, 學校都費事理; 有D就年紀輕輕學人炒股票, 當街當巷同人講, 好似係光明正大天經地義; 聖經都會比人投拆, 性知識/文學自由/網上言論受到監控; 香港電台就快執笠; 集體回憶逐樣拆, 影相都影唔設; 電召的士唔洗比電召費之餘, 仲將車費打個8折益D乘客; 去7仔買支雪糕攞個膠袋仔又話要比多5毫子"附加費"; 煙民週街食煙搞到烏煙瘴氣....個個顧自己, 個個唔理人, 個個都係為錢為利益

你估將來又會變成點

黃家X (6月份即將過去嘅感想)

2007-06-30T00:11:00.000+08:00

黃家駒 - 意外身亡樂隊主音歌手,享年31歲
此時此刻,個個只係顧住回歸十週年,已經再冇人提,新聞冇再寫,冇乜人會記得黃家駒呢個名字. 唔通佢真係咩貢獻都冇,唔再係回憶嘅一部份...你鍾意14年前嘅今日, 定係14年後嘅今日多D呢? 而家鍾意聽D咩歌呢?

黃家熙 - 救火英勇殉職消防員,享年27歲
响佢個dead xanga度,last post已經累積咗3,879段留言喇! 比起其他自殺而死或比人殺害嘅人嗰d xanga多好多. 英雄係唔同d㗎. 某日喺裏面睇到有幅相令我一時感動,手痕簽咗個名

個個顧自己 (5月份即將過去嘅感想)

2007-05-31T00:28:00.000+08:00

理得呢個世界發生緊咩事, 總之個個都係繼續顧住自己, 除非同自己(再唔係加埋屋企人)嘅利益有關或者嗰樣嘢有D咩着數攞, 所有嘅事都可以話係事不關己, none of my business!

5月份又過去喇...31號呢個'last day'你知唔知有個重要意義, 就係世界不吸烟日. 究竟HK政府過去1年(or過去10年)又做咗D乜呢? 之唔係眾所週知响今年元旦日正式實施嘅新"禁烟條例"囉, 呢條咁冇人情味嘅Rule, 真係扭曲晒好多娛樂場所本來應該有嘅"烟味"文化, 連公園仔都話要用黃油劃清楚條界綫出嚟"罩"住D烟民, 都算係奇觀. 到底立呢D法例, 定下呢D規則/限制嘅人, 有冇諗清楚會有咩後果, 有冇顧及到D烟民感受, 有冇Respect到所有香港人

條Rule推出咗之後, 唔單只冇減輕到普羅大眾吸入二手烟嘅苦, 反而仲令到更加多人隨處食烟吞雲吐霧, 搞到更加多地方烏烟瘴氣. 咁咪又係另一個刻意製造"神聖社會", 結果弄巧反拙越搞越"喎"冇得返轉頭嘅最佳例子囉! 總之唔食烟嘅人都係要繼續忍受二手烟&向D烟民表達不滿, 而D食烟嘅人就繼續旁若無人咁週圍噴烟, 只不過係比以前多咗D顧忌...其實無論食與唔食, 個個都唔係又係為咗自己利益着想, 個個只係顧自己唔理人咩?

講吓近排...禮拜六忽然跟隊行山, 但就唔係因為想行山, 或者睇風景夜色, 或者去識吓新人, 只係因為個搞手係我一個好多年冇見, 已經比佢淡忘咗嘅"舊朋友" (當然都有D係因為想試吓自己對腳如何,結果都應付到,行足全程). 行完之後, 我哋仲圍埋一齊坐喺同一張枱度食火鍋. 佢變咗. 好似已經冇晒嗰陣時嗰種"比較近"嘅關係. 只變成"嗰一日"嘅搞手與參加者之間嘅關係囉. 人緊係會變. 我都變咗啦! 其實都唔係淨係呢次單一嘅事件 (即係冇跟隊咁耐, 忽然間又出番嚟"玩"), 而係隨住時間不斷前進, 社會不斷變遷......

我覺得人情越嚟越淡薄, 越嚟越多人唔識得or唔願意表達自己, 個個顧自己, 着重於眼前嘅利益. 行過人來人往嘅行人天橋, 感覺係好冷漠, 個個都步伐急速(趕住去死咁), 除非你做出D異常(或作"戇居")嘅行為出嚟, 否則冇人會注意到你, 你係唔值得任何人嘅注視同留意. 成個世界都冷冰冰咁

着錯size鞋今日先發現+古惑仔xanga

2007-05-20T17:31:00.000+08:00

平時真係好少喺lee d時間打blog...今個sun有d例外出咗街, 同個fd(iao)食飯順便就叫做慶祝佢今日生日, 先發覺之前去食過(响紅磡都會入面)嗰間原來係叫"榆豐", 而今次嗰間先係"維苑", 相比之下, 有優惠券用嘅lee間維苑真係咩都爭d咁. 嘴邊生住兩粒大"飛滋"&條脷有d損, 都仲要食超熱氣嘅鐵板餐, 你話係咪抵死

食完搭8A去咗海運LCX, 為咗搵我個治療師提議比我着嘅NB運動鞋, 身邊嘅iao教我點樣揀碼嚟試, 到今日先發現原來我着鞋一直着錯size, 以為大碼鞋裏面鬆動就係"好着", 可能就係因為長期咁樣着對鞋而導致對腳有事. 我諗真係要盡快睇啱一對新鞋換咗佢, 同埋要改變過往買鞋.試鞋同着鞋嘅習慣喇

尋晚喺電視度睇到單14歲少年(kaho426)寫blog比人拉嘅新聞, 點知今日仲見到比appledaily登晒大字報頭條通街賣添~! (有討論區d網民仲話佢一夜成名~) 八卦走咗去佢個xanga度睇番d"痕迹", 好多粗口, 好teenage, 見到佢毫不忌諱咁話自己跟大佬, 吹雞, 晒馬, 開片, 索k...話比人知lee d就係"古惑仔嘅生活"(真係多得咁多年嚟Hong Kong made嘅古惑仔電影唔少~), 完全唔會認為嗰d生活同行為係唔正當or唔正常, 比其他細路睇到都以為嗰d就係一般同輩teenager好普通.冇問題嘅everyday life..

不過好佩服(羨慕)佢, 將嗰d所謂"古惑仔生活"咁public咁講比全世界人知. 唔知係咪想博出位定係博出名呢(終於都得償所願~)? 你諗吓喎都唔係個個有本事做得到個喎. 正常人大個咗之後就永遠都唔會再擁有嗰種少年時嘅無知, 衝動同咩都想試嘅heart...所以除咗教訓同懲罰之外, 對於當事人嚟講, 都不失為一樣畢生難忘嘅回憶ga (笑)

同時都會睇到香港人响網上面嘅"自由"越嚟越少lu, 有好多原本d人以為做咗出嚟唔係犯法, 唔係錯, 又或者"冇乜大礙"嘅事, 都隨住上網生活越嚟越普及而出現多咗好多爭議性嘅問題, 遲d喺d forum or blog講d詆譭/侮辱/人身攻擊/顛覆國家嘅言論都隨時會比人拉(23條?), 就算唔會都至少比人monitor, filter or censor, 哆啦A夢fans唔可以再整fansite(因為copyright), MSN個人圖片(buddy icon)唔可以用叮噹公仔, "不雅"嘅情色文學同相片唔可以再出現, 唔可以喺討論區放mp3比人d/l, 網頁或blog唔可以加背景音樂....總之以後就只有政府認為應該做或者"正當"嘅事先可以出現喺網上世界, 否則你都係要提心吊胆玩internet, 事事諸多顧忌

似乎政府所做嘅一切嘢, 都係希望令到香港社會變得越嚟越"神聖"無瑕, 點知就係比以前仲更加墮落同退步, 下一代更唔識分事非黑白好壞, 真係弄巧反拙

堂堂一本聖經都會比人"投訴"

2007-05-17T22:35:00.000+08:00

堂堂一本巨著聖經都會無端端比人投訴, 話佢係"不雅"著作, 仲話應該"入膠袋"先好賣喎....簡直係聞所未聞, 哈哈! 開玩笑都唔好搞撚到咁大, 玩幾日過吓癮就算啦. 如果係認真嘅, 咁樣只會比人睇到你d人係幾咁幼稚同無知, 不如慳番d時間精神, 讀多d書學多d嘢好過啦

世界真係越嚟越變態, 發覺越嚟越多人不分是非黑白, 啱嘅嘢變咗唔啱, 唔啱嘅嘢又變咗做啱, 社會問題千奇百怪, 日日都有新鮮怪誕事....好似之前有個"懶醒"嘅細路(志願係當差)做咗二五仔, 篤爆一間體育用品店售賣武器, 結果竟然係令到一個七ar幾歲嘅亞伯去踎監! 本來想做"正當生意"益吓d人, 點知個亞伯好似做咗代罪羔羊咁, 將d罪孭晒上身. 但d人又唔會諗吓點解lee d生意要偷偷摸摸咁做, 唔見得光咁, 而檔主仲依然打算繼續做

又好似中大學生報事件, involve响裏面嘅學生將有可能要負上刑事責任(講係咁講), 佢哋d家長, 無論自己立場本來係點都好, 一聽見d咁嘅消息就有理冇理, 實係幫住晒自己d仔女, 點都要撐硬編輯委員會嗰邊咁話. 眼前就見到對自己個仔不利喎....緊係啦! 你係d學生嘅父母都會咁做啦, 唔通由得佢比人charge罰錢兼開除學籍冇得畢業, 等到個仔前途盡毀累到成屋冇啖好食先嚟後悔呀

睇吓個日曆, 今日已經係公元2007年嘅5月17號喇. 你估响幾千年前寫過聖經新舊約每一卷書嘅偉人名人, 有冇諗過數千年後本書會比人利用嚟挑戰政府嘅權威呢? 有冇諗過人類會變得如此腐敗墮落呢? 如果學生報班編委&所有supporters都係痴柒綫, 咁投訴聖經內容不雅嗰班人就一定係痴撚綫, 而影視處d評審委員就係痴鳩綫

間房已經冇晒d聖經好耐, 咪比人話我收藏不雅物品, 哈哈. 講生肖運程嘅書仔應該唔會有不雅內容呱? 啱啱過咗農曆三月, 又係時候睇番有幾準喇...

農曆三月整體運程 - 上半月的工作量依然沒有減少, 但已開始漸見收成, 故本月會越忙越起勁.

財運 - 本月財運不差. 從商自僱一族, 財運自然從生意而來, 但收入穩定的上班一族, 則財運不會突然增加. 本月不妨多買一點彩票, 一測自己的財運, 說不定會帶來意外驚喜.

事業 - 勞而有功且盡力, 一分耕耘自有一分收獲, 收入與工作量皆成正比例地增加. 整體社會氣氛良好, 會對你帶來好處, 努力再加一把勁吧!

身體 - 越忙越起勁, 情況比上月更佳. 本月財運好, 金錢雖非萬能, 但也是工作的強心針, 收入多了, 精神自然為之一振, 身體亦隨之百病不侵.

雖然今次lee個月份講d嘢係幾正面, 又話有財運又話係桃花月, 但係我又覺得冇咩特別好嘢發生過喺我身上, 而且預測健康方面就真係唔準, 因為五月一開頭就病咗一場, 而對腳就繼續痛, 花錢睇過物理治療都係冇好轉, 感覺上身體狀況越嚟越差. 趁而家天氣開始熱, 真係要下決心做番多d運動, 放假要抽d時間去游水先得喇

工作方面, 比起三月嗰時做SBLA(比人壓榨人工), 收入的確係穩定咗(亦都"double"咗), 個心亦都比之前輕鬆d安樂d, 至於話"越忙越起勁"可能都係心態問題, 開工時雖然係幾忙吓做到唔停得手, 但又唔覺得lee d工作會令自己"起勁", 只可以話係緊張, 好多時仲會因為個工作環境太過"惡劣"而令自己鬱鬱不歡

不過lee個情況將會有所改變, 因為剛啱得知由聽日開始會調到去另一個新環境, 做另一種完全唔同嘅工作, 聽講個atmosphere會冇咁緊張同匆忙, 應該會幾啱我. 聽到lee個消息後都幾高興, 因為可以"暫時"離開一笪好似地獄咁嘅地方, 轉換吓環境, 唔洗再比嗰班雞"durn"唔斷嘅女人煩撚住晒!

農曆四月, 希望係一個好開始

尾數=1234

2007-05-07T22:07:00.000+08:00

同一日就出咗兩份糧. SBLA餘波未了, 4月份d"尾數", 等到今日嗰間agent終於都出埋比我, 正式係冇拖冇欠la. 實際只係返咗5日(冇請到假,冇遲到冇返少), 9日糧, 已經冇扣到bonus, 都只係得1234大元咋! 話晒都用咗我成個4月份嘅3分之1吖....唉, 以前d舊同學依家可能搵1日都唔止lee個數喇

新工第一份糧, 心情愉快, 錢都要洗多d. 份早餐難得食到咁貴 → M記豬柳蛋漢堡 $10.8 ← 呢個價錢係買一個提子包($1.7)嘅6倍幾(食得成個禮拜)! Lunch亦都"隆重其事", 32度高溫底下, 行到老遠嘅吉野家買外賣返去食(來回各9分鐘). 真係太耐冇食過吉野家, 如果唔係上禮拜有單"少年吞釘"新聞我都醒唔起. (好耐唔去幫襯其實係因為嫌佢淨係得牛肉飯,好似冇乜選擇. 可能我唔識得欣賞佢d好有特色嘅牛肉啦) 今日再食番吉野家, 已經係另一種心情/心境/風味, 亦都發現比以前多咗d菜式. 今次揀咗以前試過嘅牛肉煎雞雙拼飯餐($33), 牛肉同雞肉都好食, 飯又夠熱(煮嗰d米幾特別,好似珍珠米), 份量十足(個飯盒好大,食到好飽), 包裝又講究. 返新工以嚟, 响灣仔食過十幾間都冇乜邊次好食, 呢次就真係算係最satisfied嘅一次喇! 不過事後上番網check番先發覺有d唔抵, 原來只要加多1蚊就可以換杯凍飲, 而我就只係愛咗杯"日本茶", 但都聞到杯茶陣陣香氣, 都幾好飲

紅色禮拜天(5/6)又睇咗另一隻DVD"絕望真相, An Inconvenient Truth"(如果响HMV買要成$159咁貴). 平生好似未試過睇一套咁富有教育意義嘅電影! 如果係唔識欣賞or對環保issue冇興趣嘅人就絕對覺得佢係一部悶片, 睇睇吓瞓着覺甚至turn off都似. 睇完戲後响網上約略睇過石琪彈lee部奧斯卡得獎電影嗰篇影評, 佢又唔係冇道理, 套戲的確係太過集中喺[前美國副總統]戈爾嘅presentation嗰度, 好多災難嘅情景都只係quote咗d相片出嚟, 冇乜見到播放災難發生時嘅真實錄像同埋預兆未來會發生更驚人嘅虛構天災場面, 少咗說服力, 加上全程大部份時間都只係得戈爾喺度講嘢, 觀眾要猛咁追佢d講詞同埋show出嚟d畫面...為lee套所謂"紀錄片"打咗個好大嘅折扣. 戲裏面仲加插咗諷刺喬治布殊政府嘅內容, 諗得衰d仲以為戈爾喺度sell緊佢自己同佢所屬嘅黨派

"絕望真相" 主題係探討全球暖化問題, 以過去嘅事實同現在發生緊嘅嘢預測未來地球上嘅環境變化, 向世人警示並勸籲立即行動減少污染. 套片响今屆奧斯卡分別奪得lee兩個獎: 最佳紀錄片 & 最佳原創電影音樂. 難得有一套咁有意思嘅educational film出現喺影壇, 都幾值得睇

推銷 "延長工時,多勞多得" 嘅右翼代表薩爾科齊(Nicolas Sarkozy) 當選新一任法國總統, 你估會唔會進一步加速世界各地正在進行緊嘅 "全球化進程" 呢

無聊週六行程

2007-05-06T00:17:00.000+08:00

5月5日無聊週六行程...

搭106過海, 去番嗰間"快樂廚房"食Lunch, 多咗客人, 招呼就冇咁週到喇. 重回舊地, 返HKCL探吓d舊同事, 見吓佢哋d樣, 冇乜點變到. 係ar, 我變番做一個讀者, 鍾意做乜都得, 得閒無事走去問職員問題, 幾free ar. 上埋去8,9,10樓參觀, 比7樓嘅書庫隔住咗底下幾層顯得特別靜, 但係去到邊層都會見到d reading table比d學生霸晒嚟溫書, HKCL對於lee個"問題"真係好似束手無策咁. 發現到可以用d公眾電腦聽番d"好難聽得番"嘅舊歌, 第日諗起有咩歌想聽番, 上網mark低d資料下次再去時聽吓至得. 順便還書, serve嘅我估就係比佢block咗我xanga a/c access嘅chungoscar喎, 佢應該唔會知道我係邊個. 之前有一本書借咗都比我睇得完(好少可睇得晒一本書ga), 另一本就只抽一部份嚟睇, 兩本都係屬於"香港概覽"書籍, 講以前本地d風土民情&歷史故事. 今次又揀咗另一本同類嘅書借出館, 係講中上環"集體回憶", 05年出版ga

餘下嘅無聊週六行程...

fashion walk逛I.T, 發現X-LARGE變咗X-LAUGH @.@
搭地鐵, 都算係行程內容, 因為好耐冇搭喇.
旺角先達買screen protector (貼落部DC)
舊樓嘅樓上鋪Quiksilver, d嘢好似貴咗
毅成睇嘢, 有個backpack比我睇中咗

尋晚又食多次藥, d藥氣可以持續好耐. 個鼻已經好番好多.
search result 話比我知, 醫生開比我嘅 Chlorpheniramine 係一種抗敏感藥.
食咗冇幾耐就會好口乾同好眼瞓!

近排又有唔少趣人趣事!

容志強(吉野家吞釘少年)-見新聞時已經知個細路想呃錢, 係d傳媒唔知懵盛盛定故意玩嘢, 擺佢兩日頭條, 引吓d市民嘅注意 (踏入新聞旺季,緊係la). 個細路出到lee招都幾冇智慧, 就算係盲嘅食飯都唔會吞口釘落肚la...但又好佩服佢嘅勇氣. 講講吓, 下禮拜又想試吓食一次吉野家, 真係好耐未食過

李蘊(替便利拍濕身照)-律政司幫拖(擺明唔妥嗰間傳媒), 決定提出上訴, 兩母女呃報館錢仲未算輸喎! 同上面個細路相比, lee招就顯得有智慧得多喇

劉燿德(寄刀片恐嚇信)-年輕有為24歲青年, 被法官評為危害社會安全, 表達個人訴求行為唔正確. 我相信佢肯定能夠做到"今生無悔"

許永聰(澳門警民衝突中鳴槍5响)-向天開槍都唔係淨係响渣打馬拉松時至會見到! lee位"抽水哥"真係威到盡, 至緊要係有人撐

楊文鳳(乖女比親生亞媽燒死)-上網搵到佢dead xanga, 即刻令我聯想起賴岸青(Felix). 兩個都幾相似: 同樣係22歲死, 同樣係用xanga寫blog, 連出生日期都好接近. 但係Kate死後幾日就已經有過千嘅comment, 而跳樓自殺死嘅Felix呢, 半年以嚟累積都只係得4百幾條comment咋

混混噩噩呆呆滯滯

2007-05-03T23:10:00.000+08:00

病到混混噩噩呆呆滯滯空空虛虛四肢冇氣冇力...
禮拜三攞咗個sick leave食咗藥喺屋企瞓覺, 好似瞓極都唔夠..
之前嗰晚更加係猛咁流鼻水打乞"痴", 搞到成晚冇得瞓...

今個禮拜好似過得咁快嘅?
由28號開始: 放兩日返一日放兩日返兩日放兩日..
返埋聽日又放假咯喎!...

近排放假匿埋喺屋企睇咗唔少downloaded movie..
父子-感人真摯,大馬取景夠特別,郭富城演技好,條"o靚"唔應該攞獎.
傷城-故事荒謬,要用腦去追劇情,睇唔到梁朝偉有咩演技,好似照稿讀.
我要成名-講一個男演員歷程嘅"戲中戲",多位導演上鏡,有誠意之作.
審死官(92年)-睇番未睇過嘅星爺笑片,好無聊,但星爺確係一名出色笑匠.

而家幾乎所有紅色假期都唔會出街lu...

Avril Lavigne又出大碟喎....
聽真D 原來D歌詞裏面有好多粗口

估計頭獎基金: $70,000,000

2007-04-30T21:53:00.000+08:00

7千萬喎!! 嘩, 你話吸唔吸引呀!

講你都唔信, 返新工之後, 耳邊日日都响起d同事(又係一班師奶)講六合彩, 簡直係恨發達恨到傻撚晒, 以前返過咁多份都未試過聽到人日日講講唔厭, 唔通呢度個個都好唔甘願呢世就係咁樣捱落去...

某某同事又講得幾有道理, "買5蚊一注唔洗多, 係中就中ga la" 偏偏大部份人都係認為獎金越大, 就越應該落多d本錢買多幾張飛 or 玩多d花巧嘢, 博佢中嘅機會高d. 有d人就只係响有大額Jackpot時先至買, 平時(得嗰5百萬)唔會買, 博一中到嗰陣分多d, 唔想執輸

對於我呢, 1注獨得7千萬都係唔夠ga, 有得比我中緊係好 (真係妙想天開..)

5.1勞動節嘅意義就係一年經已過咗4個月 (亦即係3分之1), 餘下嘅07年只係淨番3分之2; 另一意義就係即將踏入夏季. 一如我所料, 返新工之後日子變得平淡, 每日都係咁嘅鐘數返工.食飯.放工, 早晚搭嗰兩班船d時間fix死晒唔會變, 每日做嘅嘢, 每日見到嘅同事...幾乎都係一模一樣, EVERYDAY THE SAME. 之前返圖書館嗰種 "Variety" 已經冇晒, 寫落blog嘅嘢都可以由每日一次濃縮到一個月一兩次. 而家最緊要係錢, 有番份"合理d"嘅收入

硬係凝住7月1號之前會再轉一次工. 機會率係一半一半啦

Happy Birthday to PaulPaul(4/29) and Alistair(4/30)

亦都預祝冰角新工作有個好開始

回顧農曆二月嘅運程

2007-04-18T00:21:00.000+08:00

啱啱過咗[艱難渡過嘅]農曆二月, 睇番本運程書仔講得準唔準先,

農曆二月整體運程 - 上半月有一點閒暇, 要好好放鬆一下; 下半月的工作量會比上一個月大, 要作好心理準備. 財運比上月還差, 一點意外之財都看不到. 尤幸本月為桃花月, 人緣較佳, 且能得到另一半的體諒, 心情較上月好.

財運 - 忙來忙去都是為他人造就機會而已. 每次快要看見收成時, 都給人捷足先登, 惟有努力用心去做, 收成有多少便算多少, 只要心中不存奢望, 日子其實並不難過.

事業 - 大舟行淺水, 多費力推移. 已盡了最大的努力, 但收獲仍未如理想. 其實事業每天都在進步, 只是短期內未見到收成而已.

照本書咁講, 似乎係有D負面, 但又真係幾準喎. 下半個月(4/3-16)係介乎於兩份工之間嘅"轉工期", 之前嗰份响復活節假期忙完之後, 只係放得嗰一日假, 跟住又迎接另一份新工咯, 又要重新適應完全唔同嘅工作環境, 面對另一批完全唔同嘅同事, 而工作上亦都做到唔停得手咁滯, 私人時間亦都明顯地少咗 (連寫blog都唔得閒寫).

財運幾乎可以話係零, 諗辦法慳D洗時, 望勻個地下都發現唔到有一毫子比我執得到! 更加不幸嘅係Black Friday嗰日放咗工之後, 我部出咗3個月嘅靚靚Sharp新手機, 唔小心比我[第1次]整跌咗落地下, 刮花咗機殼嘅一個角落位, 簡直係令人心痛...黑日子黑運氣始終逃唔過呢一劫!

依家仲係繼續努力Seek & Apply緊D新工, 當然希望係一份比一份好.
"事業"方面一定要靠自己喇, 如果唔係邊度會有佢所講嘅"收成"出現吖.

近排有幾則趣聞:
劉青雲 - 終於排隊輪到佢喇! 其實一早就應該攞咗lee個獎.
龔如心 - 最先係响黑貂個Xanga度得知佢嘅死, 冇幾耐就街知巷聞咯.
(連D女同事都猛咁喺度講, 拎佢嘅死嚟同大家開玩笑..)
李蘊 - 兩母女夾埋想呃報館D錢, 點知計劃失敗. 哈哈
大陸人落嚟用真錢買假金銀珠寶 - 海關職員唔做嘢, 掛住坐喺office度嘆冷氣

15年以嚟嘅最低月薪

2007-04-12T00:19:00.000+08:00

上個月(3月份)喺HKCL打工(SBLA)嘅糧, 嗰間agent[williams conex]終於响尋日(4/10)出咗比我喇....如我所料, 同我計算出嚟嘅結果一模一樣, (total工時129乘以basic rate $29+bonus $0.87)得$3,85x.xx, 都唔到3千9, 即係都唔及我啱啱返緊lee份新工月薪(7千8)嘅一半!

諗番起出嚟做嘢嘅日子, 月薪3字頭, 都要數番去'92年暑假時喺一間人事顧問公司度做summer job, 嗰時真係咩工作經驗都冇, 如果冇記錯都應該係我嘅第1份summer job喇. 嗰時唔知頭唔知路, 以為3千蚊(齊頭)已經係一個好大嘅數目, 自己唔值lee個價, accept到就冇出聲, 原來當時已經係比人壓低咗好多

真係估唔到, 咁多年嚟物價不斷上升, 今日卻仲係逗緊3字頭嘅人工. 但係你諗吓, 嗰時返summer job係冇煩惱, 賺幾多洗幾多吃喝玩樂用晒佢, 又唔洗養屋企, 而家幾多樣開支呢, 乜嘢皮費都貴晒....尋日接到嗰份糧, 就係我15年以嚟所賺取嘅最低月薪, 經濟真係差得咁緊要

SBLA點滴之大坑搵食

2007-04-10T22:28:00.000+08:00

民以食為天! 講到搵食, 今日First Day响灣仔返工, 跟大部份人都係一樣嗰個鐘數(1至2)放Lunch, 落地(落咗條勁多人嘅柯布連道行人天橋)之後睇見嗰種"搵食艱難"嘅慘況真係幾悲: 大小舖頭都迫滿晒人, 莫講話要搵個位坐, 連等緊位or買外賣嗰d都排晒隊企晒出門口條行人路度, 都未試過d嘢好唔好食, 見到通街都係咁已經唔開胃啦. 謝斐道,駱克道一帶都酒吧林立, 一"ja"都係鬼佬地方兼貴價西餐, 有d又騎騎呢呢嘅南亞裔風格食店...根本唔係我心水, 無目的咁蕩尼蕩去, 結果"捐"咗去譚臣道某幢大廈嘅樓上舖"搞掂"咗, 西式嘅兩餸套飯都OK好食, 但杯凍檸茶就沖得勁難飲, 水好濁, 得兩片檸檬, 冇甜味又冇酸味, 埋單48蚊, 都幾貴(跟"食過番尋味",白飯任添,凍檸茶又沖得靚嘅快樂廚房相比,lee餐真係好唔值,不過見係慶祝自己first day,食貴d都冇所謂啦). 喺店裏面見到有個女人揸住口煙, 睇睇週圍, 諗咗一陣先至為意到lee間原來係以酒吧形式經營, 獲得豁免可以比人客喺入面食煙! 政府真係...做d唔做d, 整咗個漏洞出嚟. lee間應該唔會再去

諗番起嗰陣返Kln Bay都係同一份工, 12點踏9未到放你走, 大樓有專車接載我哋去德福同淘大兩頭搵食, 除非過工業區(企業)嗰頭同人"爭飯食", 如果唔係行去附近啟業邨"冬菇亭"都唔憂冇位比你踎大排檔食到d平嘢, 你話嗰陣係幾幸福呢. 就算係前排返銅鑼灣拉記嗰陣, 唔鍾意摩頓台/信德街嗰"忽"得咁少選擇, 自己走去大坑一帶唔知幾多嘢食, 任我試任我揀, 唔同時間放Lunch又會有唔同環境, 多d變化, 特別係因為嗰頭好少人返朝九晚六嘅寫字樓工, 所以去親搵食都唔洗點迫/爭位坐/等位排隊, 而自己亦都避免行去人流多嘅渣甸街/怡和街嗰頭食Lunch, 因為都知道仲遠過大坑少少, 無謂同嗰度d人爭啦. 再諗到依家灣仔"白領族"集中地一帶嘅情況, 十零廿幾蚊嘅平嘢爭崩頭, 卅幾至50蚊嘅"貴少少貨色"都未必值....簡直係天淵之別呀

SBLA點滴之終結篇. 3月中4月頭返緊HKCL時, 鍾意一個人走去大坑浣紗街嗰頭搵食, 差唔多比我試勻晒咁滯(根據自己紀錄都有11間!), 但都起碼有成十間八間冇試到.

1. 嘴兒甜 -
　　第1次去, 豉椒排骨盅頭飯,普洱茶一壺 $19 (3/15)
　　第2次去, 豉椒排骨盅頭飯,雞扎一籠(點心),普洱茶一壺 $29 (4/8)
2. 快樂廚房 -
　　第1次去, 秘製叉燒拉麵 $25 (3/16)
　　第2次去, 快樂飯(豬扒/腸仔/雞翼/煎蛋/白菜),凍檸茶 $40 (3/31)
　　第3次去, 紅燒豬扒飯,凍檸茶 $33 (4/3)
　　第4次去, 快樂飯(豬扒/腸仔/雞翼/煎蛋/白菜),凍檸茶 $40 (4/7)
3. 鄭記潮州食家 - 牛腩牛肚雙拼麵 $21 (3/17)
4. 橫山日本料理 -
　　第1次去, 蒲燒鰻魚飯 $35+貼士$1 (3/18)
　　第2次去, 鰻魚飯 $68("晚餐"貴成倍!但份量一樣)+鹽燒冬菇串 $20 (4/4)
5. 大坑美食(家庭式餸菜任揀碟頭飯) -
　　第1次去, 4樣餸碟頭飯 $22+貼士$2 (3/21)
　　第2次去, 6樣餸,中湯(外賣飯盒) $26 (3/30)
6. 和發燒味茶餐廳 - 燒鵝拼油雞瀨粉,熱檸茶 $22 (3/23)
7. 順興(後巷大排檔) - 醬爆豬頸肉飯,送1個"怪湯" $23 (3/24)
8. 旺記小廚 - 瑞士雞翼飯,凍豆漿 $22 (3/25)
9. 家記茶餐廳 - 豉椒排骨飯 $26 (3/27)
10. 祥勝茶餐廳 - 祥勝百搭飯(豬扒/餐肉/腸仔/煎蛋/菜心),熱檸茶 $23 (3/28)
11. 小白屋 - 鮮茄煎魚柳飯,凍檸茶 $33 (4/1)

上面咁多間之中, 最滿意嘅都算係快樂廚房喇, 總共去咗4次咁多! 諗住第時搵日專登去嗰度再幫趁過, 順便回味吓做SBLA時嘅一段日子都好吖. 至於嗰間一路都冇諗住去食嘅貴嘢"浣紗廚房", 同埋有一間經常有人响門口等位嘅"火車頭越南餐室", 只有印象存留喺心中, 第日會唔會專程走入去嗰頭一試就要講緣份喇

SBLA點滴之第一次

2007-04-09T23:49:00.000+08:00

Monday Off, 紅色假期唔關事 -- 唔係玩ga, 本來如果我嗰個位唔係放一.四嘅話就要返工嘅(更表唔係睇紅色or黑色嘅), 只不過咁"橋"禮拜一係off至唔洗返. (真係好彩, 如果唔係又做死人) 過咗今晚之後, 就正式過埋一個月通知期喇

我都feel到, 返lee類服務行業, 好多都好唔鍾意見到日曆上嘅紅色數字(同一般上班族完全相反), 而且仲要係一連5日添, 簡直係得人驚, 見到都唔開胃! 一嚟 d人個個放假搵嘢娛樂, 搞到勁多嘢做; 二嚟遇啱月頭d人啱啱出糧勁洗錢買嘢, 零售.飲食.娛樂等嘅行業實係最忙, 大把人要招呼; 再嚟 d銀行係放紅日, 遇啱月頭係咁"見紅"就一路都冇糧出, 唔知要等到幾時....總之就係: 越多紅日越攞命

但係由聽日(4/10)開始, 對我嚟講, 情況就會完全改寫

今日係我慶祝"轉工"嘅日子, 去咗九龍城食番餐好嘅, 喺附近求其搵間Salon剪埋個頭, 跟住又返黃埔買咗d零食, 又叫老媽子今晚餐飯準備d好餸....整日食咗好多好嘢, 之後就要諗吓返新工要預備嘅嘢, 同埋都要收拾心情喇. 我感覺得到, 之後嘅生活又會趨於平淡, 每日返同樣鐘數, 食飯又會跟大多數人同一時間食...唔會好似返圖書館時有咁大變化, 每日嘅時間表亦都會穩定落嚟

SBLA點滴之3. 由於lee份工嘅工作性質同內容, 都同我之前做開嘅工好唔同, 所以初時返lee份工真係好唔慣&好唔適應, 同時亦造就咗好多嘅"第一次", 有d都幾值得回味ga:

1. 第一次-誤墮求職陷阱
2. 第一次-打一份外判工
3. 第一次-返輪更制嘅工作
4. 第一次-復活節假期返工
5. 第一次-開工時要穿着制服
6. 第一次-返一份以服務性質為主嘅工
7. 第一次-喺工作入面要接觸好多唔識嘅人
8. 第一次-返一份"長時間冇得坐喺度做嘢"嘅工
9. 第一次-返一份逢禮拜六日要返工,平日有假放嘅工
10. 第一次-開工時比人用粗口問候 (仲要係同事) (仲要係女仔)

有d嘢係一生人唔試過就永遠都唔會知, lee份工比到我有d從未經歷過嘅特別體驗, 正所謂"百般滋味在心頭". 只不過係1個月零8日, 就當係中途嘅一段短暫旅程, 從此以後就成為自己將來嘅回憶喇

下一站-灣仔

終於都嚟到 Last Day

2007-04-08T21:56:00.000+08:00

終於都 Last Day 正式"甩身"! 一出番嚟好興奮好釋放, 好似中咗大獎贏好多錢咁, 哈哈哈

雖然lee份工只係維持咗1個月零8日咁"短暫", 但係感覺上真係好漫長. 由我交咗份resign form(3月9號)嗰日開始, 等足1個月先走得(仲講到明唔比請假), 十足十係比人綁住咁嘅feel. 之前返過嘅所有工, 都未試過好似lee份咁比人綁法, 諗起就痛苦

復活節唔關我事.

禮拜日back to normal schedule(10至9), distinct from其他收7點嗰幾日紅假, Cm同事話諗極都諗唔明, 點解個安排會係咁. 我就諗得明呢! 因為圖書館係屬於"政府嘢"(康文署), 法定假期之中嘅禮拜日還禮拜日, 公眾假期還公眾假期, 兩樣嘢係分開嘅, 所以如果係禮拜日就跟番原本禮拜日嘅"正常"schedule, 公眾假期就會由各間圖書館自行安排番特別schedule. 你估lee行係零售業, 好似人哋咁有彈性? 政府做嘢經常都係唔識得變通ga la

今日先後請咗Rn同事&Sn同事食朱古力. 另外亦都將一盒仔薄片裝嘅朱古力"鬼鬼鼠鼠"咁擺咗喺LO枱頭, 當係送比所有YA同事嘅小小心意, 多謝咁多位教過我做嘢嘅同事

Last Day 臨走嘅一日, 感覺"淡淡的", 冇乜情誼, 冇嘢好留戀, 冇人會特別重視我嘅走, 當然更唔會有所謂"farewell". 所有嘅其他YA同事, 今日都係最後一次見: Rn同事-逢紅色假期先會見到佢返工, 平日應該係full-time做嘢或讀書, 個人幾開朗幾得意, 雖然一個禮拜只係見一次, 但都算係有幾句傾吓. Sn同事-只係嗰日同佢响"小白屋"餐廳食過一次飯, 第一次亦都係最後一次, 大家工作崗位唔同, 但同佢都幾多嘢傾, 可惜, 開始熟熟哋嘅時候, 亦都係我要走嘅時候嘞. J同事-沉默寡言, 除咗工作上嘅簡單對答之外, 同佢之間係完全冇嘢傾嘅. C同事-隔咗成個禮拜後先再見番佢, feel到佢今日心情明顯比鬧我嗰晚嘅好, 不過我都盡量同佢少說話, 費事再惹到佢, 臨走嗰刻亦冇特別搵佢講番一兩句. 至於NCSCLA(非公務員合約制-圖書館助理員), Cm同事&Y同事, 同已經"見完最後一次"嘅K同事&Cr同事一樣, 都係"淡淡的", 冇特別同佢哋傾好多計, 比起SB同事更少同佢哋講我嘅事, 講嘅嘢絕大部份都係工作上需要

Shift duty本身嘅特質(日日返工放工唔同時間,食Lunch又唔同時間-原來佢哋係叫meal break,平日放假,週末返工), 再加上工作性質, 形式, 內容....可以比到我返lee份工一種唔悶嘅感覺, 亦都唔會喺工作時間瞌眼瞓(可以話環境唔容許), 所以我可以keep到大部份時間都好精神同專心喺lee份工作裏面. 份工嘅lee d好處, 係我响過往做過嘅咁多份工之中搵唔到, 亦係未試過嘅

而家諗番起2月尾返過嗰份(喺工廠區度做)data entry嘅時薪job, 同樣係28蚊個鐘, 如果得番lee兩份工叫我揀, 我都係會揀番做SBLA, 因為嗰份data entry好似入咗去監獄咁, 要你坐喺度對住部電腦"做機械人"打嘢打足一日, 唔洗飲水唔洗去廁所, 實在難捱. 做SBLA係就係成日要企, 仲要用好多體力(搬書/上書/分書), 不過所接觸嘅人&事都會多d, 有機會同d唔識嘅人(讀者)接觸, 再加上輪更制本身有佢嘅好處, 點都唔會好似嗰份data entry咁單調&枯燥無味. 只係我認為lee份工(SBLA)會比較適合d 16至廿幾歲, 缺乏工作經驗/本身有讀緊書或諗住繼續讀書/暑期工/暫時唔洗養屋企...嘅年青人去做, 否則, 如果係諗住收入穩定/本身有好多開支/有番咁上下工作經驗, 咁lee份"段鐘計"得嗰雞碎咁多嘅外判工就真係制唔過喇, 好似我咁只會覺得賺咗都唔夠補, 吃力不討好

放咗工即刻搭車過去間agent[williams conex]响中環嘅新office(搬咗之後第一次去,地方果然係大咗,有錢咗), 搞埋d手尾, 跟住就正式結束我同lee間agent之間嘅關係. So ridiculous, 返完個last day, 正式離職嘅最後一刻, 先嚟簽番份employment contract...因為間agent前嗰排renew過份合約, 又話初時簽嗰兩份依家要收番, combine埋一份, 統一番個計法....總之就之前簽咗嗰份作廢, 追溯番去3月1號用新嘅rate嚟計番, 真係任佢點改都得. 見我嗰個女人仲問我"點解唔做嘅, 依家改咗29蚊多過之前喎", 我答番佢話"唔關嗰個rate嘅事,係份約d條件唔適合我", 都費事嘥口水講咁多, 有d嘢係大家都知, 心裏面明白晒, 唔洗講出口呱

In conclusion, 用4個字嚟形容lee份工: 浪費人生

SBLA點滴之辭職原因

2007-04-08T21:28:00.000+08:00

SBLA點滴之2. 嗰日填完張resignation form fax咗比嗰間agent, 隔咗幾日嗰邊有位S小組打嚟話我寫嘅辭職理由(reason of resignation)唔夠清楚, 响電話度要求我講番清楚d. 咁事實上我又的確係隨便寫咗兩個理由落去("not suitable, no prospects")咁就算數, 我覺得已經代表到我想講嘅嘢, 寫d字亦都好清楚好清晰, 可以交得貨. 張form上面得嗰一行比我寫, 都冇理由叫我作篇文上去掛? (如果叫我寫詳細d個辭職理由係冇問題嘅,我都可以諗到一卷廁紙咁長嘅嘢寫到出嚟)

之後我就逐一諗起, 可以寫落去"辭職原因"嗰一欄嘅文字有以下lee d:

1. feel like being cheated (感覺受騙)
2. hourly-rate salary not my preference (時薪制唔適合)
3. inconvenient transportation (交通不便)
4. expensive transportation fee (車費昂貴)
5. low salary (低人工)
6. not suitable (唔適合)
7. no prospects (冇前途)
8. personal reasons (私人理由)
9. shift duties not my preference (唔想返輪班制)
10. too many unreasonable restrictions (太多唔合理嘅限制)
11. dislike working under a contractor company (唔鍾意受聘於一間外判公司)

繼續都仲可以諗到好多出嚟....但係, 有必要咩? 有d嘢係唔洗畫公仔畫到出腸

SBLA點滴之無理條款&不良待遇

2007-04-07T22:57:00.000+08:00

佩服M同事, 因為我睇到自己並唔係做得好差, 反而比唔少新舊SB同事更加能幹, 更有一份熱誠, 去比service比讀者. 有時可以諗得出各種嘅形容詞去批評M同事: 唔上心(抄agent-S小姐講嘅), 散漫, 冇責任感, 漫不經心, 心不在焉, 唔知頭唔知路....

又話說今朝M同事唔見人, 唔知佢唔記得今朝返10點(因特別假期,拉記改收早,返晏嘅同事受影响), 記錯定點, 等到10點幾鐘, L終於急call"刮"人, 勢估唔到L打出去嘅電話唔係直接搵M同事, 而係打番去間agent[williams conex]叫嗰邊search佢嘅"行蹤"! 你睇吓, 外判工嘅運作就係咁. 嗰次已經提到, d大粒(L,AL)有乜嘢嘢唔滿意我哋, 唔係直接搵我哋傾or經LO話番比我哋知, 而係間接咁"鬼鬼鼠鼠"through agent嗰邊然後先transmit番個[可能已經歪曲咗嘅]message過嚟!

所以, 做緊SBLA就唔好咁天真同人講話自己打緊份政府工(有唔少人仲以為係), 老細係LCSD或HKCL呀, 你真正嘅老細係嗰間agent先啱呀, 你係幫緊嗰間agent打工, 幫緊佢哋"賺錢", 出糧比你嘅亦都係嗰間agent ga

除咗臨放工前吩咐佢"拍埋d架"嘅M同事之外, 另一位S同事亦都係最後一日見. 臨走前都係講嗰d嘢囉, 大家都要繼續努力, 大家咁話啦. 我覺得S同事嘅工作能力絕對喺我之上, 可能只係會考成績同工作經驗方面唔及得我. 佢都幾做得嘢, 嚟lee度做比間agent食咗幾千蚊人工, 做極都係賺得雞碎咁多, 真係嘥咗

時日無多, 做埋聽日就甩身! 都係時候將lee一個月多d, 累積出嚟嘅SBLA工作點點滴滴, 好好整理一吓貼喺lee樹, 作為自己日後嘅回憶, 亦都作為一種借鑑啦

SBLA = Service Bureau Library Assistant
中文名講得好聽d/正經d, 叫做圖書館助理員(服務社)
講得冇咁好聽/俗d, 就叫做外判圖書館助理員或圖書館外判工

SBLA點滴之無理條款&不良待遇

1. 請病假要預早3粒鐘通知
2. 請病假唔會有人工(有薪假)或任何津貼
3. 請事假要預早7日通知
4. 由第一日返工開始, 如果要resign就要有一個月離職通知期
5. 離職通知期內請事假當曠工, 要倒貼賠錢
6. 離職通知期內提早結束(e.g.搵到另一份工), 要倒貼足餘下日數嘅人工(賠錢)
7. 勤工獎, 表現獎等bonus限制多多, 加埋都只係得$3.36/hr
8. 請一日病假或遲到任何一次, 已經冇晒成個月嘅所謂"勤工獎"($2.52/hr; 一個月當大約做166個鐘相當於$418)
9. 頭3日(正式返工之前)嘅training course冇錢比番, 冇任何津貼(當做義工), 除非做滿3個月, 先攞得番嗰500蚊
10. 返額外嘅backup shift都只係得$33/hr, 比起攞足3樣bonus嘅normal shift($32.2)只係多8毫子
11. 禮拜日或公眾假期返工一樣照"正更"咁計法($28/hr), 唔會有額外工資
12. 當一個月返足大約166個鐘, 唔計額外嘅所謂bonus, 基本月薪只係得4千6
13. 簽咗約返咗工之後, 份約嘅內容(esp.人工嘅rate)可以隨得佢哋點改都得

鍾意我鍾意嘅人所鍾意嘅人

2007-04-07T00:32:00.000+08:00

匿喺間房度, 一個人對住個芒睇"免費"DVD電影, 就係我由今年開始每逢放假嘅最主要娛樂(節目). 今日Good Friday係休館日[全人類]唔洗返工, 早就入定晒貨(睇戲零食)上網搵埋影片介紹等睇戲

晏晝急不及待咁睇咗"現在,只想愛你"(又作:只是愛着你/Heavenly Forest), 係一部好新嘅日本片, 台灣都係上個月先上映, 而香港更加係未上映(or唔知會唔會上). 原來有一樣片種/類型係叫做"純愛", 我而家先知. 我估大概係"單純愛情", "純真初戀"咁嘅意思. 如果唔係睇過d介紹, 都唔知我原來好耐之前曾經睇過玉木宏(飾演誠人)嘅演出, 嗰陣時係同教會d人一齊睇, 對(Waterboys/水男孩/五個撲水的少年)戲裏面嗰d男角冇乜印象, 更加唔知道邊個打邊個, 所以嚴格嚟講, 今次[佢飾演男主角]先係第1次正式睇佢嘅演出

未睇之前又係唔知乜水嘅宮崎葵(飾演靜流), 佢所扮演一個發育遲緩, 患有遺傳病(結果不幸早逝)嘅天真可愛傻女子, 真係演繹得維肖維妙, 簡直係藝能界之中嘅奇才. 全片就係由lee兩位非常之單純而各自有奇特性格怪癖嘅男女主角譜出一段感人嘅愛情故事. 個傻女子知道誠人另有心儀對象-美雪, 為咗要鍾意誠人嘅一切, 所以佢都"鍾意"埋美雪, 仲向誠人彈咗一句[全片好正嘅說話]: 鍾意我鍾意嘅人所鍾意嘅人! 搞到個腦轉得比一般人慢嘅誠人聽到都呆咗, 你話幾搞嘢呢. (顯出呢段劇本又幾有心思) 睇到近尾聲講誠人喺美國參觀靜流嘅攝影作品展時, 令我感動到幾乎又流咗眼淚...結果誠人就成為咗靜流一生中唯一嘅愛. 睇lee類型嘅戲, 我係特別有feel. 聽講故事係由一本暢銷小說改編而成. 保留一份copy諗住第日又攞番出嚟睇都好

睇完lee套戲之後, 仲比我認識到"大寵愛"(大塚愛)lee位日本當紅女歌手, 因為佢唱出lee套戲嘅主題曲"戀愛素描". 同時D/L晒佢嘅"愛 am best"專輯同埋"現在,只想愛你"嘅OST, 感覺上好豐富, 都要d時間仔細欣賞消化吓

誠人參觀攝影作品展嗰一幕, 令我諗起尋日同H君一齊去文化博物館睇過嗰個叫做"相裡.鏡外"嘅本地攝影藝術作品展覽. 裏面都有d攝影作品係好耐年代之前(大部份係黑白相), 令我睇到有d感慨同埋留下深刻印象. 不過最大煞風景嘅係, d大人帶埋晒d唔識得欣賞藝術嘅細路入去, 加上有d人講嘢傾計都講到好大聲, 喺度嘈喧巴閉搞到成個街市咁, 破壞晒lee個展覽應有嘅寧靜氣氛

終於都斷斷續續咁服完晒一盒30片嘅"氣血通", 發覺食同唔食都係冇乜分別, 對腳嘅"頑痛"依然隱隱作痛, 一路都冇好過. 我比個廣告呃咗, 嘥咗4舊水

呢兩日食咗好多朱古力(有原粒果仁嗰隻), 好好味&&好enjoy, 真係食多d朱古力令自己滿足d快樂d好過

兩日假期又結束, 只係淨番兩日就正式同SBLA講"Sayonara", 諗起都happy. 我買定咗一盒仔薄片裝朱古力, 諗住last day臨走嗰刻擺响LO枱頭, 作為送比[同過我一齊做嘢嘅]所有同事嘅一份小小心意

清明節睇展覽

2007-04-05T22:16:00.000+08:00

清明節嘅節目, 就係約咗舊同事H君去沙田嗰間"香港文化博物館"度睇展覽, 睇咗成個晏晝. lee間館一來未去過, 想睇吓間館係點嘅樣, 二來又好耐&好少去睇lee d展覽, 所以趁今日day off約埋有少少志同道合嘅H君一齊去睇睇, 消磨吓時間. H君同我各自花咗10蚊(入場費), 睇完出嚟時佢話幾滿足. 佢緊係, 咁孤寒, 唔洗比好多錢都可以娛樂就最啱佢, 仲要係一次過睇咗6個唔同主題嘅展覽, 真係大飽眼福

日間15至17度, 都唔夠半夜咁凍, 喺屋企要着晒兩件羽絨先夠暖. 本來(近兩年)都係差唔多呢個時候收起張電氈, 執d羽絨,大褸,冷衫攞去洗, 但係今年就要"tun"遲d喇. 雖然仲有恰恰好一個月就到夏天, 但係d冬天衫都唔可以咁早收埋住, 幫衣櫃換季嘅節奏唔可以太快, 因為今個夏天可能都仲要着羽絨或者夾綿大褸ga

兒童節嘅祝福

2007-04-05T00:45:00.000+08:00

4/4兒童節, 雖然唔係紅色假期, 但係拉記明顯比平時嘅閒日多好多人. 緊係啦, d中小學生放晒假喇! d漫畫書寧舍搶手, d叮噹書一早比人"立"晒, 就連冇咁受歡迎嘅老夫子都幾乎"吉"咗一格書架仔! 呢d日子正式係細路仔嘅世界, 大人冇份! 好在今日都唔會好似禮拜日咁忙碌(d書上極都有,點心車出出入入), 係忙都忙住要去理埋晒嗰d reading table d濕碎嘢

如無意外, 今日亦都係我返lee份工最後見到LO同埋R同事嘅日子. 由始至終都覺得LO個人係好nice, 同佢溝通相處好舒服, 就算SB同事有做得唔啱嘅地方, 佢都會好有耐性好客氣嘅態度話番比我(哋)知應該點, 唔會隨便比面色人睇(乍型)或責備人. 出咗嚟做嘢之後, 好難得可以遇到好似呢個LO咁好相語嘅人做我super

至於R同事, 佢搭"Lip"走時仲係見佢個樣吽吓吽吓, 可能佢個樣生成就係咁, 或者佢已經習慣咗喺人前面嘅表情就係咁. 我今日亦都將我搵到工嘅好消息講咗比佢知. 我比咗兒童節嘅幾串祝福佢, 叫佢要把握機會, 人望高處, 唔好原地踏步, 為前途為將來努力 -- 呢d說話唔係都係同自己講咩

早餐同午餐都食得好貴, 好似大肆慶祝{自己就嚟走&下禮拜返新工&加一倍人工}咁款. 逢禮拜四off加上禮拜五休館日, 少有地有得放相連兩日嘅假期. 諗起唔少服務行業打工仔都要喺長假期開工服務市民(暫時自己都係), 而且响嚟緊幾日比平時更加忙碌, 對於佢哋嘅努力真係心存感謝讚美. 假如呢個世上冇人願意做呢d工作(响"假期"返工), 咁d"正常上班族"放假都冇人嚟serve都好冇癮. 希望玩嘅食嘅買嘢嘅又開心, 做嘅亦都開心&樂意付出

花戀, 今年我只係會向您一個人講呢句祝福說話 -- 復活節快樂

match 到應嘅 "巧合"

2007-04-04T01:36:00.000+08:00

凍咗好多, 得番13至16度. 出街都要着番保暖內衣+夾綿大褸先得喇.

第1次落Sogo Freshmart間Donq麵包店度買麵包當"早餐"食, 真係好有特色兼好好食, 不過亦都好貴.

返到office冇耐, 就接到個冇來電顯示嘅call. 聽完lee個電話之後, 令我今日全日嘅心情都變得好愉快: 之前(14號)in咗嗰份工, (31號)收完封one year waiting list通知信之後, 估唔到隔幾日就接到電話通知, 叫我10號(下禮拜二)去灣仔返工!! 咁啱得咁橋, lee日就係我做完SBLA正式離職(9號)之後嘅第1日 - lee頭完咗份工, 嗰頭就有得返新工. lee個真係一個match到應嘅"巧合"....Bingo! 證明我响3月9號專登返去Fill & Fax張Resignation Form比嗰間agent[williams conex], 決定辭職一事係絕對正確, 而且係非常之準確添. 本來, 我都以為到時又會再restart另一個long vacation, 但係咁樣落去始終都唔係好事

我好興奮咁分別同M同事, S同事講, 已經搵到工, 仲強調人工係lee度嘅double添. (3千9都冇 → 7千8) 其實dub乜鬼ble吖(呃自己,氹自己開心), 只不過係因為另一半嘅4千蚊比間agent食咗(本來做full-time嘅library assistant就應該有7,8千咁嘅價錢), 而家上番7千8咪都係返番去2003年7月做同一份工時所逗嘅人工, 一模一樣冇變過. 錢方面, 可以暫時鬆一口氣. lee刻我認為應該"人望高處", 對lee d嘢, 對自己唔可以永遠都係咁(冇乜要求), 否則又係繼續原地踏步. 點都希望有得in埋嗰份3+3政府工, 期待任何嘅"中獎"機會. 入職有成萬銀喎, 又係另一個級數喇

發覺[同我一齊入職嘅]M同事真係做嘢唔知頭唔知路, 做d咩都好求其, feel到佢對於lee份工冇乜責任感&不認真(我本身都覺得自己唔夠,但確實係有人差得過我). 好少可會得我同佢 lee兩個同樣係"新手"嘅SB一齊收館. M同事7點9仲喺度行行企企(當時我已經拍緊架), 8點幾仲喺度上嗰車書...如果換轉好似嗰晚咁, 收館又係得C同事同我, 唔知C同事見到我做出以上"行為"又會唔會喺度鬧鬧貢呢? 我越諗越覺得嗰晚無端端比人鬧好唔值, 終於今晚忍唔住要同LO講番嗰晚C同事向我發脾氣&講粗口鬧我嘅事. (好似唔講就一路都唔舒服,好受委屈咁) 而家講咗個心安樂晒

淨番3日咋, 就要告別lee份shift duty服務讀者嘅工作, 又要返番"正常"鐘數做番個"正常人"喇, 好好enjoy埋lee 3日喇

雷聲一响, 雨季來臨

2007-04-03T00:14:00.000+08:00

預計唔到天氣變化得咁急, 12點半着咗hot summer look出街先發覺涼咗同大風咗, 原來過中午之後, 氣溫由廿六七度驟降到得番廿一度! 晏晝去自己個倉執嘢時, 順便搵番唯一放喺裏面嘅一件薄絨褸, 着住走人先安心.

Monday Off. Lunch又係約咗舊同事H君, 未試過崇潔街巷仔嗰間"加太賀", 今日終於有機會去嗰度食, 唔周圍行吓都唔知原來分開ABCDE咁多度, 經營"範圍"係咁大. 叫咗個海鮮拉麵($29)都OK, 略嫌d餸唔夠, 而繁忙時間人客多, 招呼不週. 本來H君仲諗住搵埋同佢一齊做嘢d同事一齊食, 好彩結果都係分開各自去搵食. 我就話佢, 約咗我就緊係最好淨係同我一個食, 拉埋d我唔識得嘅人一齊, 咪盞你哋有你哋傾, 我又搭唔到嘴, 搞到悶親我&令我尷尬就唔好啦. (曾經有一次約過行山識得嘅J君响佢工作嘅地方附近食Lunch,情況就係咁,的確係令我幾唔舒服同尷尬)

食食吓Lunch期間又收到agent[williams conex]嗰邊Y小姐嘅電話, 佢話要"收番backup(替更)嗰份contract", "統一番salary嘅計法", basic salary由$28/hr改做$29/hr, backup shift salary由$33/hr轉番做basic salary嘅$29/hr, 追溯番3月1號個日子開始計. 嘩, 咁都得, 簽咗份約可以隨時任佢改! 好彩我由始至終都冇返過任何backup shift, 計落條數係"着數咗", 慶幸自己拒絕返backup嘅決定係正確(有假都唔放,蝕底係自己). 佢仲話加埋3個bonus有$33.35/hr, 我心諗嘥氣, 有兩隻bonus已經not applicable to me, 淨番隻performance bonus($0.87/hr) 都唔知算係施捨比我定乜, 根本呢d所謂bonus原本就應該無條件計埋落份人工度. 我諗我而家只可以做嘅係等份工完結, 我唔想再比間agent當玩具咁操控

前排一連四日咬到嘴唇, 搞到生咗一粒呈蝴蝶形狀嘅巨形飛滋, 真係勁痛, 就算瞓緊覺時都隱隱約約咁Feel到, 掂到d酸嘢鹹嘢就痛到連眼水都標埋出嚟! 照鏡見到粒飛滋中間個窿好深, 我諗都要差唔多成個月先好得番ga喇

跟住行程係去咗九龍城獅子石道執平貨. 買完嘢出嚟時已經落緊好大雨, 係傾盆大雨! 晏晝3點幾烏天黑地, 等緊過馬路時聽到雷聲一大响, 仲大聲過燒炮仗! 呢一吓巨响就象徵住今年雨季正式來臨, 屋企間房又要隨時出現水浸喇...

今晚無意中睇咗RTHK製作嘅電視節目"鏗鏘集", 講嗰d夾band嘅地下樂隊如何生存. 睇睇吓見到有King Ly Chee都幾出奇, 之後竟然仲見到以前喺教會識得嘅江威同小強上咗電視! 佢哋真係大個咗. 香港係文化沙漠, 好多嘢都係"做"出嚟. 就連屹立咗49年嘅天星碼頭都冇人保得佢住, 政府又點會無端端走去理你哋lee班"band仔"呢? 喺香港夾band真係搵唔到食

1號喇...淨番4個工作天

2007-04-01T22:16:00.000+08:00

愚人節4月1號喇...繼續倒數, 日子已經firm晒, 只係淨番4個工作天!

返咗拉記啱啱好1個月(計埋training), 發覺返工時最難搭車嘅日子係禮拜日. 由我屋企去到HKCL, 有得比我揀嘅隧巴只得106同116. 今日就揀咗班次"應該密少少"嘅116, 點知架車一嚟到幾乎上唔到車, 塞到爆晒就嚟企到去上車嘅前門. 九巴同新巴d服務不嬲都係好差, 尤其是朝早9點lee d繁忙時間, 條路又冇乜車, 都唔荒開多一兩班疏導吓d乘客, 嗰d菲傭印傭個個禮拜日要過海去銅鑼灣, 成棚人好似參加嘉年華會咁, 霸咗成大半部巴士嘅座位企位, lee兩間巴士公司都可以視若無睹! (你話如果上唔到嗰班車又要等下一架都唔知要等到幾時) 就算係平日返12點幾嗰個鐘數, 情況都唔荒好得去邊, 106成廿幾分鐘先開一班, 但就竟然比我發現巴士公司派咗d吉車去紅隧收費廣場嗰度載客, 忽略咗喺紅磡lee邊等車上車嘅乘客...通常呢兩種鐘數都要預早成個鐘頭出門口, 否則都好難保證準時返到去, 遇啱蕪湖街塞車就大劑嘞. 反而有陣時禮拜五,六返早(9:30am), 8點"踏十"出門口都趕得切, 比起其他鐘數易搭車d

27度, 繼續暖. 第1日開工係着短袖衫.

Lunch食12至1, 今次竟然有人陪, 係做CT位(聽講即係computer technician,我都唔sure)嘅Sn同事(因已經有個S同事,所以呢個就叫做Sn). 我提議話去大坑嗰頭食, 原來佢都未去過嗰頭, 咪拉埋佢一齊食, 順便帶佢去見識吓囉. 嚟到亦都係第1次幫趁嘅"小白屋"(Cherry Garden) (之前已經好想入去試,只係冇啱食嘅set/時間又唔夾,今次有個伴唔洗一條友食就啱晒), 格調係食西餐, 是日Lunch Set有3款, 我揀咗鮮茄煎魚柳跟飯+凍檸茶 $33, 而Sn同事就叫咗唔知咩"厚豬扒"配黑椒汁跟飯+凍檸水 $43(唔收10%). 其實呢個價錢喺嗰頭嚟講都係算貴喇. 入面d裝修都好新淨, 冷氣開到好"衡", 招呼亦都唔錯. (咁又值番個價) 不過事後我又覺得唔係幾值, 可能d魚柳整得唔及我想像之中咁"好睇"nor"好食", 同埋d飯唔夠多, (返番拉記要做好多體力勞動嘅嘢ga) 都未到5,6點個肚已經喺度打鼓話比自己知食得唔夠飽!

In fact 我係大過Sn同事好多, 我仲故意講比佢聽我玩咗電腦有成廿年, 但係大家一路都有好多嘢傾, 雖然一定係有Gap, 都唔會好似同M同事一齊食飯咁difficult to communicate. 當Sn同事講比我聽, 佢嘅人工有成38蚊1個鐘, 而且體力勞動嘅嘢絕對係比我少....尤如生肖運程書上所講嘅一句, "越做越不是味兒", 就係當我知道咗[Sn同事人工比我多35.7%]呢個fact嘅第一感覺

發覺lee度做嘢d人都幾怪, 無論係同grade嘅SB同事, 上司級嘅NCSCLA,LO,AL,L, 佢哋都當你一嚟到就乜都識, 唔洗人教, 好似萬能俠咁. 嗰晚先有一單係由C同事引起, 搞到出嚟做嘢以嚟第1次比人用粗口鬧....今朝, 睇落高級過我嘅Cr同事(又係英文名C字頭,所以改叫Cr) (佢係NCSCLA,要着晒成套制服開工嘅) 又好唔客氣咁喺度話我"你擠喺度比我做咩", "乜你唔識得自己劃嘅咩", "有個Y字嘅咪high-light咗佢囉" (事緣係响部Fax機度收到一叠"遲嚟"嘅Hold書List,通常返早更嗰兩個SB同事, 要喺開工冇幾耐就負責搵呢d"Hold書",但係今朝部Fax機冇紙而又有人唔識整,搞到呢份List遲咗出現) 查實我都係今日先知原來嗰d Hold書List係响sorting room嗰部Fax機度出嚟嘅. Cr同事喺度話我嗰陣, 我都唔知點應番佢好. 心諗, 嗰d嘢你教咗我一次之後, 我自己就緊係會知道點做, 唔洗人叫都自動自覺做ga啦! 問題係你教都冇教過(未學)就當我識晒咁, 跟住見到我"唔係路"咁又喺度嘈....又係另一個無理取鬧

之後都仲嚟....又係朝早, 有讀者request要預約嗰d computer workstation, 當時L(館長)都喺counter, 佢就"yap"隻手叫[patrol緊嘅]我埋嚟, 比booking嗰塊板叫我同個讀者做登記. 呢吓又比佢考起嘞, 都冇人教過我點同d讀者做電腦booking...好在我第一反應唔係同L直接講話"我冇學過"或"唔識", 咁橋又比我遇到啱啱12點鐘返工嘅S同事(做咗我救星), 即時交帶比佢幫我搞掂咗. (會唔會係因為佢哋知道咗我就嚟走,所以乜鬼都唔教我呢) 其實仲有嗰d自助借書機, L今朝同我哋briefing嗰時都提醒我哋要主動d教d讀者點用. 我嚟lee度之前都未用過嗰d機, 我自己都係喺教人嗰陣時同個讀者一齊"摸摸吓"先至識點用咋.

唔知係咪因為"咁", 我feel到上頭對我都少咗d信心, 近日少咗編我去做patrol嗰d time-slot, 而今日竟然有成5,6個鐘都係做上書(shelving), 遇啱禮拜日個個走嚟搞亂晒d書, d書好似上極都上唔完咁, 真係攞命......唉. 算啦, 就當係懲罰自己當初做錯咗lee個決定, 就當係....總之今日有咩衰嘢, 可以乜都賴晒愚人節

另一個4月1日又係諗起..

2007-04-01T02:10:00.000+08:00

又嚟到另一個4月1日...好多人都諗起愚人節. 我就依然都係只會諗起張國榮, 同埋...抑鬱症

話咁快又過咗4分之1喇

2007-04-01T01:09:00.000+08:00

極漫長嘅3月終於都捱過咗喇! Congratulations to myself... 但係都完全唔覺得跟住就會享受到自己努力嘅成果(i.e. 一份豐厚嘅回報), 唯一嘅安慰就係, 接住落嚟淨番嗰8日, 只要再返多5日就正式"甩身". 最終R同事都冇同我掉更, 而本來想我返backup shift做替更嘅C同事更加係唔想再同我講任何嘢, 不瞅不睬

事實上, 大家因為更期關係, 一個禮拜最多只係見每位同事3次度(包括SBLA,NCSCLA), 就算做得耐過我嗰d, 同同事之間嘅關係都好似好疏離咁, 唔啱傾就更加冇嘢好溝通(除咗工作上). 何況佢哋都知道咗我resign就嚟走, 只係同佢哋做得嗰一個月同事, 所以都無謂建立d咩嘢關係, 連電話都冇同人交換過. 喺大家心目中, 我只不過係一名"過客",响度逗留完畢就離開, 結束我人生之中一個短暫嘅旅程

可能轉月份多咗嘢做, 例如要轉展覽書, 又要埋數計算manpower, 搞到本來一齊準備收館工作嘅R同事都好唔得閒. 結果當然係大部份時間得我一個喺度拍架同清場, 週末人流咁多, d人"破壞力"驚人, 搞到d書架7國咁亂.... 一個人嘅能力真係好有限, 根本冇可能做得完d嘢. 日頭已經感覺到, shel完一大車書, 轉個頭又會見到周圍都係"點心", 真係得個"做"字

只淨番5個working day, 我諗我都冇法子試得晒大坑一帶咁多間食店, 尤其係最貴嗰間(浣紗廚房), 肯定唔會喺呢段日子去幫趁, 平嗰d或有點兒貴嗰d, 都比我試咗7成度啦. 近幾日已經開始去第2次同一間食店咯. 好似今日咁, 5至6呢個鐘數又想食飯飽肚, 我去番第1次去時食秘製叉燒拉麵嗰間"快樂廚房", 叫咗個[招牌貨]"快樂飯", 豬扒腸仔雞翼煎蛋...又真係樣樣都幾好食, 幾有特色, 唔似得d cheap茶餐廳整得咁求其, 緊係啦, 呢個世界係"一分錢一分貨"(個伙記對我講嘅), 個"快樂飯"加杯凍檸茶收我成40蚊ga, 仲貴過嗰日去"橫山"食日本嘢...我咪話"辛苦搵尼志在食", "平嘅又食吓,貴嘅又食吓"囉

1月份過去時, 我話"2007年過咗12分之1喇", 好似好細咁, 唔係好覺
2月份過去時, 我話"2007年過咗6分之1喇", 我仲強調過, 6分1係12分1嘅兩倍
話咁快, 而家3月份都過去咗, 2007年過咗4分之1, 個比例又大咗(25%)
跟住嗰幾個月, 個變化已經冇咁突出, 因為已經麻木咗, 直至到6月30號先又會醒番起..

返完一日晏, 跟住要返早更, 肯定唔夠瞓, 最鬼憎

返到屋企收到一封信. 呢封重要嘅信比我喺嚟緊日子有一個希望

去晒考A-Level, 少咗"生意"

2007-03-30T22:50:00.000+08:00

暖番, 28度. 呢幾晚都開住冷氣瞓覺. 尋日放假喺屋企時已經開始幫個衣櫃換季, 只係執咗幾件d喺屋企"粗着"嘅短袖衫同背心, 應該四月份之內搞掂好晒. 不過我注意到天文台預測下禮拜會跌到十幾度呀, 所以d羽絨褸, 夾綿大縷都係唔可以拎去洗住, 4月都仲有得凍ga

發覺拉記今日明顯少咗人霸位溫書, 特別係留意到冇人"嗱"住d黃色past paper, 只淨番d"嗱"住紅紅紫紫past paper嘅[應該係]應屆會考生喺度, 咁我就知道, 今日一定係A-Level exam day, 而且係重要科目添, 所以搞到我哋少咗"生意": d reading table有唔少empty seat, patrol時都唔需要mark位. 返嚟上網check過考評局考試時間表, 果然冇錯, 係考中化(8點半考到3點), 而今日係A-Level嘅開考日添. R同事&C同事都有份去考, 所以佢哋近排同人哋傾掉更d嘢都搞到幾煩.

估唔到呢個"唔3唔4"嘅預科公開試, 到今時今日都仍然存在

今日個schedule係超級正常: 9點半返工, 12點半放Lunch, 6點鐘放工. 朝早紅隧好塞車, 再走一班車都好難保證趕得切. Lunch hour周圍都多人, 我係唔鍾意同d亞叔亞伯亞嬸&地盤佬迫埋一齊食飯, 大坑一帶d cheap檔忽然間變得唔可以容納我喺樹"嘆"(除非食貴少少,埋單要過35蚊), 而嗰個鐘數特別"熱"(加埋d飯氣), 所以都係決定買飯盒返去sorting room度食(有冷氣嘆)

放工搭隧巴時迫車又迫人, 連續幾架116開得幾密都好, 去到鵝頸橋嗰度都會爆晒, 我早兩個站上車見啱啱連續走咗兩架先比我摸到個吉位嚟坐咋, 如果唔係我都好似平時咁寧願等108而唔揀116啦. 6點"踏十"返到屋企已經好攰喇. 如果日日返工放工都係咁"正常", 咁可能比我feel到咁樣嘅生活至係真正嘅苦悶同枯燥. 返shift咪唔洗咁, 返工/放工/食早餐/食飯經常都可以唔同時間, 天色唔同樣, 條街又會有d唔同, 睇到同經歷到多d唔同嘅嘢, 生活上有多d變化, 好似時時都可以有份新鮮感.

簽咗份circular係關於嚟緊嗰幾日公眾假期嘅編更安排. 原來對我係完全冇影響, d更一樣照番平時咁編法, 只不過係嗰幾日收7點會影響到原本編咗返晏嘅同事. 5號同9號照番schedule放一四咁放假, 6號全館休息(年中都冇乜幾可)即係又係off, 結果只有7號同8號要返工. (基本上,嗰日係紅色定黑色都唔關我哋d staff事嘅,人工又一樣咁計,唔同嘅係紅色日子,拉記嘅人流會特別多) 換句話說, 我嘅Last Day又提前咗1日, 變咗8號喇. 不過呢樣都仲可能會有變化, 因為R同事禮拜一要考英文, 我應承咗佢同佢掉更. 話唔定仲可以提前多1日.

今日做緊嘢時(check-in transit書)比我"立"到一本書, 收收埋埋等放Lunch落1樓搵咗部自助借書機即刻借咗佢. (上禮拜已經借咗一本,今次第二本) (已經唔知幾多年冇借過書..近排掂多咗書,忽然間勾番起我睇書嘅興緻) 放工搭緊巴士時, 打開本書篇序言嚟睇, 覺得好感動, 有少少激動, 睇到想流眼淚, 想喊...我諗起自己喺花戀個blog嗰篇"寫比自己童年嘅信"度作出嘅回應...有好多嘢係細細個時根本唔會知道, 原來當時好多嘢都係幾咁美好

清明復活期間嘅 opening hours

2007-03-30T22:34:00.000+08:00

HKCL响清明節,復活節一連5日紅色假期期間嘅開放時間如下:

　4月5日星期四 (清明節)　　　　　10am-7pm
　4月6日星期五 (耶穌受難節)　　　 CLOSE
　4月7日星期六 (耶穌受難節翌日)　10am-7pm
　4月8日星期日 (非公眾假期)　　　10am-9pm
　4月9日星期一 (復活節星期一)　　10am-7pm

睇落好似8號嗰日特別d, 開到9點先收館, 其實嗰日先係跟番normal schedule.
(以上schedule只係適用於HKCL, 其他館又有唔同嘅schedule)

陽光小小姐=黑色幽默

2007-03-29T23:09:00.000+08:00

距離Last Day仲淨番11日. 今個月好似好漫長, 過埋今晚都仲有48小時(兩日)先至完. 雖然係放假但都要專登返去拉記聽個所謂嘅talk(順便攞埋件正式uniform先至係最緊要), 係講一套電子化嘅人力資源管理系統. 查實個talk都冇乜意思(10分鐘已經搞掂), 求其搵個同事教番都識用. 我都有d懷疑間agent係搵我哋嚟做白老鼠.

再約咗舊同事食Lunch, 今次喺黃埔新邨搵咗間食上海嘢, 質素都唔錯, d位幾好坐, 冷氣又夠涼, 24蚊一碗排骨湯麵, 有一壺茶, 唔收茶錢唔收加一, 相比起大坑d"up-dup"茶餐廳度食個飯又係呢d價錢, 真係抵好多. 大家坐低都好多嘢傾. 舊同事帶嚟一齊食嘢嗰位20歲仁兄都幾有老細款.

諗番起尋晚定前晚喺館度做緊patrol時, 竟然比我見到嗰陣返入X處份工做我Supervisor嘅L太, 走咗嚟我做嘢lee層借書! 好彩冇比佢發現到我&&唔洗serve佢, 如果唔係比佢知我喺lee度做d咁嘅工, 實返去唱通街都似. 嗰一刻個心猛咁喺度唸: 呢個世界真係細

食晚飯前睇咗套download番嚟嘅DVD - 奧斯卡得獎電影"陽光小小姐"(Little Miss Sunshine). 睇之前都有讀過網上兩篇影評, 大致上知道個故仔係講乜. 當知道咗呢套戲係由一對夫婦執導, 小本製作嘅獨立電影, 先會明白呢套劇情咁簡單嘅戲點解咁令人appreciate, 同埋覺得獲Oscar最佳電影提名係值得. (最終奪取兩獎-最佳劇本,最佳男配角)

套戲話係家庭式公路喜劇, 事實上整套戲裏面有好多唔愉快嘅情節, 包括親人逝世, 理想幻滅, 夫妻糾紛, 汽車失靈...所謂世事往往不能盡如人意, 但個小女孩最終都能夠如願以償, 而屋企人之間逐漸識得體諒對方, 叫人感到欣慰睇得喜悅. 成套戲用咗輕鬆幽默手法, 泡製咗好多笑位, 當然係開心多過唔開心啦. 能夠將一堆不如意不幸事拍成一套喜劇, 可以話充份表現出一種"黑色幽默", 寫劇本要寫得好有心思至掂. 睇後發覺飾演爺爺嘅Alan Arkin先至係最佳男配角得主, 有d不可思議, 因為另外兩位男角戲份都多過佢, 演技亦都唔差. 戲中做"爸爸"嘅Richard有一句好正: "呢個世上只有兩種人, 就係成功者同埋失敗者!"

今日係3/29, 祝我嘅一位昔日BBS好友"阿金"生日快樂!

兩天小記 (3/27-28)

2007-03-29T01:02:00.000+08:00

兩日夾埋一次嚟寫. 逢禮拜二,三都係返晏, 又有唔少嘢係幾相似.

呢兩日主要圍繞住一件喺工作上發生嘅不愉快事: 話說禮拜二晚臨收館時, C同事無端端好晦氣咁對我發脾氣, 開頭都已經唔係咁客氣咁同我講, "你而家(嗰個hour我係patrol緊)冇嘢做就可以開始拍架喇(將書架上d書拍齊-收館前之準備功夫)", 隔冇耐又再講, "你唔拍快d,等陣做唔切冇得收工呀", 再聽完佢好惡咁講咗句 "你究竟知唔知要做d咩ga" 之後, 更意想不到嘅係佢竟然向我爆粗!

我諗佢呢排真係心情好差, 加上可能係LO掉咗佢返晏(唔比另一個新人-M同事-同我一齊partner收館), 亦都可能係我婉拒咗佢想同我掉更嘅request, 所以嗰晚先會無端端發老"皮"將d氣發洩喺我身上. 出嚟做咗嘢咁耐, 都未試過有自己同事(唔係讀者或顧客)好似今次咁, 咁火爆咁對我(仲要係講埋粗口)(仲要係女仔). 前晚發生咗lee件事之後, 我個心真係好唔安樂, 都唔知自己做錯d乜, 好似又得罪多個人.

大家都係"同級"嘅SBLA同事, 只不過係做得耐過我幾個月啫, 你而家當咗我係你嘅下屬咁, 叫我點做點做我都照做啦, 因為我唔熟d嘢都要聽晒你吩咐, 但你又唔講清楚d比我知我應該點做&仲有d咩我係要做, 只係覺得我幫唔到你手, 得個鬧字! 另外幾個SB同事前排同我partner過收館都唔會咁....唔好話你唔高興, 我都覺得好難頂!

今日(3/28)同S同事&R同事私底下提番件事, 佢哋都不願多談, 只係响之後多咗提點我工作上其他要注意嘅嘢. 我懷疑C同事都係神神化化之人, 以後都係盡量少d惹佢. 今日由於全館開1點, 所以個個SB都係(返晏)放9點, 收館時有成4個SB同事(計埋我)負責清場工作. 好在今晚冇再比佢"小". 感覺上, 都係R同事(即係之前話做到吽吓吽吓嗰個)同我比較傾得埋, 其餘幾個唔係有代溝就唔啱key, 有個(J同事)又好自閉成日唔講嘢.

天氣-星期二好暖, 28度; 星期三涼番d, 24度, 有d風, 要着3件衫出街.

食嘢方面, 呢排開始, 早餐鍾意過到去銅鑼灣嗰邊先至"搵食"(主要都係唔安於現狀,想試多d嘢), 大致上都係怡和街, 渣甸街, Sogo嗰一帶. 周圍搵唔同嘢食, 要付出嘅代價就係比多d錢. 嗰邊d麵包舖, 無論東海堂or大班, 買個普通包仔都貴過我平時慣咗响紅磡呢邊買嗰d. 如果係麥記/KFC/大家樂之類, 就更加一定會過兩位數字. 睇吓嗰日編更如何, 食咩鐘數, 視乎需要而決定食咩餐(細包/大包/快餐/飯/麵/粉/粥)同食幾多囉.

前日係食兩個包, 加埋都成16蚊. 今日更加"闊綽", 去咗麥奀食"世家雲吞麵", 估唔到個招牌麵真係細得交關, 好"的骰"嘅一隻碗仔, 個麵好細, 4粒雲吞亦都好細粒(裏面只係包住隻蝦), 盛惠25大元! 莫講話當午餐食, 我嚟食碗25蚊雲吞麵只係諗住當早餐, 諗住隻碗都會有番"咁上下大", 點知(唔洗10分鐘食完)唔夠喉, 之後要走番去大班買多個6蚊嘅包食埋先安樂, 驚死捱唔到6點會餓死嗰隻咁. (唔怪得成條街咁多間粉麵店都咁好生意,惟獨是你lee樹得嗰小貓兩三隻啦..) 結果今日份"早餐"花咗我成31蚊, 係平時買一個普通麵包價錢嘅10倍!

其實好耐之前已經"領教"過麥奀d雲吞麵, 好清楚記得係响奧海城food court度食過嘅, 我亦都記得嗰次幫趁麥奀比咗我一個唔好嘅印象, 至於係點唔好法就已經好模糊. (對某食肆嘅唔好印象,有時總係要再試過先知道番) 今晚返嚟上網時, 專登上openrice搵番呢間銅鑼灣嘅麥奀, 睇吓係咪真係彈多過讚先(好黑心), 結果的確好多人對於份量方面寫不滿評語, 有個話嗰碗麵只係值5蚊, 有幾個話以後唔會再去, 但亦有少數人以"較理性"嘅文字去講番呢間舖同埋細細碗雲吞麵嘅來源, 饒有意思. 我都覺得碗麵仔OK好食, 味道唔錯, 但我認為間舖嘅門面裝修應該整得高檔過人哋d粉麵檔, 同埋要有道玻璃門, 等人知道入嚟係食貴嘢, 有別於其他店. 你收得咁嘅價錢, 緊要比人睇到你貴喺邊度, 如果環境唔係特別靚, 地方又唔係大, d位又唔係特別好坐, 咪同人哋d粉麵檔差唔多, 但你碗麵仔都收人成廿幾卅蚊, 想飽肚又要平嘅附近有大把選擇, 又洗乜嚟幫趁你呢?

隔住大玻璃睇到對面花卉展覽結束後, d工人好忙碌咁進行緊清理工作. 展覽開放時, 外表上比眾多遊人睇到最好最靚嘅一面; 展覽結束之後, 冇晒遊人, 所有展品都要搬離或銷毀, 好多佈置都變晒做垃圾, 泥頭車將淨番用嚟陪襯嘅花草&泥土陸續挖走, 由一個滿目瘡夷嘅垃圾場逐漸恢復番足球場原狀.

午餐-星期二食5至6, 星期三食6至7, 好似已經Fix咗咁. 分別係第9同第10間都係第一次試嘅地方, 兩間都係茶餐廳, d餐單好似間間都係差唔多食嗰d嘢, 係就係好多選擇, 但係冇特別風格, 冇乜新意, 冇乜特別. 前日黃昏Lunch係浣紗街家記茶餐廳, 豉椒排骨飯冇嘢飲$26, 十分鐘度就食晒成碟飯, OK好食但冇乜Feel, 唔會再去. 今日黃昏Lunch係京街祥勝茶餐廳, 聽伙記講要個"百搭飯", 只不過係豬扒(切碎咗做六七塊,有少少油炸)+午餐肉一塊+腸仔一條+煎蛋一隻+幾條菜心+豉油撈餸撈飯+熱檸茶=$23, 去得lee d地方比lee d價錢, 都要預咗差唔多係咁嘅質素, 都唔可以要求人哋咁多. 食食吓已經有人落閘, 原來佢哋唔做夜市生意, 我變咗做最後一個客仔, 嚟lee度食最後一碟飯唔知點咁, 好似揀錯時間揀錯咗地方. 碟飯都可以接受, 唔會覺得特別唔好食, 但同好幾間幫趁過嘅茶餐廳一樣, 麻麻哋, 冇乜Feel, 都係唔會再去lu.

終於都填好晒, 交咗今個月張timesheet. 唔計1至3號返training嗰20個鐘, 今個月計落salary嘅working hours總共係129個鐘.

迷霧下的放假小綴

2007-03-26T23:55:00.000+08:00

難得嘅星期一non-working day, 同貝貝田去咗馬頭圍真善美邨某間茶餐廳度食飯. 嗰度對住條馬路(富寧街)嗰一捺舖, 一眼睇晒, 總共有5間食嘢嘅(唔計麥記同7仔), 呢頭比起九龍城聯合道嗰邊近佢返工嗰度多d, 同佢喺呢頭食咪等佢可以行少d路唔洗咁趕囉(但如果食禮拜六就緊係過番去九龍城嗰邊啦). 我哋兩個喺入面嗌小菜嚟食, 分分鐘係眾多人客之中最高消費. 啫啫雞煲同椒鹽排骨, 一個夠熱, 一個夠香, 兩樣餸都好好味.

食完送埋佢返大樓, 自己一個蕩咗去唔知邊度, 笪地方未去過好似迷宮咁, 但嗰度真係夠晒清靜, 响一行樓梯出番嚟至知嗰度已經係九龍醫院範圍. 市區地方都望見處處迷霧, 四周景物朦朦朧朧. 睇住呢個景象就好似自己嘅將來一樣: 前路茫茫, 唔知道應該行去邊度

終於又放假! 跟住嗰5年...

2007-03-25T22:21:00.000+08:00

終於又放假喇...逢禮拜一嘅off絕對係比逢禮拜四嘅更加期待&渴望, 因為五,六,日都要返足兼且係拉記成個禮拜之中人流最多嗰幾日, 所以真係好難捱....發覺份更表得我一個係要個個禮拜六日返足, 其他SB同事都有得放是但六or日嘅, 大家one week都係返38個鐘, 好唔公平啫

今朝同晏晝patrol時都出現咗d小麻煩, 都係出現喺d reading table度. 唔知係d讀者有問題定我處理手法上嘅問題...好彩都冇乜嘢冇特別事情發生. (根本就係d讀者本身唔啱先, 當呢度係自修室攤晒喺度溫書做功課, 佢哋係濫用緊/misuse館裏面嘅設施, 點知仲要比佢話番你轉頭! 喺佢哋嘅眼中, 我同拉記打份工就做咗"衰人", 响度巡嚟巡去騷擾緊佢哋) 其實係好濕碎嘅事嚟啫, 但個心硬係"銀住銀住", 又煩又唔開心. 以前未試過做呢類task, 緊係好唔慣, 工作上需要對住d全部唔識嘅讀者...本來去library好多都係斯文人嚟嘅, 但係時代唔同晒喇, 遇啱d心地唔多好or態度有問題or有心玩嘢嘅人就真係唔知點handle, 就算冇CS經驗都好, 要扮到醒目識做, 識得隨機應變臨危不亂...對於現時嘅我嚟講, 呢份工feeling like"吃力不討好"

Lunch又正常番, 放1至2. (一個禮拜返五日,得兩日係"正常") 如果唔係返呢份工, 我係絕對冇可能無端端成日走去浣紗街嗰頭食飯. 計埋今日已經食到第8間喇(仲有好多間未試). 今次呢間"旺記小廚"係食上海嘢, 但我就叫咗個瑞士雞翼飯(送豆漿), 原來都係普通嘢麻麻地, d雞皮上面好多毛, d汁好似普通豉油冇乜特別(比得嗰22蚊仲想點呀?), 正式嚟講應該係"豉油撈雞翼配白飯一碗". (最唔開心其實係食食吓飯又再咬到好大吓個嘴唇, 勁痛, 一連三日食嘢都咬到, 本來已經飆咗粒飛滋出嚟, 再咬多兩吓搞到嗰度爛晒!) 好在d位都幾好坐, 唔似得尋日喺一條橫巷幫趁"順興"食一碟23蚊嘅所謂醬爆豬頸肉飯, 要"踎大排檔"咁cheap吖(其實嗰檔嘢應該係食d腸粉,車仔麵之類嘅嘢比較適合)

食完周圍"捐", 再行上d條大街, 依家先比我發現到有間裝修超靚嘅"浣紗廚房", 未行到埋去, 離遠見到櫥窗係落地大玻璃就已經知呢間係食貴嘢, 行近睇真d連侍應都着晒成套suit, 應該係高檔嘢嚟, 同附近一帶d咁"平民化"嘅舖頭仔形成強烈對比, 所以都寧寧舍舍縮埋响埋邊, 唔咁貼近d cheap嘢, 知"訂"嘅先會搵到. 返到嚟上網search就知道呢間d嘢: 前排先至新開張, 仲有明星去幫趁添(亦見到有d search result講話大坑一帶多名人出沒), 原來係食創意中國菜嘅, 價錢大約百零蚊至二百幾一位, 豪得起就花自己一日嘅人工走去拆一餐啦.

雖然今日市區氣溫最高有成26度, 好似暖番好多咁, 但我都係要着番嗰件夾綿大褸出街先唔覺得凍. 花展終於都完喇, 結果我都冇比錢入場睇(亦都冇搵貝貝田同我睇), 我諗我只係落咗車嗰陣企喺天橋or做緊patrol時隔住塊大玻璃離遠望過去睇都已經睇飽. 3/25特首選舉其實都冇咩好選, 盞嘥大家d錢, 嘥精神嘥時間. 曾蔭權連任, 跟住嗰5年都唔會有好日子過喇......唉

食麥記又一次"無妄之災"

2007-03-24T00:24:00.000+08:00

返晏. 平時返工前多數係响紅磡呢邊買嚟食咗先or去到嗰邊落車先食. 今次提早上咗架啱啱嚟到嘅106隧巴, 改為去到銅鑼灣先買早餐食(其實嗰個鐘數-12:00 noon-好多人已經開始食緊Lunch). 唔係幾熟附近鋪頭都比我搵到怡和街有東海堂, 大班同埋麥記. 我揀咗麥記買咗個超貴($14.8)嘅板燒雞腿包嚟做我今日嘅"早餐"(呢個價錢係我平時買兩個麵包當早餐嘅兩至三倍喇!), 一路行一路食, 啱啱出爐嘅雞塊真係好滋味! 點知好衰唔衰, 食食吓又試咬親嘴唇邊, 搞到又要生飛滋!! 呢塊雞肉果然夠晒熱氣, 食幾啖即刻有反應! (食完都feel到有d辣味,個口都"興"晒) 正一係越吸引嘅嘢食就越係毒....發覺成日食親麥記or家鄉雞d熱氣嘢都會咁, 唔係咬到嘴唇邊就係咬到口腔裏面d肉, 自己稱之為"無妄之災", 食完就知味道. 我諗以後食親呢d嘢都要alert d, 同埋要就住就住唔可以食得咁快喇T.T

5-6 lunch hour. 第6間比我揀中嘅係"和發燒味茶餐廳"(係响安庶庇街入,亦都係好細間), 變咗食下午茶22蚊埋單, 雙拼瀨粉+熱檸茶都ok接受到, 點都好過禮拜二嗰日比M同事拉咗去信德街橫巷嗰間, 同樣係22蚊但完全唔掂嘅"鴻泰"吖!

你估而家d中學生最多人用嘅計數機係咩型號呢? 原來以前d 3600,3800,3900 通通都已經out晒喇! 而家要有兩行display(上面嗰行係dot matrix), 2-way電源, 中間有粒大圓形按鈕, 香檳金色外殼, 底部連住個薄膠盤同埋機身仲要係流線型設計(唔再係四四方方), 總之就係最型又最In! 答案: FX-3650P

終於都參觀過中環新天星碼頭

2007-03-22T20:19:00.000+08:00

約咗舊同事食飯, 佢又帶埋佢嘅新同事嚟比我見識. 唔講真係唔知, 佢兩個年齡相差成10年咁多, 但走埋一齊就好似只係相差幾年. 因為呢期"出job"先嚟到紅磡工業區返工(平時係返番北角嘅會計師樓), 所以佢就問我呢頭有乜好嘢食介紹, 而我就帶咗佢哋去崇潔街嗰條巷仔度食囉. 不過今次比我哋揀中嗰間日本嘢就麻麻地, 送嘅前菜3揀1都唔啱我口味, 雞扒拉麵d雞肉肉質唔靚又冇乜味"淡牟牟", "免費贈品"竟然係紙包裝冰震蜜桃汁250ml, 佢兩個走時都留低喺張枱度冇拎到走. 我嘅消費係33大元. 我諗附近咁多間, 同樣價錢應該有d好d嘅日本料理. 早放Lunch奉旨有位坐, 食完先1點, 仲有成個幾鐘周圍行街"hea"先夠鐘返去開工, 真係幾羨慕佢哋可以咁嘆. 我做緊呢份? 想早放已經唔得, 返嚟仲要準時開工, 實際上只係得50分鐘時間食飯咋.

今日(3/22)主要做嘅事就係過海去GPO交嗰份GF340嘅form(新入職有成9千8差唔多成皮嘢一個月喎,咪當參加抽獎), 順便過埋隔籬IFC嘅City Super買零食. 過海係由紅磡坐船過中環, 响8號碼頭落船(走嗰時都係搭番船返過嚟). 今次係我第一次踏足中環嗰邊嘅新天星碼頭, 終於都近距離一睹新碼頭嘅外觀. 响未落船嘅時候, 已經見到大致嘅模樣, 同埋落船後上岸啱啱好係3點3, 聽到個"仿製"大鐘d鐘聲不過好細聲.

第一眼睇見呢個新碼頭, 嗰種感覺係相當無奈, 政府為咗發展附近一帶土地, 進行填海, 開拓道路, 係都要犧牲原本嘅天星碼頭 - 一個屬於香港人嘅集體回憶. 舊嘅唔去, 新嘅都唔會嚟. 回顧往昔老香港年代, 唔係都係不斷伸延海岸線, 碼頭越搬越出, 要新就唔要舊咩? 其實中環天星碼頭已經名存實亡喇, 喺碼頭建築物上面寫住嘅名係叫中環碼頭(Central Pier), 而7號碼頭(搭去尖沙咀)嘅正門入口都只係寫住天星小輪(Star Ferry)代表間公司名, 我周圍都搵唔到有指示牌寫住話係"天星碼頭".

諗番起好耐之前細細個時, 紅磡碼頭未搬之前係好近舊區呢邊, 嗰時都唔知幾熱鬧, 小販周圍擺賣(例如d賣魚蛋牛雜嘅木頭車仔檔), 附近好多茶餐廳同大排檔都好好生意, 自從搬咗去黃埔花園海皮之後(船價好似貴咗成倍,連d巴士路線都話行完咗路借勢加多幾毫子,我仲好記得), 舊區呢邊已經唔再係昔日嗰種熱鬧情境喇, 黃埔街d大排檔老早已經消失晒, 而新碼頭嗰邊亦都好冷清(搬碼頭後唔少人改搭隧巴), d船客上船落船喺附近行路都唔會行行吓停喺度嘅, 唔係趕搭船就係落咗船趕返屋企.

今日睇到中環新碼頭嘅面貌, 咪就好似紅磡搬咗碼頭之後咁, 風貌已經完全唔同晒, 距離市集嘅路程遠咗, 船客自然又少咗, 冇可能再回復番昔日天星碼頭嘅熱鬧. 就算係人流比較多嘅"中環-尖沙咀"航線, 嗰座7號碼頭入面(好似商場)只係多咗d商舖, 到時到候就開咗門喺度做生意. 碼頭內外都冇乜人會駐足逗留, 就算有人聚集(小販攤檔或賣藝)都可能會被趕走, 因為呢d公眾地方要keep clear. 而比較令人有d安慰嘅就係依然可以見到有雪糕車同埋人力車, 响過少少嘅6號碼頭對出嘅行人路邊出現, 但係都冇人幫趁嘅(假日可能會好d), 相信遲早都會被淘汰. 新碼頭比我嘅整體感覺係: 冷冰冰

隨住年月消逝, 眼見一個又一個代表住香港社會傳統嘅景點逐漸消失, 真係只有無奈接受. 新嘅嘢冇晒風味, 整得幾靚都冇用. 過去幾十年嚟, 政府就係做做埋埋咁多呢d嘢, 等我哋香港人個個都以為生活質素每一日都喺度改善緊, 社會亦都不斷進步緊...

agent 嗰邊又再打嚟嘈我

2007-03-22T01:16:00.000+08:00

簡直就係無理取鬧....繼上禮拜三(3/14)打嚟質問我detailed version嘅辭職原因之後, agent嗰邊[williams conex]嗰位S小姐今日(3/21)吼我喺返緊工嘅搭車途中, 又再打嚟嘈我! 你估佢今次又同我講咗d咩呢..? 佢話知道我已經submit咗個resignation做埋下個月9號就走, 之後又話我做嘢唔"上心", 聽briefing冇反應, 唔熟悉d工作有問題又唔去問淨識得一碌木, 跟住又話我唔知係咪知道就嚟走所以工作態度有問題....

我聽到真係唔知點反應佢好. 我覺得奇怪話番佢發生d咩事無端端打嚟同我講呢d嘢, 佢答番我, 意思係話收到風, 聽番我做嘢library呢邊d L,AL開會時提過我同另外個新同事點點點, 呢樣嗰樣...喂老細, 我諗你可能搞錯咗, 你講緊嘅嗰個應該係另一個M同事而唔係我, 我同佢做嘢表現係點, 我哋一齊做嘢嘅一定清楚過你. 你坐响灣仔嗰邊office又冇親眼睇過我哋點做嘢(冇裝到CCTV監視住我哋), 有乜理由會知道我哋"做嘢唔上心,聽briefing冇反應,唔熟悉工作又一碌木"呀? 我同M同事啱啱先新嚟返咗工10日度, 好多嘢先開始上手, 有乜可能會完全熟悉晒d嘢點做點做? 仲有點解呢邊d L,AL冇同我哋講過任何嘢, 要輾轉由你哋agent做"中間人"嚟話番比我哋知呢? 跟住先同我講話, "只係想提番你, 就算係就嚟走都唔應該點點點, 應該做番好d 留低個好印象呢個世界好細ga咋"....總之up咗一大輪廢話! 我心諗, 呢d嘢我不嬲都知, 根本就唔洗人提. 我又冇諗過會比人懷疑我"因為就嚟走,所以d嘢做得唔好"! 你唔好好似當我係嗰d十八,九歲d"o靚"仔啱啱出嚟做嘢"帽尼答霎"先得ga...

我發覺呢間agent真係好有問題, 出嚟做嘢咁耐都未曾試過比人咁樣"壓榨"法. 真係唔知佢想點. 如果佢再打嚟同我講類似嘅嘢, 我一定要鬧鳩番佢轉頭至得喇. 我開始懷疑佢哋搞埋晒咁多嘢係另有企圖...

逢禮拜三開館係一點, 所以全人類都係返差唔多12點半至9點呢更, 尋日返晏食5點, 今日就"tun"遲咗要6點先放Lunch囉. (自己話就話係Lunch,其實出面已經開始緊夜市生意) 正午12點只食咗兩個包頂肚, 跟住就要捱6粒鐘先放食飯, 查實我喺3點半時已經feel到開始肚餓, 所以今日呢種shift嘅上半part真係好難捱ga.

數吓手指原來今次已經係我去浣紗街嗰頭搵食嘅第5次, 因為我記得次次去邊間都係第1次(就嚟比我試勻晒), 而今次已經係試到第5間唔同嘅食店. (又原來,嗰頭已經係叫做"大坑",我見人d地址係咁寫: "香港大坑浣紗街...") 呢次我又去咗一間都幾"家庭式", 豆膶咁細間嘅舖頭仔度幫趁吓("堂食"要坐街邊食,擺脫心理障礙,唔會點諗環境同衞生嘅嘢), 嗰d係自己揀餸食嘅碟頭飯, 老闆娘講就講係22蚊兩個餸, 24蚊三個餸, 實情佢比我任揀任食, 白飯任庄, 唔飽食到飽嗰隻. 同老闆娘傾幾句偈就好似好熟咁, 走嗰陣我連嗰兩蚊貼士都比埋佢賺. 所謂食嘅開心, 做嗰個又開心!

如果係唔開心嘅, 即使個環境好正, d嘢食幾好食都好, 幾貴一餐又係咁食, 但食完都係不外如是, 咁又有咩意思呢.

再收多張紅紙, 利是錢埋單收$290

2007-03-19T19:29:00.000+08:00

啱啱已經過咗農曆正月, 今日二月初一咁"橋"放假約咗"貝貝田"(Nathalie嘅新中文暱稱)去番九龍城食Lunch(發覺同"平時"同佢禮拜六食Lunch嘅feel好唔同), 竟然收到佢一封遲嚟嘅利是! 佢都會比利是我(第一次), 我唔知咩意思(唔會係施捨或者奉獻), 呢封亦都係今年收到最大金額嘅一封. 結果今個丁亥豬年利是錢正式埋單, 由原本以為冇得再增加嘅$190暴升52%去到$290. 多謝

睇番本生肖書講我正月嘅運程, 好多都講中晒, 其中以事業同財運兩樣嘢最準.

農曆正月整體運程 - 新年假期才剛過去, 便要馬上投入工作了, 而且工作量比去年還大 ... 工作量雖然大了, 但卻還未找到新的路向, 可能要待入秋之後才有轉機.

財運 - 財運一般. 雖然上半年有一點點財, 但與平常相差不遠, 無意外驚喜, 亦看不見任何意外收獲. 故本月要調整心態, 只問耕耘, 毋問收獲.

事業 - 忙得無滋味. 工作量大了, 但財運卻沒有明顯增加, 越做越不是味兒. 但工作本來就是這樣的了, 有時勞而無功, 有時則會不勞而獲, 故宜以平常心看待, 努力做好自己, 盡了本份便可以.

照本書嚟緊幾個月咁講法, 呢期都只係要靠自己努力, 一分耕耘一分收獲, 等時機到時先可以突圍而出囉.

前晚上網無意中又比我發現到一份條件好正嘅3+3政府工, 學歷要求唔高, 但新入職嘅人工都有成萬銀一個月, 係我而家做緊呢份sbla外判工嘅人工兩倍都唔止! 今日同貝貝田食緊牛肉麵時, 佢都不約而同咁向我提及有留意到&想我去apply, 睇嚟佢都好關心住政府職位嘅行情, 希望隨時彈d好工過我呢.

1千蚊假銀紙唔關我事

2007-03-17T22:23:00.000+08:00

新聞近排成日講1千蚊假銀紙, 又話偽鈔質素好高, 好難分辨出係假. 不過都唔關我事, 因為我極少機會掂金牛, 我諗一年都唔會掂到一張!

shift duty 嘅好處

2007-03-17T01:37:00.000+08:00

花展開咗幕, 隔住玻璃見到d人川流不息來來往往, 白天至夜空都見到好多閃光燈唔停咁閃....嚟緊週末如果唔落雨應該會更加墟冚! 發覺大便已經正常番喇, 肚冇再脹住, 胃氣亦都好番, 天氣暖番都唔洗再着羽絨住....總之腸胃已經冇乜事喇.

返shift duty(輪更制)原來都有個好處(係呀,終於比我feel到), 就係唔洗咁悶, 成日返住同一更, 返吓唔同時間有d變化嘛! 不過雖然返早返夜表面上都係一樣7粒半鐘, 但係感覺上就係返夜會少咗d私人時間. 朝早返9點半同返12點半好似冇乜分別, 但夜晚放6點同放9點就有好大分別喇, 如果放9點返到屋企實係遲咗沖涼食飯瞓覺嘅, 變咗好壓逼, 又唔敢太夜瞓就番正常鐘數.

講真, 初時見到d更表真係好唔鍾意, 好唔願意, 但係逼於無奈都係要揀一份比自己. 以前未試過, 初時真係好唔慣, 因為日日唔同時間, 一日三餐+瞓覺都唔固定, 搞到d鐘數亂晒. 好似今日咁, 放5點食飯, 都唔知係lunch定dinner(duty roster度就寫住係dinner), 再去浣紗街一帶度搵嘢食, 發覺情況唔同咗, 有d西式日式東南亞菜式嘅舖頭仔都close咗, 有d陳年老店唔係清洗緊執緊嘢就係準備定夜市d餸菜, 係得d類似茶餐廳仔都會有d客仔, 嗰個鐘數都算係下午茶呱. 今次求其搵咗間叫"快樂廚房"嘅入去食拉麵, 係唔飽ga喇, 我都唔係咁想响嗰個鐘數食飯, 好似怪怪哋咁.

另一個好處, 就係撞啱嗰日或嗰個鐘數有事但本來要返工嘅shift, 可以同人掉(例如我前日要去interview掉咗嗰日off), 咁就可以避免請假扣糧囉(不過扣唔扣,你份糧都係得咁少咁解). 同埋如果鍾意週末返工, 平日先放假, 咁返shift或者返d服務性行業就好容易滿足到.

lunch 搵食發現咗蓮花宮

2007-03-15T22:58:00.000+08:00

感覺上已經okay, 經過咗成個禮拜之後, 腸胃同胃口都好番好多, 冇再食藥, 食多咗嘢, 唔會有肚餓又食唔落嘅情況. 天氣暖番d, 冇咁怕凍, 但都係要着埋件大褸出街至夠暖. 而家只係關心下次幾時痾同埋會唔會再有之前d問題. 始終都係擔心體內積藏咗d自己唔知嘅毒素或者病菌, 令到身體退化變壞, 唔知有咩可以check到同改善到. 隔住玻璃窗見到喺"殘"眼太陽底下, 對面花展都未開幕就已經有d團體入咗場猛咁影相咯! 我諗嚟緊兩個週末拉記都會多咗d人流係來自花展喇.

一條友lunch試吓去第度搵食, 睇吓會唔會有咩新發現. 今次就更加陌生, 係以前從來未行過嘅浣紗街一帶(近大坑), 發覺嗰頭d樓好舊, 舖頭亦好舊, 同馬路另一邊嘅情況形成強烈對比. 我估响老遠年代嗰時, 呢條銅鑼灣道可能係海傍, 就好似大角咀d舊樓咁. 附近都有唔少食店(至少十間八間), 有d隨街擺枱擺櫈嘅都幾古老吓. 我認出有個做過我trainer嘅sbla都响嗰頭食. 而我就隨便揀咗間"up-up-dup-dup"嘅舖頭仔食咗個盅頭飯, 計埋一壺茶錢都係19蚊埋單, 平過食大快活.

搵食同時比我發現咗有座"蓮花宮", 有警員架起鐵馬維持秩序, 不分老壯少兒 d人個個排晒隊一批批咁向座廟推進, 好似有得執咁, 原來今日係觀音開庫, d人問觀音借庫保平安! 我都有諗起屋企附近, 成日經過嘅觀音廟(搭親小巴返歸都响座廟門口落車)門外近日都有d舉動, 主要係講d人流安排呱. 相比起以前冇乜呢d"活動", 近代人真係多咗參與迷信呢d嘢, 好似個個都好冇安全感, 覺得人生冇乜保障咁, 所以都要靠d神靈先至會安心d囉.

特首答問大會同辯論節目兩晚我都有睇, 娛樂性唔錯, 除咗得啖笑之外, 對於政治人物同埋傳播界都係好重要嘅學習, 亦都作為未來大型選舉節目各樣嘢嘅少少經驗咁啦. 至於結果邊個贏就唔洗選都一早已經揭曉咗喇, 所以講咩都係嘥氣. 梁家傑講到好似同d商家好唔妥咁....而家乜人都要聽晒班商家話事, 你想同佢哋搞對立, 班選委緊係唔會旨意你啦. 不過梁家傑明知道只係一場遊戲, 冇乜壓力底下講乜都冇所謂, 佢肯付出勇氣站出嚟"參選", 為弱勢社群出番句聲爭番啖氣, 又真係值得贏番無數香港人嘅熱烈掌聲!

重回舊地 interview

2007-03-14T22:22:00.000+08:00

世事就係咁怪! 估唔到今日又會返番去老地方見工, 上次見已經係4年幾前嘅事喇. 上一份似似地樣嘅工, 咪就係今日要見呢一份, 而且人工仲係一模一樣. 整個interview過程都同嗰年去見時冇乜分別, 唔同嘅係因為我已經响呢個department做過幾年, 所以好多嘢都似曾相識, 人事部同我講嘢嘅語氣有d唔同(比較唔覺得陌生), 同埋與面試官之間嘅對答都有part關於嗰陣返呢份工d嘢.

interview過程之最深刻印象: 1.面試官問我其中一個問題係, "咁你嗰陣做呢份工做得開唔開心呀?"; 2.之後用英文問我, "講我知點解你會有興趣再apply番呢份工?", 我就用"nut-nut-cut-cut"嘅英文回答; 3.臨走前要去番人事部一個職員處搞埋d手尾, 佢話認得我個名, 仲話我成熟咗. 見完出嚟嘅感覺都幾好幾滿足. 我覺得都有d機會, 約60-70%左右, 希望會收到好消息啦.

順祝我一個識咗20年嘅舊同學Patrick生日快樂, 生活愉快平安!

睇Iwo Jima比人呃咗

2007-03-14T00:51:00.000+08:00

諗番起尋晚肚痾"痾到瞓唔到"嘅經歷真係恐怖, 好似發咗場惡夢一樣. 食咗藥都要等成5,6個鐘先見效, 但有效總好過冇效, 朝頭早都叫做瞓得着唔再痾, 幾乎搞到要"漏夜"去急症室(結果都冇去到,又驚要洗胃要照鏡好多嘢搞好麻煩). 天氣暖番d(有21度), 個身都冇咁怕凍, 但响屋企都係要繼續着住件大羽絨褸.

約咗舊同事去油麻地百老匯電影中心睇"硫磺島戰書"(Letters from Iwo Jima), 唔係話套戲唔好睇比人呃咗, 而係尋晚上網訂錯飛, 以為"貴賓卡"option就係代表bc會籍嘅"買1送1"優惠(佢個網上售票系統又寫得唔清楚), 點知去到用取票機攞咗張飛之後, 入場時就比票務員截住我唔比入, 話我唔係Insight Pass會籍冇權享用零票價優惠, 要排過隊補番50蚊(即係比預計貴咗成倍)買番張"正常飛"先入得場! 如果唔係陪我個返正常工嘅friend嚟睇, 我放平日假又洗乜响呢d時段(7:10pm)同人逼餐懵兼捱貴飛呢. 黑開真係有條路...入到去睇戲時爆到乜咁, 隔籬坐咗個單身女人喺度一路睇戲一路整埋d怪聲出嚟騷擾住我, 真係咩嘢睇戲mood都冇晒咯.

對於戰爭片我係極少睇, 最有印象都係前排响屋企睇隻VCD"太極旗飄揚"(韓國片). 加埋呢套荷李活鉅片+奧斯卡提名最佳電影"硫磺島戰書", 睇過嘅呢兩套同樣係描述戰爭情況, 拍攝好逼真, 場面震撼. 若講到感人情節同埋血腥暴力畫面, 就肯定係套韓國片強d. "硫"片畫面d顏色好淡, 冇乜色水. 一套主要由日本人演出嘅戲能夠問鼎奧斯卡, 只因個導演係奇連伊士活!

睇晒套戲都唔覺有任何搞笑地方, 有都只係幽默成份, 但就唔明點解睇睇吓好多觀眾响度傻笑, 仲笑到好大聲咁, 開頭睇嗰陣我都以為呢套"硫"片係一部"搞笑戰爭片", 照計憑我睇過嗰d對於呢部戲嘅介紹又唔似係. 我認為係因為大部份香港觀眾睇慣咗d搞笑嘅電影同電視劇, 搞到d人變咗睇任何類型嘅戲都當咗係一套笑片嚟睇囉! 戲院爆晒但好似同緊一大班唔識睇戲嘅人一齊睇呢套戰爭片, 感覺好怪.

第4日 or 倒數第29日

2007-03-12T22:48:00.000+08:00

數到今日先係第4日返工, 不過又可以開始倒數住仲淨番幾多日喇. 機緣巧合之下, 又有得連放兩日假! 結果返新工頭10日, 竟然就已經有6日係off喇. 之但係唔返工係唔會有糧出喎, 請病假當然冇錢啦, 而紅日返工又唔會比多你(復活假已經蝕晒), 請事假呢...仲要自己比錢出嚟比番間公司喎, 你話一個月賺得幾多呢.

腸胃問題真係好難頂...尋朝都係帶住心慌慌嘅mood嚟開工, 悶悶不安好唔舒服, 後來先覺得好番d. 基本解決咗發燒&作嘔兩大害症, 但胃口都未回復番正常(尋朝食兩個包食唔落), 亦feel到有胃酸"攻"上喉嚨, 胃氣難消..."寒春"天氣持續, 身體發冷怕凍, 响屋企都着晒羽絨...今晚又試肚痛肚痾, 又要食番藥......都唔知幾時先會好番喇T.T

隔住大玻璃睇見對面"花展"嘅decoration都整得7788, d花開得好靚, 離遠都望得好清楚, 配襯住天陰陰雨濛濛嘅景緻, d花嘅顏色特別sharp! 每朝返工一落車, 行幾步就會見到成地都係花喇, 上到天橋都不禁要向展場內週圍眺望多幾眼先滿足. 唔知d市民賞花時, 又會唔會諗起展覽背後有好多人付出嘅勞苦呢?

2nd day of sick leave

2007-03-10T23:10:00.000+08:00

兩日病假嘅last moment...估唔到返新工唔夠一個禮拜就已經有4日係off.

尋日除咗食止痾止嘔止肚痛藥之外, 仲食咗兩粒感冒藥, 以為可以醫好我嘅發冷徵狀. 今日都仲係渾渾噩噩週身唔舒服唔想郁, 瞓極都覺得唔夠, 咩都唔想做咁. 後來睇番支探熱針嘅說明書, 先知原來我探熱時支針擺錯位! 去睇醫生時, 個護士都冇教我實際係點擺法(只係叫我擺"脷底"), 結果有燒變冇燒! 醫生診症時再三問我喺屋企探熱有冇燒我都係答"冇"(其實係支舊探針壞咗,冇探到熱). 好彩醫生都醒目, 開埋隻退燒藥比我以備不時之需, 今日黃昏食咗退燒藥之後, 身體狀況已明顯好轉, 真正退燒, 冇咁發冷, 夜晚轉番食飯時都有番胃口. 咁我諗聽朝返工時都冇咩大礙啦.

不過醫生開比我另一隻用嚟補充水份嘅"hydration salt"真係好難頂, 難飲之餘仲搞到嘔番晒出嚟, 嘔嘅同時又頭暈, 冇乜知覺身體碰撞到d嘢都控制唔到, 每次頭暈都比我有恐怖嘅經歷. 冇咩必要都係唔好亂沖d粉嚟飲, 飲唔慣d嘢又亂咁飲, 往往會有慘痛嘅後果!

終於都 resign + 蘆薈汁惹禍

2007-03-09T23:23:00.000+08:00

渾渾噩噩咁走入嚟打blog, 隨時打打吓又頭暈. 3/9渡過咗飽受煎熬嘅一日. 一早瞓唔着痾嘔大作+發冷好辛苦唔知咩事, 如果唔係冷親就係食錯嘢. 點都要睇醫生攞病假喇. 經醫生查問後, 原來係尋晚飲咗罐蘆薈汁惹嘅禍! 因為平時冇飲開, 以為係好似普通菓汁咁飲, 點知今日先知原來蘆薈汁嘅功能係用嚟通便!@@ 飲食嘅突變往往令自己"受唔到", 引發腸胃炎. 呢次係繼04年食生蠔之後又一教訓.

未止痾嘔又週圍走, 真係幾"危險". 中午專登返一返去office都係為咗某同事, 同佢簽好張"掉更紙", 順便搞埋病假申請, 仲有就係辭職form...係呀, 終於都決定咗resign, 無謂再嘥時間落去(但都仲要等足成個月先可以走). 到咗今日, 我先真正feel到自己上咗當, 腦海裏一個"無良奸商"嘅形象逐漸浮現晒出來!

作為一間contractor agent永遠都係以利益行先, 一大班contract employee只係間agent眼中嘅"貨物"或賺錢工具! 今朝confirm個sick leave時, 對方第一句就點出你做錯d乜(請病假要响3個鐘頭前通知,我係遲咗) 跟住仲同我講話"你今個月冇bonus"(我已經預咗會冇), "要補番張病假紙", 佢完全唔會concern你個病, 反而比我feel到佢以為我係因為懶而詐病, 你話係幾咁冇人情味呢.

fax完晒d資料, 離開間館時, 再打嚟confirm我個resignation...你估佢又同我講d咩呢? 佢話"1個月嘅通知期內係唔可以再請假, 否則當你曠工, 要賠錢"! 即係如果我中途返另一份工唔再返呢度, 就要賠番剩餘日數咁多日嘅人工, 而放一日假係冇錢逗之餘, 仲要掉轉頭比人工佢! (咁咪差唔多做義工一樣, 仲要蝕埋車錢飯錢..) 其實新入職就要one month notice已經係一樣苛刻terms, 另外仲要呢樣嗰樣符合條件先至得到所謂"bonus"(雞碎咁多), 而3日嘅20hrs training亦唔會有糧出, 但我真係估唔到resignation同樣會有d咁嘅restrictions...所有嘢都比我一種強烈感覺, 就係我已經上咗間agent嘅賊船, 比人呃咗! 做咁耐嘢以嚟都未試過遇過一間好似lee間agent咁刻薄嘅公司.

要怪就怪自己唔好彩or命運捉弄, 之前冇勤力讀好d書搞到今日咁嘅地步囉...

值日生的 first day

2007-03-07T01:14:00.000+08:00

正式返工第1日"report duty", 就要開始做唔同崗位嘅"值日生"! 大部份時間冇得坐喺度做嘢(除咗sort書), 真係企到對腳都痠晒....但係實在比起上禮拜齋做data entry(即係話過人工一模一樣)嗰份有意思得多, 起碼你係provide緊d service比人, 服務對象係reader, 有機會學d好基本嘅面對面customer service技巧&應對, 唔會話乜嘢都學唔到.

同事方面, 有個已經係識得, 因為一齊上training仲係同組. First impression, head住我個主管(費事响度講名&男定女..)真係幾Nice, 佢好後生, 應該係大學畢業, 已經坐LO位. 至於AL,SL同L我都仲未搞清楚邊個打邊個, 唔係absent就係成日唔見人, 要等耐d先會知多d. 有個同我一樣係sbla唔知做咗幾耐, 好似做到"吽吓吽吓"咁, 我覺得我新嚟第1日仲醒目過佢.

原來返12點半放9點一更就叫做"返晏". 今日個時間表比平時順延咗3,4個鐘咁: 12點食早餐(兩個麵包), 黃昏5點幾食Lunch(但係去到餐廳係叫"下午茶"), 夜晚9點9返到屋企, 11點幾沖涼, 午夜12點半先食晚飯, 然後先有時間上網寫blog, 跟住應該凌晨3點鐘瞓覺, 第朝11點起身. 返shift duty都係要咁樣過d生活...? 返埋聽日又可以放一日假, 真係好!

我諗緊幾時辭職好呢?

靜待 tomorrow...

2007-03-05T23:01:00.000+08:00

本來今日3/5係合約正式生效嘅first day, 但係咁橋禮拜一係off而我又冇答應返"backup", 所以變咗一連放兩日假, 靜待tomorrow正式on duty. 其實就算"放假"今日都唔少嘢做(出咗大半日街), 昨晚已經執好晒嘢draft好今日嘅schedule: hair cut, 買plastic file box, 影印文件, 勞工處碰運氣, 上番間agent[williams conex]度交相整staff ID, 迷你倉交租...

[勞工處碰運氣:] 尋晚過午夜先睇見有份政府temp job好筍, 會考學歷要求only, but pay成8千7! 睇到時係未"開盤"(40分之零). 點知今日中午上到去灣仔centre印埋張"籌"後先發現, 嗰40個quota已經比人fill晒, 失望而回... 心諗: 唔係你即係唔係你, 人哋個個都有本事過你! 而家真係人浮於事, 好工難尋, 個個都睇錢份上咯.

[上番agent度搞staff ID:] 未正式返工已經有種被騙(如果唔係,就"被氹")嘅感覺, 原因--有個女仔上嚟登記做sbla, recep比份doc佢叫佢睇清楚, 如果"接受得到"先做登記, 但我記得自己上嚟登記時都冇比到我睇嗰份doc.. 如今問番佢攞嚟睇時, 佢答"而家比你睇都冇用啦, 你都簽咗約咯". 唔係話介意漏咗個程序問題, 但係聽落真係好唔舒服. 同埋agent裏面d人都比我有種強烈feeling...真係盡在不言中. (其實响網上都search到唔少關於呢類job嘅討論聲音)

講來講去都係嗰樣...contractor(外判公司)都收政府唔少錢搞呢d"生意", 而政府亦都慳番一大筆, 結果被剝削嘅咪係基層, 無權無聲咁去接受呢個現實! 賺得嗰四,五千蚊一個月, 點可能話比人知我做緊嗰份係政府工呀?

無奈的 last training day

2007-03-03T22:54:00.000+08:00

快? 定係慢? 不經不覺已經嚟到 last training day (3/3). 全日都係响同一層, 企counter位學check-in(還書) & check-out(借書). 對住"真實"reader(服務對象)做嘢真係冇可能會悶, 要打醒十二分精神, 唔可以瞌眼瞓, 仲要係好緊張, 好大壓力, 當然, 亦都好有挑戰性....(但只係對新仔而言, 做耐咗應該唔會係咁..)

利用套電腦system嚟處理in/out record真係一啲都唔簡單, 多嘢睇多嘢記, 要一眼關七, 身手敏捷, 好醒目先得 (其實都似馬會做投注站or銀行做teller嗰啲囉...我就認為自己唔適合) 我哋幾個trainee都係初次接觸呢類task, 頻頻出錯有乜咁出奇. 如果唔係個trainer嘅問題, 一邊教我哋時一邊又响度窒頭窒勢鬧鬧貢, 我諗我哋都唔會搞到咁緊張手足無措, 真係咩自信都冇晒! 好無奈...不過第日有機會做到呢d位先算啦, 而家只係比你"玩"吓, 等你有個基本概念知道個task係咁之嘛.

企足一日, 對腳真係攰得交關 (好耐未試過咁攰...好似去行山行咗十幾公里), 無奈完咗走人之後去到邊都仲係要企. 返番去個contractor[williams conex]度搞份約d嘢, 同另外兩組人成批咁出現响間agent度, 結果我哋幾個搞咗成兩個鐘頭先走得, 覺得咁樣嘅安排真係做得好差. 無奈嘅我無奈地簽約, 然後到揀duty roster時, 先知道咩叫做"輪班輪休"制度, 原來[張"更表"係咁編法:]兩個week一個cycle, 日日schedule都唔同, 一時返早一時返晏, 一時又要五點鐘食飯, 一時又好夜[9點]先收工, 禮拜六日都要返, 放假反而响平日....(Q:apply呢份工時唔係預咗嘅咩?) (A:但就估唔到個時間表會亂成咁,日日都要唔同時間食飯,瞓覺,返工,搭車...)

我已經計過, 如果照張更表咁返足, 一個禮拜返38個鐘, 一個月就即係返166個鐘, 加埋乘埋[唔計任何bonus]個"底薪"都係得4千6, 就算比你攞晒d所謂bonus, 個total數都係得5千至5千2左右. 更加無奈嘅係, 辭工要one month notice否則要賠! "段"鐘計已經係唔抵, 紅日返工亦唔會有額外酬勞, (上training呢3日都係"免費"幫拉記做義工...) 人工咁低仲要附帶咁多苛刻條件, 果然係政府外判員工之悲哀! 經濟繼續差落去, 現實就越嚟越殘酷, 此時此刻只有無奈地接受.

所以, 我諗我自己都唔會做得耐喇. 工還是要繼續搵. 長遠都係要搵番一份"段"月出糧嘅工.

累的 second day

2007-03-02T22:26:00.000+08:00

如果用唔上"苦"呢個字嚟形容second day, 咁就一定係用呢個字--"累". 老實講, 今日training正式實習sort書, 上書, 包書等嘅[體力勞動]tasks, 所花嘅氣力絕對係多過前幾日做嗰份, 一日淨係坐喺度打字嘅data entry. 但係若講到邊樣比較"辛苦", 我都係會答後者--心理上同環境上嘅"辛苦"仲慘過乜, 時間會過得更慢. (雖然, 入番去sorting room或staff room, 都係好似工場, 地方窄+雜物亂, 完全唔似房外public area咁靚咁"寬敞"--冇辦法, provide service嘅work place通常都係咁"表裏不一")

由reader變咗身做staff, 真係唔做過唔知, library裏面有好多怪人/衰人/麻煩人. 有d人未必有惡意or不懷好意, 存心做壞事, 但係做咗d嘢會影響到人or導致其他reader/staff不便. 比如今日就見到, 有人喺書架上隨便攞d書嚟"翻兩翻", 唔洗十秒就放番上去(跟住攞第本)...但係咪放番原本擺嘅位置呢, 只有佢自己先知, 甚至連佢自己都已經唔記得, 因為佢攞過好多本書上手, "立"完之後週圍"插", 唔知邊本打邊本. 可能只係我好奇或者多事, 留意住周圍發生緊嘅事. 其實對於library只係好濕碎嘅事, 幾十年嚟, 應該無時無刻都不斷發生緊!

出出入入sorting room, 車來車往, 永遠都會有執唔完嘅書, 永遠都會有書未上番架, 永遠都會有書搵唔番失咗蹤......所以呢類工作係永遠都做唔完! (除非間館突然關上大門, 謝絕任何讀者進入...? 咁即係變咗private space) [後記: 大部份一齊train嘅都係細過我好多]

新的 first day

2007-03-01T23:11:00.000+08:00

幾日之後, 又來另一個 first day......感覺不錯, 起碼唔係一個 "苦" 的 first day. (salary rate同幾日前嗰份係一模一樣, 但卻可能係 "天堂" 與 "地獄" 嘅分別) 上咗6個鐘training, 坐喺度聽嘢, 都幾悶, 不過對於我呢個已經十幾年冇 "親蜜接觸" 過圖書館服務的 "讀者", 同時又要扮演 "職員" 的角色, 今日再重新了解番關於Library的一切係絕對有需要, 覺得好多新事物都好新鮮.

我懷疑我兩張 "市政局" 借書證已經唔用得. (以前用硬咭紙造嘅一式三張借書證, 我都仲有ga)

冇工開的 last day

2007-02-28T22:40:00.000+08:00

冇呀...返去交番低個證, 攞番Locker裏面d嘢, 再同個Leader講低聲, 跟住就bye-bye, 結束咗一份非常短暫嘅工作. 心情輕鬆. 份咁嘅工根本就唔適合我. 同埋, 覺得裏面d人好似冇乜人情味. 至於有冇得出番糧比我呢...緊係希望有啦, 冇咪盞搞. 表面上係28蚊個鐘, 計過實際上只係賺$16.50/hr (賺埋都唔夠補) 最後一日竟然係一個 "冇工開的Last Day", 你話幾咁悲!

轉個頭去咗深水埗勞工處"碰吓運氣", 首次登記, 其實係琴晚Nathalie幫我睇到一份 [同我之前做過嗰份一模一樣嘅] 政府工, 自己仍然有Great Interest就真係絕對係"睇錢份上". 琴晚見有96個面試名額已經Fill 咗40個, 點都要今日去搶番個位...經"轉介"後預約咗兩個禮拜後去灣仔Headquarter度Interview.

就業中心度d人搵工都着得幾隨便, 好似去咗公共圖書館咁: 有d十六七歲細路仔, 都係着T恤牛仔褲波鞋; 有d亞叔亞伯個頭生晒白頭髮, 都仲要"奏"到好埋咁逐頁睇住嗰份List嚟搵工....唉, 真係世界難撈呀!

夜晚同Nathalie去APM. 終於都食到MOS Burger(摩斯漢堡), 一食就係兩個, 一個係帶子天婦羅Rice Burger, 另一個係海鮮珍珠Rice Burger, 真係極好味! 靚過&好味過麥當勞的"仿製"米堡多多聲! 另外仲整多件和風脆雞($12), 全部本來係西式快餐食物, 忽然間變得好有日本風味. 食食吓嘢, 忽然又接到個電話, 叫我聽日返去Library嗰度上Training Course. (即係..又見得成?)

恭喜晒Nathalie, 終於出咗部新電話 [Sony K550i] 喇!

潁 & 穎

2007-02-27T17:14:00.000+08:00

"潁州的孩子" 係其中一部奧斯卡獲獎作品 (最佳紀錄短片). 今朝返工時响地鐵站內攞到份免費報紙 (都市日報), 睇到有關版面, 竟然見到套戲名比人寫咗做 "穎州的孩子"! 翻查過字典發現原來兩個字都係讀 "泳" 而普通話讀音又係一樣, 但字面解釋唔同, 所以應該係份報紙寫別字.

"潁" 同 "穎" 根本就係意思完全唔同嘅兩隻字: 一個從水, 係大陸地方名; 另一個從禾, 有 "出色" 之意. (兩字都唔係從頁, 與頭首無關) 所以從戲名個意思睇到, 絕大機會應該係用 "潁" 先至正確.

苦的 second day

2007-02-24T20:07:00.000+08:00

second day 又係苦的.... 竟然調咗去做埋d濕碎嘢 (有d似以前某一熟悉畫面..) 放工之後搵時間又去見另一份, 見完出嚟又係苦的, 感覺好down... 呢刻, 真係好想返番去以前, 好想為今日嘅自己作出補救. 出番嚟之後, 發覺自己已經一無所有!

3日前開始食 "氣血通", 睇吓對於腳部痛症同埋抑鬱症會唔會有幫助. 塊面好似多番暗瘡, 唔知係咪因為d藥太 "燥" 而引起....醫乜都醫唔好, 真係諗起都苦.

苦的 first day

2007-02-23T21:30:00.000+08:00

first day (of any new job) 唔係苦就係樂... 不過响未返呢份工之前, 我就已經知道呢個first day係苦的. 身邊個個都埋頭苦幹, 成個上晝或下晝都唔洗飲水or去廁所, 亦都冇break比自己鬆一鬆弛神經...好似受過特別訓練咁. 唔通個個都好enjoy呢種working environment同埋咁機械式的 procedure, 惟獨係得我一個覺得好難頂...?

因為要處理嘅文件係屬於機密同要保障私隱, 入去做嘢實施高度 "戒嚴": 唔比帶私人物品到工作間, 包括手提電話 (就算帶喺身校震機都冇用, 因為入到去都收唔到); 唔可以食嘢, 就連支水都要放响出面 (遠離自己位), 我諗係驚d人唔小心整濕or整污糟d重要文件....總之, 之前做過幾份類似嘅工, 都冇好似呢份咁嚴同埋咁多restriction...唔好講人工, 咁嘅一份job真係令我好唔舒服, 好想走.

苦中都搵到新體驗, 就係返工放工要 "打咭"! 唔記得以前有冇試過, 就算有都係十幾年前嗰份觀塘工廠工 (嗰時只返咗兩日就 "劈砲" 連人工都唔逗), 已經冇乜印象. 另外一樣, 就係d嘢要鎖喺個Locker, 真係出嚟做嘢咁耐以嚟都未試過. 自己位又唔係冇 "訂" 擠, 之前做過d工就算個位幾窄幾細, 都會擺番响自己度. Last one, 就係第一次响葵涌返工.

雖然係苦得緊要, 時間難捱, 但係一想到隨時可以結束份工走人 (都知道自己唔會做得耐), 好快又可以逃離呢笪怪地方 "重獲自由", 個心就會覺得好釋放好安慰! 就當係藉住呢份temp job, 慢慢適應番上班一族嘅所謂正常生活吧...

2/22 變咗做最後一日假期

2007-02-22T21:18:00.000+08:00

接到一個電話叫我聽日返(新)工, 嚟得咁急, 好突然. 2/22變咗做我嘅最後一日假期. 可以係好消息, 亦都可以係壞消息. (自己則傾向認為是"壞消息"多) 終於要告別長達七個半月嘅Long Vacation! 我嘅Sleeping Hours將唔再係7pm~3am or 10am~6pm...

最近搞過好多無謂嘢, 又試新軟件又玩BT下載電影("煲碟"), 都有幾多"驚人重大發現"ga. 無論如何, 我都會盡快上Vista. 呢幾日可能會再試裝多一次.

6/6/6

2006-06-06T00:00:00.000+08:00

千年一遇的 06/06/06 !

寫番幾隻字仔留念^^

達文西又話唔比睇

2006-05-18T23:44:00.000+08:00

同同事响今日開畫日就睇咗"達文西密碼", 劇情深奧難明, 睇完都覺得不安. 大部份觀眾都只係會當一部普通嘅戲咁睇, 純粹娛樂一下, 又點會深思吓部戲要帶出D乜嘢出嚟呢?

依家D教會又真係幾麻煩, 好多戲都話唔睇得:
貞子鬼片又話唔睇得,
哈利波特又話唔睇得,
斷背山又話唔睇得,
而家呢套達文西又話唔睇得

不過我都以"非基督徒"身份睇完呢套達文西, 好free

要用少D膠袋喇

2006-04-07T22:49:00.000+08:00

出咗去散心...only me

好神奇! 我竟然可以只係用咗一個鐘頭, 就由愉景灣碼頭趕返嚟紅磡嘅屋企..兩程船一程巴士, 咁橋哩三程又比我飛奔趕上... 不過唔係因為envyflower(hehe) 而係要去攞番張被, 舖頭8點閂門ma..係ar, 終於都捨得拎去洗喇, 仲換咗成set新嘅姆明牀鋪添..電氈又可以收番起喇..衣櫃都要準備換季喇..

清明過後雨紛紛, 唔係好凍. 覺得最深刻嘅唔係今日嘅行程, 而係..先後幫趁過惠康百佳, 發覺時代真係唔同咗喇...以前買親嘢無論大件細件, 收銀都會主動比膠袋你, 而家..? 睇你買嘅嘢係咪"散收收"同埋係咪冇自備購物袋, 如果唔係都盡量避免問佢攞膠袋好D喇, 會比人歧視架! 而家越嚟越多人去超市買嘢都唔要膠袋lu, 你買嗰少少嘢都要個袋咪好樣衰! 香港人嘅公民意識真係好...希望超市哩招真係可以做起一種文化, 商家有承担, 客人有責任, 咁就very good~

好啦, 咁我都由而家開始, 去惠康百佳用少D膠袋啦

4月諗起what..

2006-04-06T02:00:00.000+08:00

4月一開始諗起咩呢..
唔會係愚人節..
更加唔係清明..
而係......張國榮..
然後...就會諗起... 抑鬱症

他信

2006-03-31T18:53:00.000+08:00

倒他信......諗番起 04年12月發生超級大海嘯嗰陣, 齋睇電視新聞已經覺得呢位總理好唔掂, 唔識得體察民情, 善後做得差. d泰國人到而家先至話反佢, 遲咗15個月.

但點都好過香港個董建華 - 遲咗成7年

警監會

2006-03-16T21:30:00.000+08:00

警監會 << 呢幾隻字近lee幾日喺各大search engine都人氣勁升!
等我將佢寫落自己blog度, 睇吓有冇多咗人嚟
haha

投訴警方獨立監察委員會
Independent Police Complaints Council
www.ipcc.gov.hk
IPCC
下載警監會
警監會BT
BT警監會
警監會個人資料

希望呢日快d過

2006-02-14T19:25:00.000+08:00

微絲細雨, 你又會諗起邊個?
今日會唔會令你亂諗嘢?
我只希望呢一日快d過

19年後....先發覺首歌係咁正

2006-02-01T19:35:00.000+08:00

19年前, 迷迷惘惘. 聽收音機, 睇電視....耳邊聽過無數次呢支歌, 冇乜感覺, 亦都唔知佢唱緊乜. 19年後再聽番, 又有另一番味道, 依家先發覺首歌原來咁正! 總係嗰句, 點解有咁多嘢都係要等到人大咗先明白? 到咗呢一刻已經...幾乎冇晒力氣去講 "珍惜" 呢兩個字.

大約在冬季　齊秦

輕輕地我將離開你
請將眼角的淚拭去
漫漫長夜裡，未來日子裡
親愛的你別為我哭泣

前方的路雖然太淒迷
請在笑容裡為我祝福
雖然迎著風，雖然下著雨
我在風雨之中念著你

沒有你的日子裡，我會更加珍惜自己
沒有我的歲月裡，你要保重你自己

你問我何時歸故里
我也輕聲的問自己
不是在此時，不知在何時
我想大約會是在冬季
不是在此時，不知在何時
我想大約會是在冬季

過去19年嚟嘅春夏秋冬, 你做過d乜呀?
仲有幾日就立春, 冬天都同你講 "拜拜" 喇

CDImage.ape

2006-01-11T23:11:00.000+08:00

最近先接觸到嘅一種 format. 唔 search 吓資料真係唔知咩嚟. (我係咪比較out?) 仲有個叫 foobar2000 嘅 player with APE support, 都幾簡陋! 而家都係鍾意用 iTunes 多D.

展望06

2006-01-01T02:55:00.000+08:00

送舊迎新, 展望06!

我今年嘅 新年願望 唔再好似上幾年咁, 希望時間快d過去. 雖然係一個幾簡單嘅wish, 但其實裏面有好多複雜嘅thinking. 2006嘅願望就真係簡單得多: 希望比我搵到邊度有得食鰻魚!^^

去年1月1號定下嘅 新年計劃 有幾樣都冇做到, 決心真係好唔夠! 就連簡單到“去睇牙醫檢查牙齒”咁樣嘅一個simple task都冇去做! d牙都會變壞咯.. (咁又會唔會盡快做番呢?) 2006嘅新年計劃就真係夠晒簡單: 盡快轉工! --- 都係一樣 "講就容易做就難" 嘅嘢嚟 but 我都唔想係咁樣繼續墮落

Take it easy

回顧05

2005-12-30T23:40:00.000+08:00

回顧2005...似乎冇乜好嘢係令我印象深刻.

最遺憾嘅事: 識咗hx. 由2月25號開始, 到11月結束. 轉捩點係4月初佢利用自己個"網上電台"溝到條女, 之後就成個人變晒! 喺hx身上, 我浪費咗好多嘢, 好後悔. 唔想將"佢"帶到去新嘅一年.

最憂心嘅事: 冇得食鰻魚. 食食吓冇得食, 仲要係四圍搵, 搵極都搵唔到, 都唔知發生咩事! (就算有次搵到有得食, 都係"假鰻魚", 比間舖頭呃咗) 其實担心嘅都唔止係鰻魚, 驚遲啲連雞鴨鵝鴿..通通冇得食! (所以趁而家仲有得食就要食多d喇, 將來話唔定會絕種..)

最心痛嘅事: 個網被人"剷"! 應承咗比我免費空間嘅一個澳門仔, 忽然間又話要收番, 冇任何通知就喺7月31日suspend咗我account, 出到聲先開番度"門"比我上去backup番d data走(感覺就好似執包袱). 之後已經再冇心機整番個網, 8月開始荒廢至今. 呢個故事嘅教訓就係: 世上係冇免費午餐!

最無奈嘅事: 換特首. 唔知幾時個董特首變咗做曾特首, 董建華嗰條仆街唔知走咗去邊, 而曾蔭權又唔知係邊個定邊d人選佢出嚟. 總之香港換個最高領導人物話換就換, 連封通知信都冇寄過比我...真係幾無奈, 令人心淡.

最失落嘅事: 冇咗山伍同埋paulpaul. 原本同佢哋玩得好開心嘅一個行山網(山伍), 只係forum裏面某批人為一d唔同意見同權力爭執就搞到要改名平息, 而forum又定下咗好多控制言論自由嘅"版規", 令大家都唔能夠暢所欲言, 結果以前上開山伍嘅好多都走晒! 而且舊forum嘅data唔見晒(到而家都未知係人為定係意外), 搞到d人都冇晒歸屬感, 意興闌姍.

另一樣同山伍有莫大關係嘅就係, 11月得知paulpaul(3年前响山伍度識)遠離咗我哋, 唔想再同我哋friend(變相絕交). 經過一番明查暗訪, 搜集證據之後, 先得出一個未經證實但可信性甚高嘅結論 - paulpaul同kitkit响8月中"分手"! 發夢都估唔到, 佢兩個之前嘅關係原來係咁瞹眛. 作為佢哋好友嘅我哋都不得不接受呢個事實, 亦都明白pp唔理我哋嘅苦衷, just leave him alone and let it be. 山伍+pp disappeared令我相當失落, 以前影過嘅相因為hd壞咗睇唔番, 只有淡淡嘅回憶停留喺我個腦裏面.

除咗以上, 我嘅2005年都係好平淡無味咁渡過. 時事政治社會經濟天災人禍, 通通都可以係唔關我事. 只有年初嘅南亞海嘯同埋年尾嘅mc6, 先叫做响個"公仔箱"度有d嘢睇吓刺激吓, 其餘都係冇乜特別.

今年同往年一樣, 用嚟總結自己呢一年嘅說話係: 冇一晚瞓得好

4日假

2005-12-27T17:46:00.000+08:00

話都冇咁快就放完4日假! -_-;

往年聖誕都係得兩日紅假, 今年就特別d, "撚"埋禮拜六短週同禮拜日咪搞到變咗4日囉! (唔洗請假都放4日喎, 咪即係好似今年3月放復活節假咁一連放4日-對於一般返寫字樓嘅打工仔就係囉) 咁係咪好難得呢? 不過, 對於我嚟講, 放四日同放一日兩日三日都係冇咩分別, 放完假咪又係要返去對住班師奶, 咪又係要做監犯.

自從23號晚放工之後到依家(27號晚), 唔知做過d咩呢? 24號-洗一洗個電熱水壺..d漬冇晒,靚晒! 25號-睇咗隻買番嚟好耐未睇嘅dvd($115)"藍色大門",咁都可以消磨一個黃昏! 26號-除咗下晝出一出去旺角買toner,ink,dvddl之外(一出去買少少嘢又比人呃錢),成晚就係對住部電腦上網同同事玩in-play betting,幾刺激! 27號-梓楓請我食一餐,我就幫佢清走好多"電腦廢料",再去埋黃金同佢買兩舊墨,自己又睇吓嘢..唔過4點走人!

有d原本想喺lee短短幾日假期做嘅嘢, 結果都係冇做到..

呢個聖誕假期, 就好似一片空白, 就好似冇放過假一樣

mc6

2005-12-19T21:25:00.000+08:00

mc6終於都完咗! 本來為着lee個event有好多嘢可以寫, 諗吓諗吓其實係冇必要寫 (或者d報紙都已經寫晒出嚟la) 廣大香港市民都喺lee場show入面見過好多嘢, 學咗好多嘢, 每個人心目中都會有自己對於各樣事理作出對或錯嘅判決. 場show已經完晒, 灣仔銅鑼灣又回復番平時咁樣. mc6呢項 "盛事" 比每個關注嘅香港人 (除咗d只顧住男女戀情or吃喝玩樂嘅之外) 留下咗深刻印象.

對我嚟講, mc6都只不過係比多咗嘢我哋做. 點都唔夠嗰班出晒去但原來係連配角角色都扮演唔到嘅師兄師姐(同事)咁辛苦咁無奈. 所以呢, 喺我眼中 lee個mc6比我總結到嘅就只係一句說話: 好多嘢都係多鳩如!

就lee單嘢比我發覺, 响政府度做耐咗d紀律部隊同事 (無論低級抑或高級,就算好後生嗰d) 真係好 後知後覺, 似足晒整個政府總部嘅思想方式. 納稅人口袋裏面嘅錢, 就係咁樣嘥鳩晒...

而mc6為我自己帶嚟嘅影响就係, 令我考慮提早離開lee份政府工. 如無意外應該係06年3月前, 不過今日已經開始執定嘢

今日先至換季:pp

2005-12-05T21:01:00.000+08:00

換季換季! 羽絨又再出動!!! :-O

好多時候有d嘢, 唔到最急最後先嚟做嘅真係-.-;; 今日已經係12月5號喇, 幾乎冬天開始咗成個月都冇乜點郁過手, 係要等到今晚氣溫跌到10至12度左近先至嚟急! 緊係la我最怕凍gala 唔可以再等喇!><

其實最主要都係"摷"番張(今年1月先買嘅)電暖床墊出嚟用, 順便又換埋床單"反"吓張床褥咁law. 我計過喇, 張電墊一年要用成4個月(上季都係4月5號先收), 開着嚟瞓都唔止幾十日. 搞吓搞吓橫掂都執開, 緊係要幫埋個衣櫃換季la~ 而家間房細咗, 一到換季就一定要將off-season嘅衫pack埋一齊放晒落箱度幾個月唔拎出嚟, 騰出d空間出嚟擠d轉季嘅衫, 但都會淨番小部份off嘅留响衣櫃度有需要時可以換. 係咪好麻煩呢? 都只係每半年一兩次, 抽一日時間花兩個鐘頭度就搞掂嘞.

今季又有咩冬天衫好買呢?? :pp

今日lunch第1次叫"靚湯工房", 45蚊1湯1飯好似比平時叫開嘅貴1倍, 但其實貴就貴在個"老火湯", 原價要成35蚊係個飯價錢嘅兩倍!! 好鬼耐未飲過咁靚嘅雞湯(花膠瑤柱xxxxx雞湯,全名23字), 啖啖好味連d渣都食埋, 仲分咗d比同事飲添. 個飯就真係普通咗d, 同一般外賣差唔多, 開口埋口食飯食飯, 竟然比嗰壺靚湯"喧賓奪主"!^^

間公司應該係做高級寫字樓生意, 對象係d生活忙碌忙到成日冇乜機會返屋企食飯飲湯煲湯嗰d白領(我唔係:p), 如果唔係同事收到d單張, 我都唔知有d咁嘅service呢. 飲靚湯緊要過食飯, 連d湯都要用個保溫暖壺嚟載, 晏晝又要派人嚟收番(真巴閉), 連師奶都話淨係咁人哋來回兩次都抵番喎! 咁識賺錢, 遲d又再幫趁吓試吓第款湯先^^

聽日又約咗同事食貴嘢"Ruby Tuesday", 慶祝Harrison出第1份糧,
恭喜晒

冰“閣”

2005-11-27T19:08:00.000+08:00

太耐冇上過去冰角(kpoo)屋企la. 今次去除咗見見kpoo, 食吓飯傾吓計之外, 仲想上佢屋企參觀吓.

原來部腦搬咗番去自己瞓嘅房, 以前玩電腦嗰度變咗做佢嘅士多房. 我都係第1次上去閣樓, 都算裝修得唔錯, 執嘢執得幾整齊. 閣樓內有kpoo自己嘅私人空間(bedroom), lee個房就好似一個"閣仔", 可稱之為"冰閣", 有隻窗仔比d自然光綫入到去. 房裏面擺一張雙人床(床上面有兩個枕頭-.-), 一張電腦枱, 除此之外都冇位再放其他傢俬la(連書架仔都冇). 我覺得而家部腦擺睡房好過以前, 放响另一間"屋仔"咁唔方便. 依家同張床黐住, 用用吓電腦覺得攰可以即刻攤喺張床度ma;)

搞吓kpoo部電腦, 先發覺自己又有好多嘢唔識, 未掂過, 追唔上. 好似wireless lan, 我都係第1次見, 加個router就可以識得從空氣中transfer data, 幾神奇! 但上上吓網, 點都覺得同平時自己嘅feeling有d唔同, 時快時慢, 同埋個adapter擺唔同位置都會有影响. 咁又令我諗番起自己曾經用過嘅無綫光學滑鼠la, 硬係用來用去覺得唔夠cable mouse靈活同順暢, 所以用冇耐都頂唔順要用番cable mouse. 而繼續用緊嘅無綫keyboard就冇咁多lee d問題發生, 雖則有時都會"神神地"唔聽話. 而且環境需要(地方淺窄), 有時係要將個keyboard擺自己膝頭, 或放响張床度.. 如果唔係有特別需要, 或者想試吓d新科技, 咁都係用番cable la, 順暢d穩定d ma.

喺我印象中, kpoo算係一個識得為自己將來打算嘅人, 希望佢識得珍惜而家所擁有嘅一切la(包括學識,學歷,朋友,家人...) 喺lee度亦都預祝kpoo&ling下個月去旅行準備充 "沛", 玩得好 "豪" 好開心, 影到好多靚相, 好享受lee個難得嘅甜蜜假期

thanksgiving

2005-11-25T00:04:00.000+08:00

話唔慶祝又慶祝-_-;;

到咗今時今日, 我都好少可會請人食一餐(而且仲要係 "食貴嘢" 添^^) 已經好耐冇食過咁㊣嘅雞, 仲係差唔多成隻雞上碟, 好和味!! (琴流感? 話知佢~) 不過至今仍覺得若有所失嘅係, 我仲未知道而家邊樹有得食鰻魚.

感謝betty聽我up咗咁多"廢話"..找到人傾訴都好過自己屈埋屈埋. 今年大半年時間所發生過嘅事, 快樂與不快樂, 都係圍繞住同一個人. 05年就快過去la, 都係時候嚟個總結, 檢討..right? 唔好再為嗰啲不愉快事而傷神. (亦都唔好再為個waitress稱呼妳做"auntie"而覺得成晚鬱鬱不歡-.-)

有得用新icq (意思係開過一個新number), 唔知道betty有咩feel. 但我相信, 而家個list冇乜人夠晒清靜, 夠晒乾淨, 唔洗同咁多無無謂謂嘅人講咁多無謂嘢, 慳番幾多時間, 少好多麻煩, 連個icq都load得快咗!

經過rough check後, 我相信betty部機冇中到sober. 咁到底係邊鬼個咁唔小心呢? isp個e-mail我已經好小心對待, 除咗嗰三五七個比較熟嘅同埋比較信得過嘅之外, 我都唔會立亂比人. 一係就係某幾間細公司. 只要是但一個人唔小心 (開咗嗰封由FBI寄出嚟嘅warning letter) 都會累到我! 所以病毒信呢家嘢真係避無可避, 除非你真係完全唔將個address disclose比任何人或任何機構, 唔寫一封e-mail出去, 否則收病毒信嘅機會率肯定係大過零. 我緊係希望FBI盡快查出病毒元兇, 拉佢去打靶la.

世貿會議就快嚟, 唔知仲有d咩要我哋忙

絕交

2005-11-13T21:10:00.000+08:00

終於都了結咗件事la, 真係成個人輕鬆晒, 釋放晒.

今日 (2005-11-13) 我正式同 Hx 絕交. (已經唔方便寫佢個名出嚟, 就叫佢做Hx吧) 佢欠我嘅錢, 我亦都唔洗佢還, 就當係將d雜物存放响佢度交比佢嘅"倉租"吧, 今日已經一次過搬晒走了.

喺佢同佢女友身上, 我睇到一段荒謬, 極之"戇鳩"嘅愛情: 個男仔不斷咁向個女仔付出, 花咗幾多金錢時間同心血, 而個女仔就義無反顧咁接受. Hx認為每次同個女仔喺埋一齊, 只要氹到佢開心就得. 佢哋都覺得lee d就叫做愛情. 但係所謂當局者迷, 佢都唔知道自己lee種重色輕友有異性冇人性嘅行為, 已經一步一步咁傷害緊我同佢之間嘅關係. 而家仲搞到連出嚟同我食一餐飯嘅錢都冇, 而且窮到連手機月費都話冇錢交要cut埋! 究竟d錢洗晒去邊? 咪係佢比人炒咗之後, 又係攞埋份糧同佢條女去風流快活"fing"鬼晒, 花光花淨散晒d錢先再去搵過另一份工law...明知自己冇乜錢仲要學人拍拖亂洗錢, 好似當d錢係個天跌落嚟咁. 當初比咁多support佢, 又比錢佢開飯搭車, 原來佢根本唔洗食飯都會飽, 都係將d錢獻晒比佢條女! 我成日話佢, 做任何嘢或做決定時, 唔好咁衝動, 咁不顧後果好冇? 嗰陣口口聲聲話會改會改, 等咗佢4個月, 點知依家咪又係咁. 老實說, 已經一早唔再係還唔還錢嘅問題la, 就算今日還到比我咁又點呢. 我真係受夠la. lee個咁嘅比我形容佢為 一事無成兼冇錢淨 嘅人, 佢嘅所作所為, 真係令我佩服到五體投地ar.

臨走前, 我送咗一句金石良言比佢: 感情嘅嘢, 唔係用金錢或物質嚟衡量嘅. 唔知佢聽唔聽得明? 呢一句, 亦都係我留比佢同佢女友嘅最後一句說話.

識到Hx, 都算係我今年一個最大嘅遺憾. 我從未試過同一個朋友反面的, 今日終於都經歷到了

讀者來信 (am730)

2005-11-09T22:23:00.000+08:00

同事睇緊 am730 裏面一篇“讀者來信”, 叫我睇埋.
我攞走埋份報紙留番一個人慢慢睇.
睇完, 再諗諗, 都幾令人嘆息. 而且仲令我更加担心.

正確性價值與道德觀 　　　阿貴

有青少年避孕的態度調查報告指出，被訪青少年有四成半已有性行為，其中兩成是十八歲以下，顯示了婚前性行為的普遍性。他們想發生性行為時，縱然無任何避孕措施，有六成人選擇會繼續。這顯示了情慾被挑起了，要喝停是不可能的事實，所以再多有效的避孕方法也是枉然，因為大家都不去用。

有五成被訪女孩子表示，若懷孕後將選擇墮胎，也有五成多男的選擇結婚。這顯示女的比男的實際，大肚生子是女方，愛跟你快活，也並不代表要跟你過人世。時代在變，負不起責任或無良心的男人多的是，女孩子也多愛自己及自由多過腹中孩兒的生命。

所以專家、社工們單講避孕知識是治標不治本的，我們首先要幫助青少年建立新的性價值觀及道德觀。性行為帶給青少年多少失落及迷惘，慾海無邊惟「守貞」是岸。你對自己忠貞，對將來的婚姻忠貞，你才可求一樣質素的伴侶跟你同行。

了結

2005-11-09T01:34:00.000+08:00

立冬, 象徵住另一個季節嘅開始, 亦都表示話唔夠兩個月就happy new year. 响lee個憂患年代, lee個世界越嚟越多隱憂, 越嚟越多嘢令人担心. 唔知06年又會變成點呢?

有一件事情, 一定要了結咗佢. 我已經下定決心, 响lee兩個月之內, before the new year, 一定要搞掂佢! 我真係好想盡快解決lee件事. 我有信心我可以搞得掂.

冬天有咩好做?

你係邊個?

2005-10-19T00:03:00.000+08:00

除咗琴朝出咗去睇醫生(fever again), 我lee四日就只係匿咗喺屋企. 原來kalaning對我嘅印象都仲係咁清楚, 對於我"無端端"online icq嘅緣由分析得好準確:

病咗/冇返到工

已經冇做嗰份工

喺出面借用public電腦上網

佢即時比到我嘅答案就係lee三個. 平日唔係公眾假期, 而且又係afternoon office hour, 到底我因乜事幹會online icq (also msn) 一段時間, 而且仲係難得一見嘅available status呢?? saucony又覺得奇怪, 問我今日係咪放下晝. answer: no. 如果冇病冇痛請咗假, 我通常都唔會喺屋企玩icq ga. 2nd, if 已經冇做份工, you'd better check my homepage because 我會好忙碌咁update自己網頁唔得閒玩icq^^ 上網開住icq唔出奇, but if u could see my status is available mode (instead of invisible), 咁就令人哋覺得出奇law....因為我好耐都唔會available一次, 撞啱我"現形"有機會同你chat番次真係好幸運!

但係都仲有其他possible answer嘅:

打風落黑雨唔洗返工 (but, 全世界人都係啫)

試緊個icq/裝咗個新icq或其他icq substitute想有人send嘢過嚟

個icq account比人偷咗

去咗梓楓屋企上網

"噤"錯掣

每次開親msn都係一件幾煩嘅事(所以最多一個禮拜開一次), 因為又要準備receive到一d來歷不明嘅message. 我set定咗一套rule, 凡係符合晒以下lee兩個條件, 都會比我"封鎖":

嗰個人係我唔識

嗰個人send message過嚟, 開口就問"你係邊個"

今日又有個人比我ban咗. 唔知我係邊個都會add咗我, 玩msn玩得咁濫有乜意思? 你有冇試過打電話比人, 第一句就問人哋"你係邊個"? 除非係覆番比一個你電話簿裏面冇嘅number, 咁先會有禮貌地問對方"請問係咪有人搵我", 如果唔係都唔會咁白痴...如果下一個係你, 喺你準備要問lee個問題之前, 不如直接delete this entry from your contact list, 免得又比其他人ban咗你.

今日同kalaning chat咗幾句, 其中有兩句說話令我難忘:

我哋已經過咗追求新事物嘅年紀

人類係喺度走向滅亡

電車男

2005-10-15T07:44:00.000+08:00

漫畫, 小說同日劇都冇睇過, 就走咗去睇"電車男"呢套日本電影! @@

事緣做咗bc member攞咗兩張"免費飛"成幾個月都唔得閒去百老匯睇戲, 有時間又撞唔啱想睇嘅戲. 近日多得同事亞龍介紹, 又睇咗少少網上資料同小報文章, 所以咪揀咗lee套, 順便請埋佢同佢一齊去睇law-_-

如果睇lee套"電車男"淨係識得睇個story笑吓開心吓, 咁就真係幾膚淺. 攞過一份免費報紙, 有篇文章評論lee套戲話係反映日本當地流行緊嘅網路文化(network culture), 睇過套戲之後就深表認同! 而家除咗年輕人之外, 各年齡各階層嘅人好多都識得上網, 或者可能係根本係時勢所迫, 人人都要識上網, 否則你就知少好多嘢, 蝕底咗比人. 雖然一致都認為internet能夠拉近人同人之間嘅距離, 但事實卻係"有D嘢"發生响lee個社會裏面 – 子女同父母之間嘅疏離, 隱蔽青年嘅出現, 夫妻間唔和睦, 工作唔專心, 懶理身邊事物......睇睇吓又將自己代入咗戲裏面毒男呢個電腦迷嘅角色, 都有好多共鳴.

自問玩internet起碼都有10年la, 仲記得嗰時我係借Eddie响大學度用嘅account嚟玩e-mail, 舊同學Patrick send過封e-mail比我, 個簽名隔籬整咗個咁嘅符號→ :-) 我都唔知係乜, Eddie叫我打側嚟睇先recognize到原來係一個笑面 – lee個moment我到而家都仲記得ga. <grin> 真係勢估唔到, 嚟到2005年嘅今日, lee d咁嘅 (講到好似不能登大雅之堂咁) smiley表情符號/ASCII Art (日本人玩"顏文字"就有更多符號可以玩) 竟然會出現响戲院嘅大銀幕上面＠o＠仲比班製片人加工將d古靈精怪符號變成靚靚佈景同埋動畫!!^∀^ 真係非常之佩服嗰D film maker, 咁又比佢賺到筆錢.

睇完戲就帶亞龍去咗間好古老嘅茶餐廳"美都餐室"(响油蔴地廟街)度食晚飯. 其實lee間嘢我都未幫趁過, 今晚趁機會咪順便拉埋佢同佢一齊食law-_- 叫咗個招牌貨叫做"享譽五十年馳名焗排骨飯" 45蚊, 送到嚟時點知原來係一碟普通不過嘅排骨飯(炒底)! 出嚟個樣同我想像中有好大分別(一條菜都冇), 好彩味道都ok, 都幾香幾好食. 我好細個時已經跟亞爸亞媽成日去lee d餐室度食嘢, 所以一d都唔覺得怪. 今日再去番又係另一種滋味. 亞龍去唔慣lee d地方, 又話個廁所唔乾淨又冇得"摔"住度門, 食碗卅蚊嘅麵又嫌貴...怪唔之得佢都話, lee度專係呃d遊客嘅錢!-_-

食完我哋仲逛吓廟街睇吓嘢, 真係幾懷念細細個放咗學玩完電腦成日嚟lee度行行到好夜. 不過人大咗睇嘅嘢多咗, 而家已經極少嚟lee度行la. 而且我都唔鍾意lee度賣埋晒d"古惑嘢", 我唔想做古惑仔. 穿過晒d檔攤, 都係搞搞震冇幫趁

咁又一個月,我做過d咩

2005-09-30T23:06:00.000+08:00

九月份又要過去.

今個月做過d乜? 發生過d咩事最深刻?

九月一號開番個站, 不過淨係得guestbook. d人猛咁問幾時重開. 而家唔係已經開番咩? 同埋, 依然係個個响度問問題, 問呢問路. 其實, 一早就已經冇晒private space!

九月七號亞kit返番去加拿大. 又好似冇乜唔捨得喎! 佢臨走前仲話驚我會"搞"佢添@.@ 唔知佢返番去之後, 忽然間冇晒屋企人一齊嘅感覺係點嘅呢? 家務自己做, 冇人煮飯冇人服侍...但係我都係好羨慕佢.

“money is everything!”- 响亞kit個blog度睇到佢寫lee句說話.. 真係好㊣! (亦都令我感動) 如果我十八九歲嗰時都好似佢咁識諗就好la. 至少都識得想盡辦法比自己多d收入吖. 諗番自己而家全神貫注做緊嘅嘢, 唔係又係為咗想多d錢咩? 如果你知道有咩方法可以搵快錢(而又唔洗付出好多), pls tell me.. 走法律罅都制!

老逗生日年年都要去番同一個地方食飯. 1年365日除咗亞爸亞媽生日, 真係可以話完全冇機會一家人一齊同枱食餐飯. 嗰晚竟然比我見到我大哥嘅第3個女人! lee個女人喺我哋面前同大哥扮晒親熱, 真係一隻名符其實嘅狐狸精. 而我大哥就响個女人面前大聲講嘢大聲笑, 同佢平時對屋企人嗰份冷漠無情完全係另一個樣. 我個妹同我都嬲到冇說話好講, 都已經冇眼睇. 70大壽又點? 年年都係咁嘅氣氛, 食嚟做咩呢.

好好同事終於都走咗. 佢係我出嚟打工以來, 對我最好, 最幫得手嘅同事! 冇咗佢, 我唔覺得可惜, 反而"鄧"佢高興. 我睇我哋就好似喺入面坐監嘅監犯一樣, 而家佢走先(放監), 我緊係衷心祝福佢將來前途更好. 連佢自己都話“我唔會再返嚟”, 可想而知, 响佢心目中, 打lee份政府工係幾咁冇意思, 簡直係浪費人生! 好多謝lee位對我咁好嘅同事教咗我唔少嘢. 佢走嘅時候, 比我感覺係: 心情好輕鬆都幾開心, 冇乜嘢令佢留戀. 唔知我自己又幾時放監呢?

依然係逢週末放假(特別係紅色假期)先嚟落雨嘅衰天, 到依家已經冇乜好怨, 我已經習慣晒每個週末全日匿喺屋企唔出街嘅日子. 我都仲未知下一個唔落雨嘅紅色假期會係幾時... 近月尾廿四廿五號打風, 今年個大風嚟得真係遲. 雖然天文台冇掛到8號, 但都feel到個風真係幾勁, 外面d嘢吹到嘭嘭聲好響我都聽到, d雨又乘風勢打落隻窗同部冷氣機度, 幾驚"bong"牆又頂唔住搞到個房遭殃. 冬天都就快到la, 應該冇咁多雨落掛? 個衣櫃轉夏季都未轉得晒, 又要準備轉番冬季!

除咗世盃外圍賽同歐聯係我比較關心之外, US Open同China Open我都有留意. 不過lee兩件嘢"斬"吓眼就過晒! 我都希望有一日可以親身去到現場欣賞到Roger Federer嘅擊球英姿...

MySQL 4.1引發嘅n@board問題係我意料之外, 話晒我已經冇掂d程式成年有多, 每隔d時間發生d怪問題出嚟我都冇去理, 亦都唔aware. 今次仲虛驚一場, 以為某幾個同我有關嘅網比人hack咗添, 真係嚇死ar@o@ 好彩事後都證實係冇d咁嘅事. 今次有d似之前嘅“便條盒子”用咗個新嘅reserve word嘅compatibility problem, 但係影響就大得多, 搞到d user login唔到.

原來唔止n@board, zeroboard 都有相同問題, 我諗甚至有唔少php+mysql application都受到影響. MySQL真係好改唔改, 點解要改到d咁critical嘅part呢? 即係寫php程式嘅要永遠就晒呢套system, 套system有咩update issue, 個php程式都要同時update作出相應配合. 咁用嗰個就慘, 都唔知佢用緊嘅server幾時會轉用咩version嘅software, 除非全世界server都唔好update d software, 否則lee d事幹隨時又有可能再發生. 而家唔同server又用緊唔同version嘅MySQL, 搞到作者又要according to each version去modify their scripts....hosting provider, script writer, end user個個都難做, 真係煩!-_-

上禮拜終於都將自己部“自動揭蓋”samsung mobile賣出. 今次仲係我咁大個仔第1次將手機放出去賣添. 冇ar, 只係feel到lee部機越嚟越唔掂, 自己越嚟越唔鍾意, 特別係聽咗亞kit講嘅某句說話之後, 而自己又忽然間有部"免費機"用得, 可以趁機會套現番d錢... 而家我用緊嘅手機係銀行"送"嘅信用卡禮品, 少d功能冇得影相. 依家我竟然鍾意lee部cheap機仲多過鍾意嗰陣花3千幾蚊買返嚟但係到今日賣番出去只係值原價兩成幾嘅"名廠靚嘢".... 唔洗去考究d聽歌, 影相, wallpaper, data transfer嘅嘢, 簡簡單單咪幾好

開一本新簿

2005-09-01T20:25:00.000+08:00

彷彿, 返番去以前嘅今日.
Say, 一九八一年

開學第一日, 老師就教我哋開一本新簿. 拎起支鉛筆, 喺個簿面度, 寫自己個名, 讀邊班, 同埋學號. (冇錯, 大家真係乜都唔識, 連一本校簿都要人教我哋點寫點寫) 然後揭開本簿, 第一頁嘅右上角, 對正第一條藍色綫上面, 用中國數目字寫上今日嘅日子, 係 九月一日. 老師仲將呢四隻字, 用粉筆大大隻咁寫咗响塊黑板, 連埋啲間綫, 模仿本簿個樣畫埋一間間出嚟.

你仲記唔記得, 自己寫嗰幾隻字係點嘅樣? 你仲想唔想像得到, 老師係幾咁盡心盡力, 教我哋呢班無知嘅細路?

今日, 我又開番本"新簿", 將晏菲花戀美化咗嘅晉級留言板, 放响自己個網度. 新一個學年, 象徵住一個新嘅開始. 希望大家好好珍惜呢一個學年, 學到好多嘢, 到出年學期完結時, 比人哋睇到好成績.

＊　　　　　　＊　　　　　　＊

禮拜二正午12點, 辦公室突然爆玻璃! 我都好奇, 點解好地地一幅大窗, 無端端一聲巨响就爆到碎晒. 好彩係強化玻璃, 好安全, 冇跌到落街. 琴日上晝, 大廈工程部搵咗師傅嚟換玻璃, 做慣做熟冇阻滯, 換好再搵塊木板封住. 今日拆走塊木板, 做埋啲清潔工作, 隻窗變番之前一樣, 好似冇事發生過. 動作真係好快.

趁住九龍仔泳池今日開始閉館裝修, 琴日又去游水. 好似好耐冇去咁. 跟住要等到出年夏天先有得再去喎! 下禮拜開始要改去大環山游喇. 唔知大角咀個場開咗未呢? 試過有兩次喺夢中, 夢見自己去咗一個好靚嘅室內泳館, 兩次都係同一笪地方, 但係响現實世界裏面, 卻係冇去過咁嘅地方, 唔知會唔會就係......?

游完水之後, 琴晚冇將副con浸過夜(貪方便,樽liquid留咗响office), 今日放工返嚟揭開個蓋, 一隻con摸上手竟然係硬晒!@@ 戴咗con成四年都未試過咁硬嘅. 以後真係唔好制. 希望嗰隻con仲可以繼續戴啦.

再裝番Apache, PHP, MySQL, phpMyAdmin...幾乎咩都唔記得晒! 搞咗好耐, 不斷咁誤打誤撞, install又uninstall, open又close, 先至整到MySQL同其他application之間嘅connectivity係冇問題, 而其他人又唔會唔洗入密碼就入到嚟我個database. 新出嘅MySQL 4.1都唔識用, PHP 5就更加唔敢"掂". 仲有啲HTML, Perl同PHP語法都生疏咗, 要睇番多啲先會熟番..

有邊個係一出世就乜都識, 唔洗學唔洗人教?
到咗今日, 我都仲有好多嘢想學

停咗雨,

2005-08-21T17:20:00.000+08:00

終於都停咗雨.

"枕"住落雨搞到周身唔得閒, 年年七月十四盂蘭節都係咁, 好鬼麻煩. 舊年大修完之後, 間房依然係咁"林", 水浸漏水滲水滴水...又再嚟過! (無奈..) 今次又想報銷幾多嘢? 又想嘥多我幾多錢? 搵多多錢都冇用啦.

牆皮又爛過, 油漆又甩, 滲水變色, 石屎就快鬆...似乎某d位唔可以擺嘢, 唔可以貼住"bung"牆, 又唔可以擺地下. 為咗lee間咁嘅"豆腐屋", 都無謂嘥咁多時間同精神去煩啦. 喺度都住咗十幾年, 都唔係第一日啦. 我而家已經冇咩說話好講..

要鬧嘅, 已經鬧過.
要嘈嘅, 已經嘈過

早走早着

2005-08-13T03:28:00.000+08:00

又係打風"吽"雨嘅日子, 好熱好侷! d同事又喺度講, 最好緊係禮拜一朝頭早先掛8號, 幾鬼死黑心. 呢輪都繼續係衰天, 唔到假期唔落雨嗰隻.

撞到以前教會d人(yesterday), 或者以前一齊讀書嘅舊同學(today), 我嘅反應竟然係: 擰"歪"面, 閃開!!-_-;; 搞到自己好似冇面目見人咁, seems isolating myself from the crowd.. 都要睇吓嗰個係咩人, 想唔想比對方見到我而家個樣, 比佢知道我最近搞緊乜! If not necessary, 我都唔會專登走埋去同佢打聲招呼, 避免喺佢嘅視綫範圍出現....too bad

肚痛咗差唔多成個禮拜, 可能係腸胃不適, 定係食咗d唔乾淨嘅嘢, 搞到好唔舒服, 幾晚要搽油瞓覺. 到lee兩日終於緩和番冇乜嘢, 我個心都安樂d. 但精神依然係好差, 成日好攰

得知我個好好同事ray, 都話做埋lee個月"較腳"走人嘅時候, 有d幾突然, 再一次令我down.. 之前benny同kendy走嗰時咪又係, 其實我好"鄧"佢哋高興, 因為真係好似刑滿出獄"放監"咁. ray又係要早過我離開, 仲要係未完成合約走人, 我都幾佩服佢. 佢都算係好幫得手, 係咁耐以嚟對我最好嘅同事. 我諗佢都係頂唔順lee份咁嘅工作, 日日做埋晒d無聊嘢太冇意思.

好好同事仲醒咗4隻字嘅名言比我, 勸我都係: 早走早着

903去咗apm on air

2005-08-12T01:10:00.000+08:00

預祝小俠生日快樂! 原來, 仲有機會一齊食個din, 一齊傾吓計開心吓.

去到美孚同梓楓一齊出發, 搭的士去觀塘apm要成九十幾蚊(來回就190!) 所以如果唔係有必要, 就避免再同佢嚟lee度la, 同去朗豪or奧海相比, 多咗嘅車錢都夠我哋睇場戲lu.

已經嚟過3~4次, 都開始熟路, 開始睇慣la. 睇唔慣嘅係: 自己個"怪頭", 梓楓副新眼鏡, 小俠件曼聯波衫(好搶眼)! 一於唔執輸, 去到個新商場係咁影相. 因為少少哋3個人, 今次梓楓可以同小俠影好多合照.

Roma Roma 係食意大利菜, 門面靚靚哋, 所以就揀咗食lee間law. 座位唔錯, 招呼好, 係d嘢食平時冇食開, 好似唔係幾啱大家口味! 炒菠菜同意式米飯都係怪味, 怪相, 怪形狀. (我估都係幾健康..) 但個扁意粉同碟炸雞棒都ok, 有d味道. (試吓d平時好少食嘅嘢ma~) 冇叫湯, 冇叫甜品, 冇叫嘢飲, 3個人食都要$231.

上年"做生日"又太誇張, 今年都係諗住低調d. 結果係: 冇生日蛋糕, 冇生日咭, 冇唱生日歌. 但都有我哋嘅生日祝福(學業進步:p), 請佢食"生日大餐", 夾錢買生日禮物ar^^ 今次又係曼聯, 不過係一件摸落去好舒服嘅cotton tee(唔係大陸造:p). 希望小俠鍾意呢份禮物la.

食完出嚟大把時間, 行咗個幾鐘商場. 呢個新場夜晚一樣係咁多人, 一睇個food court大把人等位就知la. d人圍住晒睇嘢, 原來個透明大膠盒入面係個電台播音室, 903去咗apm on air做節目呀! :-O 現場情況仲可以响個大銀幕度睇到添~ 而家真係高科技la, 做電台節目要比人睇到晒, 要有聲有影ga! 我哋仲見到節目嘉賓Yumiko(鄭希怡)個真人ar, 側邊d人係咁舉起d相機/dv/手機瞄準佢, 我哋都幾乎想走埋去同佢影合照咁滯!

今晚亦都係我第1次"孭"個新bag出街, 都幾型

電話騷擾

2005-08-05T01:01:00.000+08:00

點解唔早d唔遲d, 偏偏係响我個站"冇咗"嗰晚(7.31)開始出現? 忽然間有個我唔識嘅人, 唔知係咪又想打我主意, 不分早午晚時段係咁打電話嚟, 話知道我個網站開唔到, 仲提供埋"免費空間"比我, 只要我開聲話"好", 就即刻開個account比我, 叫我轉埋個dns去佢度. 又話好想幫我, 好支持我網站同我製作d程式..

你話la, 我响lee個時候, 仲邊有時間, 仲邊有心情去搞lee d嘢. 而且比dreamsky收番我個hosting之後, 我仲邊有信心再去試lee d嘢, 再去嚐lee d "甜頭". 你都唔好話我懷疑你, 查實你有冇必要係咁打十幾廿次電話嚟要我嘅答覆? 到底你有何居心?

頭嗰晚到第2日, 我都唔太為意, 但我越諗就越唔對路, 點解會响lee個時候, 點解會有個咁嘅唔識嘅人走出嚟...都唔知係咪同dreamsky或者某d hosting集團有路! 同埋聽佢d語氣都怪怪地, 好似有d狡猾咁, 今日仲講話: "讓比我la" 我想問, 到底要"讓"咩比你? 唔通比你做我嘅主人, 你會得到d咩好處.

佢仲同我講過, 嗰個"i-hkt"間公司害過佢, 話亞kit係衰人! (亞kit, 我估我冇識錯你吧)

我真係頂唔順佢咁樣電話騷擾我法, 又要我係咁delete d voice mail. Reject咗佢好多次嘅來電之後, 我今日終於都call佢覆番佢, 我話我唔洗你幫我, 我而家唔想煩lee d嘢. 跟住佢嘅語氣即刻唔同咗, 仲cut埋我線.

都唔知發生咩事, 好似成日都有人對我不利咁
真係好想喊

新Look

2005-08-02T19:34:00.000+08:00

今日要以新look示眾, 出門口前有d驚, 因為整極都唔知點咁, d gel唔知點搽法, 唔識隻手點郁, 無論點整都唔會係自己心目中想要嗰個樣@@

返到office就個個輪住問我同一個問題, 所有嘅回應之中, 有彈有讚, 有個都話睇唔慣就覺得以前個樣好d, 好彩都唔係劣評如潮嗰隻. 上上落落架"lip", 入面4面都有鏡, 睇嚟睇去睇咗好多次, 遠睇真係OK ga, 近睇就覺得自己個頭好"朽教"law. 其實我唔鍾意d髮尾起晒勾ga, 之但係想d頭髮鬆d硬d就一定要咁wor, 唔可以好似一d人咁, d頭髮天生就係豎起晒向天gor wor. 兩次嘅電髮經歷都話比我知, 有d嘢係唔可以勉強law..

講真吖, 有邊個貪靚嘅人會甘心自己成日都係同一個樣, 人一世物一世, 唔敢去試吓其他嘢等自己有d變化! 如果我將個頭染到金晒, 仲要好淺色嗰隻(一定要金過亞KiT ga), 唔知d同事同埋上司有冇人會唔Like我呢? 呀....不如配番副太陽眼鏡都唔錯! 咁大個仔都未試過擁有過呀!@@

叫外賣貪新屎坑, 搵嗰間今日新開張嘅, 點知過晒鐘都唔送嚟, 搞到又要走去大排檔食, 返嚟先打得通個電話, 佢竟然話送錯咗去第度仲收埋錢添! 今次真係貪新之過 :<

禮拜二都要咁好天....繼續係衰天

1號

2005-08-01T23:01:00.000+08:00

1號? 係ar, 又係1號la, 而且仲係禮拜1添~ 算唔算又係一個新嘅開始? 如果今日係我返新工嘅日子咪係law, 但事實上又唔係law, 一切好似照舊咁冇乜特別. 不過今日有假放, 仲係annual leave添, lee日假都算係賺番嚟ga.

約咗i-a-o食lunch, 知道佢返工嗰樹係民裕街, 近我屋企ma. 去咗崇潔街一間日本嘢(連個名都冇睇), d嘢食麻麻, 好似同快餐店差唔多, d亞姐動作好"琴青", 拎碗湯埋嚟都爭d倒瀉@@ i-a-o返工嗰頭即係我細個時住嗰頭, 第日放平日假可以搵吓佢食晏.

出旺角剪頭髮, 貪得意又試電番鬆d, 點知又唔係我想要嗰個樣@@ 咪又有d後悔....不過d頭髮真係好貼, 好冇力, 唔甘心成日都係咁嘅衰樣, 就當係轉吓style都好ma. (睇睇吓有d似 C.朗拿度) 聽朝返到office都唔知點算! (驚人睇唔慣?) 快d攞番嗰罌"頭泥"出嚟la, 落d gel睇吓好唔好d

個衰天又玩人, 逢禮拜六日落雨, 禮拜一至四先好天....註定週末都係冇得出去玩, 正一衰天

佩服到...伍體投地

2005-07-28T19:29:00.000+08:00

『個亞"Ｄ"嚟講嗰幾句嘢就做撚到你仆街, 搞到咁勞師動眾做乜撚嘢呢...』某人講嘅lee句說話真係好"應", 一針見血, 淨係lee句嘢已經講出晒我呢兩日嘅心聲!

話說今日佢哋"拜關帝"(其實聽日先係嗰個"誕"), 我同jimmy為咗lee一日, 為咗個亞"Ｄ"嚟講嗰幾分鐘嘢講得動聽一D, 聽d聲靚一D, 搞到要走出個carpark度set場, 要識得搞掂嗰壇嘢(聽講話要成兩萬銀買番嚟嘅音响器材), 拉喇叭綫, 試咪, "蹺"綫, 仲要焗"桑拿"...搞撚到成頭大汗滿面塵. 之前都已經擺好咗個位, 嗰個"哥師奶"自己冇落手落腳拉過綫, 臨到今日10點9先至嚟話搬去第二度, 仲要託個同事落街買兩條幾十呎長嘅拖板駁電綫(駁到去一個好遠嘅power supply)! 唉, 只不過係d好少嘅事啫, 洗乜係都要搵d咁嘅嘢嚟搞吖-_-

大食會又有d好難睇嘅現象: 個個大碟大碟咁將d嘢食搬走晒, 又有人用個A4紙皮箱載住十幾杯汽水走, 佢哋寧願返番去自己個位度食都唔留喺carpark度食(緊係la,你揀埋d咁嘅地方又熱又焗,人哋嘆慣冷氣ga ma...好多師奶亞叔都一早知道咩料,直頭冇夾錢唔食你la) 有d就直頭乞"衣"咁, 係咁將d食淨嘅嘢"筆"晒落幾十個發普膠飯盒度, 成車咁推番上去分, 又話今晚慳番餐唔洗屋企煮飯咁話wor! 仲問我要唔要添, 我心諗, 我已經做到冇撚晒胃口食嘢la, lee d垃圾留番比你哋食到夠la, 食唔晒咪擺出街餵狗law

亞jimmy今次真係好帶挈, 自己提出話要用膠紙將d喇叭綫黐住喺個地(話驚"kick"親人 - 多鳩餘), 但"哥師奶"同eo2都冇叫到佢咁做, 搞到起番d綫時條綫黐住好多膠, 又要我幫手"逐忽逐忽"抹番乾淨. 你知唔知, 做lee d嘢係一d都唔過癮ga, 我都虧你諗得出, 仲要响我做緊嗰陣行埋嚟串我! 花兩粒幾鐘抹完"蹺"完一條綫之後, jimmy竟然話唔抹另外嗰條叫我同佢抹鳩埋, 我真係好撚嬲law, 我已經同你搞掂咗1條, lee個錯係你做成, 都冇理由要我承受埋你嘅錯! 總之一人分擔番一半又好, 我自己嘅就做咗, 另外嗰條就唔知你! 班師奶又係唔知點諗嘢法, 點解要抹番靚佢, 一年先用得嗰一兩次, 黐咗d膠又有乜問題? 用得多實會污糟, 又唔係用唔到. lee d嘢咪又係好似嗰時"搣"紙咁law, 又係d厭惡性工作, 根本係冇需要做嘅. lee d嘢冇人想做ga, 你估我好想做咩? 比你班仆街自己做吓就知道有幾辛苦囉

班師奶個腦真係好有問題, 好多無撚謂謂嘅嘢都係佢哋先諗得出, 佢哋嘅處事作風, 辦事方式......lee一切一切, 真係令我佩服到...伍體投地

掘金之旅

2005-07-24T04:11:00.000+08:00

對於紅魔鬼球迷嚟講, 7月23號lee一日真係等到頸都長埋! 曼聯又嚟咗香港la! (唔知小俠有冇着到我送比佢嗰件曼聯波衫入場睇波呢?) 晏晝踢嗰場表演賽, 都係睇電視直播就算, 入場睇一睇要成千八蚊, 對於香港大球場lee種環境嚟講, 真係唔值ar.

除咗曼聯之外, 西班牙嘅皇馬都同時展開佢哋嘅"掘金之旅"wor.. 一日之內睇到晒咁多個球星, 真係好難得. 不過C.朗拿度同碧咸都唔見人, 總係爭咁d嘢. 唔知曼聯幾時多咗個中國球員, 叫董方卓, 我都係第1次見佢披甲, 而且仲有波入! 守門員雲達沙又係唔知幾時走咗去曼聯. 今晚亦都係第1次睇到"北京現代"呢隊波, 佢哋喺皇馬身上入到兩粒唔係嘢少, 唔知係咪落住雨嚟踢會對佢哋有利d? 香港隊同北京現代隊嘅表現都算唔錯, 至少大家都贏晒成隻"盤", 好威!

轉眼間, 曼聯已經唔只係一隊波, 而且仲係一個牌子, 去到邊都會見到曼聯嘅商品喺度賣! d名牌球會嚟到亞洲踢波, 緊係唔係為咗滿足球迷眼福咁簡單la. 之所以叫做"掘金之旅", 背後係有好深遠嘅商業意義

睇到喊，睇到冇晒感覺

2005-07-21T20:40:00.000+08:00

自閉症 都算係上帝其中一樣偉大嘅創造! 就係因為有呢樣嘢, 先凸顯到佢哋喺世界上係特別嘅一群, 佢哋同正常人一齊嘅時候係好唔同, 人性百態, 人情冷暖, 喺佢哋同呢個所謂"正常世界"產生磨擦嗰陣就浮現晒出嚟.

7月21號公演嘅戲, 比我注意到嘅只有 虫不知 同埋 我的馬拉松, 前者廣告賣到周圍都係, 然後先比我發現後者嘅蹤迹. 港產片又係睇明星睇特技, 再加埋誠意都唔夠一套特別推介比香港人睇嘅韓國片咁吸引到我. 諗諗吓已經唔洗點諗, 一於就同梓楓去睇呢套我的馬拉松啦. (咁啱又係第1日上映, 又比我哋飲到頭啖湯, 哈~)

揀咗睇呢套就預咗要睇劇情同演技, 結果係比我想像之中好睇! 尤其是個男主角(曹承佑)喺現實裡面, 係花咗好多時間去揣摩呢個角色, 佢去探訪過特殊學校, 又參加過馬拉松訓練同實地比賽...喺戲裡面飾演草原嘅佢, 扮演一個智商只有5歲嘅人, 真係活靈活現, 好有神髓, 無論眼神, 手勢, 表情, 聲調, 動作等各方面都係做到足! 諗番起佢演過嗰套"假如愛有天意", 佢又唔似係咁幼稚...真係令人佩服.

飾演佢亞媽嘅金美淑 (當然係"正常人") 亦都唔輸蝕, 喺佢嘅演出之中睇到嗰份無微不至嘅母愛, 特別係因為個仔患上咗先天性缺陷, 曾經想過放棄但又覺得都係自己個仔, 唔可以就咁唔理佢, 為咗個仔, 為咗自己, 為咗屋企, 點都要諗辦法比個仔搵番d生存意義, 有d本事, 話比全世界人知, 個仔係特別嘅, 係有本領唔係一條廢柴留番嚟"獻世"! (如果係响大陸呀,d父母可能一早已經掟咗佢出坑渠邊la) 好多時d感人情節, 就係喺呢個兩種唔同世界嘅人互相磨擦發生衝突嘅時候走晒出嚟.

臨尾嗰幕草原正式比賽, 應該係成套戲嘅"高潮"啦. 梓楓睇到喊晒捽眼捽鼻, 仲猛咁同我講嘢, 我諗佢係想舒緩一下自己嘅情緒 (煩住我-_-) (其實已經唔係第1次ga la) 而我自己亦都"罕有地"激動到忍唔住"標"眼淚, 搞到要鬼鬼鼠鼠咁攞紙巾出嚟. 連主角個細佬都喺lee個白痴仔身上搵到d做人嘅道理, 連個諗住分居嘅老逗都返番嚟一齊住, 你話感唔感動la. 我都好耐冇睇過一d咁感人嘅戲la.

落大雨, 比d雨"dub"到濕晒, 到底係咩感覺?
跑完100個圈, 對腳好似唔聽洗, 又係咩感覺?
個心"噗噗"咁跳, 仲要係跳得好快, 到底又係咩感覺?

乜都唔知 - 話唔定比"正常人"更加快樂.

我都想自己有一日可以乜都唔知, 冇晒感覺
生存响呢個世上亦都唔會再有煩惱

好彩部冷氣冇壞到

2005-07-19T19:19:00.000+08:00

7.19 黃昏

天文台話:“今日市區最高錄得35.4度, 又係全年最熱嘅一日”(搵笨)
ForecastFox話:“current temperature係34℃, feels like 41℃”
食完大排檔返嚟嘅好好同事話:“行出去比d熱風吹一吹, 個鼻即刻冇咁辛苦”
梓楓話:“今早天氣已好了”(嗰陣幫妳買過個電腦如果唔係同妳加多幾把風扇仔, 妳部機都瓜咗la)
花戀話:“買六合彩從不會中獎的我...昨晚竟然” (以為佢真係中咗頭二三獎)

以為今日受"海棠"影響會有好多雨落, 點知唔係, 又好似琴日一樣咁鬼熱. 琴晚聽咗花戀嘅一句說話, "响lee個時候應該每個禮拜清洗一次冷氣機個隔塵網", 但自己竟然幾個月甚至半年都冇洗過wor, 我就更加覺得唔可以再由得佢唔理. 其實係已經決定咗今日洗, 只不過同佢講番. 一返到屋企, 即刻將個隔塵網拆咗落嚟, 嘩....真係好恐怖=_=

老逗都係會幫我洗塊網啫, 自己都要親手抹番靚靚個"面板"ga, "liu"走晒好多塵, 搞到成身大汗! 再開番部機, 真係好好風呀! 但都係要校到最盡, 仲要將d"葉"推落嚟吹住下面, 熄埋抽氣扇...衰在仲爭把鴻運扇! 好彩部冷氣冇壞到ja, 如果唔係都唔知點算..

剛啱變咗做成人嘅浩思, 我就提議佢去投注站買番張六合彩, 睇吓會唔會咁"橋"第一次買就比佢中到頭獎, 咁就又可以辭咗份工玩多幾個月先再算啦

生不逢時

2005-07-19T02:00:00.000+08:00

37度嘅高溫過後, 陽光暴曬過後...

7.19 午夜

一踏入浩思嘅生日冇幾耐, 天氣即刻轉壞! 猛咁行雷閃電(嘈到冇得瞓), 落大雨刮大風...就好似個天將嗰d埋藏到好深積壓咗好耐嘅滿腔怒氣, 一次過爆發晒出嚟咁. 今年沖正太歲嘅浩思, 真係生不逢時...我有個預感: 呢個日子肯定會害死好多人, 帶比好多人唔方便.

我送比佢嘅生日禮物, 竟然係一張欠單! 就喺佢洗晒d錢嗰幾日, 我已經打消咗個念頭 - 唔會同佢慶祝生日. (寧願過兩日請梓楓睇戲~)

抽離

2005-07-18T01:43:00.000+08:00

連續兩日嘅假期都係匿咗喺屋企, 冇出過門口, 冇聽過電話, 1個仙都冇洗過. 就好似將自己由呢個喧鬧嘈吵嘅世界之中抽離咗出去一樣. 不過到咗禮拜一, 咪又係要返工, 又要出門口, 又要返去對住嗰d人! 其實喺禮拜五晚我開始放假嗰陣, 就已經要準備定禮拜一返工嘅嘢la. 放假都係為咗等返工, 等於冇放過假一樣.

個冷氣開到High Cool都仲係覺得唔係幾夠涼, 唔知係咪開始壞呢? 屋企成日買埋晒d cheap嘢, 搞到樣樣嘢都"渣渣地"咁, 令到我住都住得唔安樂...

冇嘢好講

2005-07-17T02:45:00.000+08:00

今個週末, 我邊個都唔想見, 咩電話都唔想聽, Sorry!

拆鳩咗佢起過仲好啦..

2005-07-15T01:12:00.000+08:00

前日放咗工之後, 搭地鐵去深水埗, 行咗少少鴨寮街就去逛 西九龍中心. 去嗰度, 係因為想搵d嘢(結果都冇), 當然亦有興趣想睇吓嗰度今日變成咩樣. 原來呢個商場已經"老"晒, 要留嘅留, 要走嘅走, 唔知邊個咁無心經營呢個場.

一入門口就落basement去睇吓個好似幾"新"嘅X-Zone, 都係d所謂潮流嘢, modern items. lee度簡直係慘淡經營, 多數舖位都吉嘅冇嘢睇嘅, 一係就未開門, 一係就鎖咗門但裏面着咗燈, 一係度門開咗但入面係冇人看舖嘅, 甚至有看舖嘅伏喺度瞓覺! 咁....究竟係咪唔想做生意? 如果係嘅話, 做乜要咁辛苦困喺嗰度啫?

上番去正式個場度, 周圍行吓, 每層都擺咗好多流動攤檔喺度(商場嘅走廊係成一個圓圈), d攤檔仔擺到"密質質", 但係又唔見有人幫趁, 看舖嘅唔係睇雜誌就瞓覺....d攤檔仔會唔會就係呢個場嘅特色? 我就覺得好礙眼, 整到成個場好cheap. 行吓行吓, 又覺得lee度幾似同樣都係老態龍鍾嘅九龍城廣場. 行嘅人好多係街坊街里, 着拖鞋嘅有, 小學生中學生, 亞爺亞婆陪d孫嚟行, 買d嘢唔會好貴, 成個環境都好cheap, 好配合附近深水埗舊街一帶嘅氣候.

有唔少知名連鎖店都仲喺度, 賣衫賣鞋賣錶, 又見有先施百貨, 算係沖淡一吓頹氣. 上多幾層有好多舖位分到好細, 有d仲係分租比好多租戶, 一個area裏面冇乜間隔, d五顏六色嘅貨擺到通處都係. 管理公司緊係靠收舖租搵食, 捱過咗一段好長嘅日子. 但係搞商場嘅心真係冇乜, 點解唔可以學吓人哋德福同新世界咁嚟個大翻新, 花筆錢比個場重生....再係咁落去只會越嚟越殘, 整到個場咁難睇, 不如拆鳩咗佢起過仲好?

第8層樓係food court同溜冰場, 一樣係老晒! 連坐喺度食飯食麵嘅人, d樣都老晒lu. 我記得我以前都嚟過lee度食嘢, 嗰陣仲係幾靚幾舒服ga, 但無法la, 人大咗見嘅嘢多咗好多, 要滿足亦都難咗. 行慣咗朗豪坊 APM 又一城之類嘅大場, 忽然間又嚟行番呢d舊場, 真係感慨良多ar.

上到頂樓, 竟然比我搵到間"兒童遊戲機中心", 真係好懷念ar. 入面真係好多細路仔打機ga, 但出番嚟先見到門口棟個牌寫住"1989年7月12日或之前出生的人仕請勿進入" =_= 我喺度諗緊, lee個日子我喺度做緊d乜, 我喺邊度? 時至今日, lee d場所已經比網吧取代晒...咁滯!

其實有d嘢都係值得保留嘅. 假若起過個新場, lee d咁令人懷念嘅嘢, 仲係咪有得保留, i don't think so.. lee個場有lee個場嘅文化, 點解唔可以包容存在呢? 點解唔學吓欣賞佢哋咁堅持搞生意直到今日呢? 人又真係咁鍾意比較, 咁貪新忘舊, 咁難滿足...

浩思終於都喺icq度同我講, 攞完份糧辭職之後嗰幾日都係同條女周圍去wet(緊係啦趁好天), 仲好老實咁話比我知, 份糧已經洗鳩晒 !! 我連續兩晚喺icq度同佢嘈. 我覺得佢真係好唔顧後果. 第日你冇錢洗唔該你自己搞掂, 我話知你死都唔會再比錢你! 枉我嗰排咁關照你當正你係我細佬....口口聲聲話會改, 我先唔會信...洗鳩晒d錢先嚟話"我會改,我會改", 改乜鳩嘢呢?? 而家同我講lee d嘢有鳩用呀??

浩思真係好傷我心. 我已經唔知講咩好..

不過, 我都認, 如果比我,
我一樣會好enjoy好似佢lee d咁任性咁放縱嘅行為